Nxënës shqiptarë nga Suedia për vizitë në Kosovë

Nxënës shqiptarë nga Suedia për vizitë në Kosovë

Njohje dhe shkëmbim përvojash

Në kuadër të një projekti të përbashkët të Ministrisë së Arsimit, të Shkencës dhe të Teknologjisë së Republikës së Kosovës dhe disa asociacioneve arsimore të Suedisë, tash disa ditë në Kosovë po qëndrojnë mbi 50 nxënës dhe mësimdhënës shqiptarë nga Suedia. Këta nxënës, të cilët ndjekin mësimin plotësues në gjuhën amtare shqipe në shkollat e komunave të Halmstadit, Engelholmit dhe të Eslëvit janë nikoqirë të nxënësve të shkollës fillore ”Elena Gjika” dhe të gjimnazit ”Sami Fashëri” të kryeqytetit. Ata, madje janë shpërndarë edhe nëpër klasët e këtyre shkollave dhe bashkarisht ndjekin mësimin. Në këtë mënyrë ata po njohtohen me moshatarët e vet prishtinas, po shkëmbejnë përvoja nga jeta shkollore dhe po ndërtojnë ura të reja të reja afrie e miqësie.
- Edhepse krahasuar me shkollat tona në Suedi, kushtet këtu janë pak sa më ndryshe, megjithate ne po përjetojmë çaste të këndshme, sepse nga do që po sillemi po dëgjojmë gjuhën tonë të ëmbël shqipe, thonë disa nga nxënësit mysafirë.
Shaban Gashi, një mësues veteran që punon në Halmstad dhe i cili është koordinator i këtij projekti, thotë se kjo vizitë ka për qëllim njohjen e nxënësve me Kosovën dhe atdheun e prindërve, ngase shumica e kiëtyre nxënësve kanë lindur, po rriten dhe po shkollohen në Suedi. Natyrisht e gjithë kjo ndikon edhe në kultivimin, ruajtjen dhe pasurimin e gjuhës amtare të këtyre nxënësve mërgimtarë si dhe forcimin e lidhjeve me trojet etnike, thotë ai.
Gjatë këtyre ditëve, përpos aktivitetit të përbashkët nëpër shkolla, nxënësit nga Suedia po vizitojnë edhe monumentet kulturo-historike, institucionet e ndryshme të Republikës së Kosovës dhe po njihen me trashigiminë dhe thesarin kulturor-natyror dhe historik të Kosovës. Ata po i gëzohen zhvillimit të gjithmbarshëm që po përjeton Kosova e lirë. Në bashkëpunim me nikoqirët po shfaqin edhe programe kulturo-zbavitëse si dhe po realizojnë takime të ndryshme dhe relacione me mediat vendore.
Në bazë të agjendës për ditën e sotme (e merkurë, 8 prill) është paraparë që këta nxënës mërgimtarë të jenë mysafirë të moshatarëve të tyre të fshatit Majac të Besijanës, kurse pas dite në Sallën e Kuqe të Pallatit të Rinisë, në Prishtinë do të shfaqin një program special të përbashkët kulturor. Me këtë rast, me një program të posaçëm do të prezantohen nxënësit nga Suedia, pastaj ata të ShF ”Elene Gjika”, Grupi i Qendrës së Fëmijëve të kryeqytetit dhe krijuesit letrarë për fëmijë nga Kosova të njohur si pjestarë të Karvanit të shkrimtarëve.
Ramadan Reshitaj