Veteranët e UÇK-së, kërkojnë respektim vlerash

nga **Agim Gashi** Fri Dec 30, 2011 9:09 pm

Veteranët e UÇK-së, kërkojnë respektim vlerash

Veteranët e ish-Ushtrisë Çlirimtare të Kosovës (UÇK) protestuan para institucioneve të Kosovës në Prishtinë, duke kërkuar rishqyrtimin e Ligjit për vlerat e luftës së UÇK-së. Veteranët kundërshtuan miratimin e këtij ligji, duke thënë se është diskriminues për të gjithë pjesëtarët, veteranët dhe familjet e dëshmorëve.

Kreu i veteranëve, Muharrem Xhemajli kritikoi liderët shtetërorë dhe deputetët. Ai tha se Qeveria i mashtroi, duke e cunguar Ligjin për vlerat e luftës, siç u shpreh ai, kurse ligjvënësit shkelën mbi veteranët kur e votuan ligjin.

“Ne kemi bërë qindra takime me institucionet e vendit për ligjin, ishim pjesë përbërëse e komisionin përkatës për hartimin e këtij projekt-ligji dhe i kemi harmonizuar qëndrimet rreth tij. Në momentin e fundit, nga ana e Qeverisë është sakatuar ligji. Ne kemi pasur një shpresë te deputetët e Kuvendit se ata nuk do ta pranojnë ligjin dhe do ta kthejnë prapë në Qeveri, në mënyrë që të bëhet një ligj që do t’i plotësonte të gjitha nevojat dhe kërkesat tona”, tha ai.

Veteranët në lidhje me këtë ligj kritikuan edhe presidenten e Kosovës. Këshilli drejtues i këtyre organizatave, pas miratimit të këtij ligji, kishte kërkuar nga presidentja Atifete Jahjaga që të marrë parasysh kërkesën e kryesisë së OVL të UÇK-së, për mos-nënshkrim të ligjit dhe kthimin e tij për rishqyrtim në Kuvend. Por, një gjë e tillë, sipas Xhemajlit, nuk ka ndodhur.

“Fatkeqësisht edhe presidentja, me moskthimin e këtij ligji në Kuvendin e Kosovës, tregoi që nuk është faktor uniteti ashtu siç duhet të jetë, por tregoi që është kukull dhe është vetëm një mjet i politikës vendore dhe asaj ndërkombëtare”, vlerësoi Xhemajli, i cili paralajmëroi se veteranët nuk do të ndalen derisa ta ndryshojnë Ligjin për vlerat e luftës.

Gjithashtu Xhemajli ia bëri me dije kryeministrit Thaçi dhe të gjithë atyre që cunguan ligjin, se lufta e UÇK-së ka nisur shumë vjet para ‘97-s.

“Nuk është çështja vetëm te beneficionet që ne po kërkojmë. Por, me këtë ligj është bërë mohimi i një pjese të historisë së luftës së lavdishme të UÇK-së në kohën e përkufizimit në periudhën kohore 1997-’99; është bërë mohimi i disa dëshmorëve të luftës së UÇK-së. Dihet botërisht se UÇK-ja ka filluar aktivitetin e saj shumë më herët se në vitin 1997”.

Deputetët e Kuvendit të Kosovës, me gjithë vërejtjet e paraqitura, në një seancë plenare kanë miratuar Ligjin për statusin dhe të drejtat e dëshmorëve, invalidëve dhe veteranëve të UÇK-ë, viktimave civile dhe familjeve të tyre.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30