Bajrush Morina:“Shko e eja si Adem Peja”

nga **Agim Gashi** Wed Dec 07, 2011 3:44 pm

“Shko e eja si Adem Peja”

Shkruan: Bajrush Morina

Delegacioni i Kosovës për negociata me Serbinë i kryesuar nga Edita Tahiri ka filluar t’i ngjajë anekdotës popullore për Adem Pejën. Rrugëtimi kot së koti poshtë e lartë i ka dhënë shkas popullit të thurë anekdotën pr Adem Pejën.

Ka disa muaj që delegacioni i Kosovës po shkon në Bruksel e po kthehet nga Brukseli me plot “shportën” me premtime por që në fakt “frytet” e kësaj shporte nuk duken asgjëkund. Tashmë është thënë e njoftuar publikisht zyrtarisht se janë nënshkruar dhe janë arritur disa marrëveshje me palën serbe, por që në fakt asnjëra prej tyre nuk po zbatohet krejtësisht në praktikë. Në fakt nga këto marrëveshje praktikisht ka përfituar vetëm njëra palë, ajo serbe në ndërkohë që falë këtyre marrëveshjeve, Kosova është rimbushur me mallra serbe dhe nëpër rrugët e Kosovës po funksionojnë lirisht veturat nga Serbia me tabela të Serbisë dhe me simbole serbe. Në ndërkohë kompanitë nga Kosova që duhet të kalojnë nëpër Serbi duhet të përgatisin një krah dokumente dhe natyrisht duhet t’i luten zotit që në pikat kufitare të qëllojë ndonjë policë e doganierë serb i cili “e han ryshfetin”. Gjithashtu falë kësaj marrëveshje, në pikat kufitare të Kosovës me Serbinë nuk do të përdoret vula me mbishkrimin “Vula Doganore e Republikës së Kosovës”, por vetëm “Doganat e Kosovës”.
Ndërkaq marrëveshja për tabelat e regjistrimit të veturave falë kësaj marrëveshje Serbia ia ka arritur t’i detyrojë qytetarët e Kosovës që dëshirojnë të udhëtojnë në Serbi t’i kthehen kohës së UNMIK-ut dhe të përdorin tabelat KS e jo RKS, në ndërkohë që Kosova është mbushur me vetura me regjistrim të Serbisë dhe me simbole të shtetit serb. Edhe të ashtuquajturat marrëveshje për kadastra dhe regjistrin civil kanë mbetur marrëveshje “të vdekura” në letër. Serbia nuk ia ka kthyer deri më sot Kosovës as edhe një kopje të vetme të ndonjë ngastre kadastrale apo të ndonjë regjistri civil ndërkaq sa për ato origjinale as që mund të bëhet fjalë, pasi delegacioni i Kosovës është pajtuar dhe ka nënshkruar që Kosovës t’i kthehen vetëm fotokopjet e jo origjinale i këtyre dokumenteve të rëndësishme për shtetin dhe popullin e Kosovës.
Sa për marrëveshjet për njohjen reciproke të diplomave, kjo punë i është lënë në dorë ndonjë institucioni ndërkombëtar i cili do të valorizojë diplomat e studentëve nga Kosova. Por deri më tash as nuk është caktuar institucioni ndërkombëtar dhe nuk dihet se si do të funksionojë në praktikë kjo marrëveshje. Sipas kësaj logjike duket se studentët shqiptarë të Kosovës Lindore të cilët i kryejnë studimet në Universitetin e Prishtinës nëse dëshirojnë të punësohen në institucionet publike në Kosovën Lindore do të duhej të hyjnë në provim të diplomës për të dytën herë, njëherë para profesorëve të Universitetit të Prishtinës e më pas para ekspertëve ndërkombëtarë. Ndërkaq punësimi me këto diploma është një histori tjetër më vete e cila përcillet me njëmijë e një peripeci për çdo student shqiptar që kryen studimet në Prishtinë e që dëshiron të vazhdojë jetën e punën e vet në Preshevë, Bujanovc apo Medvegjë.
Një marrëveshje me plot dyshime e pikëpyetje po interpretohet së fundi edhe kjo për menaxhimin e ashtuquajtur të kufijve. Kështu përderisa vetë kryenegociatorja këtë marrëveshje po e quan shumë të favorshme për Kosovën (ajo të gjitha marrëveshjet e deritashme i ka quajtur të suksesshme dhe sipas znj.Tahiri Brukseli po punon për Kosovën dhe kundër Serbisë!) në ndërkohë që opozita dhe populli i Kosovës shprehin skepticizmin për këtë marrëveshje.
Por çka ka të vërtetë në gjithë këto udhëtime “poshtë e lartë” të delegacionit të Kosovës për në Bruksel? Shprehur me fjalorin humoristik janë udhëtime si “shko e eja si Adem Peja!”
Por shprehur me fjalorin realist, ka një të vërtetë që megjithatë është e dhimbshme, është e dëmshme për shtetin e Kosovës. Përmbajtësisht pothuaja të gjitha marrëveshjet kanë një prejardhje të të ashtuquajturit “6 pikësh të Ban Ki Munit”. Pra të gjitha janë vetëm modifikime me stilin dhe fjalorin evropian por që në fakt janë marrëveshje që legalizojnë 6 pikat e Ban Ki Munit, organizata e të cilit pos që nuk e ka njohur shtetin e Kosovës, vazhdon të këmbëngulë në ruajtjen e regjimit të vet të ashtuquajtur UNMIKISTAN.
Të gjitha marrëveshjet me Serbinë janë marrëveshje për Serbinë. Dhe përderisa ato bëhen për të favorizuar integrimin e Serbisë në BE, si të tilla janë marrëveshje që pengojnë sovranitetin dhe integritetin e Kosovës në mbarë territorin e shtetit.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30