Prof. Neki Babamusta:I dua fëmijët e mi, por, më shumë dua Atdheun!

nga **Agim Gashi** Sun Jan 08, 2012 3:51 pm

I dua fëmijët e mi, por, më shumë dua Atdheun!

Prof. Neki Babamusta:I dua fëmijët e mi, por, më shumë dua Atdheun! Neki-Babamusta

Nga: Prof. Neki Babamusta Londër
Prof. Neki Babamusta:I dua fëmijët e mi, por, më shumë dua Atdheun! Vendlindja

Mall larg atdheut

Këto ishin fjalët – hymn lavdie, i patriotit democrat Dr. Et-hem Carës, para skuadrës së egzekutimit të gestapos gjermane (shtator 1944), të drejtuar nga një gjeneral e-ss, i kërcënuar për vdekje.
Në mesnatë, si rrethuan shtëpinë, gestapovitët morën katër fëmijët nga gjumi duke ia rrëmbyer prindërve dhe i vendosën përballë skuadrës së vdekjes. Gjenerali gjakatar lexoi ultimatumin: Dorëzo thesarin e arit! ... Fyhreri ynë i madh, Adolf Hitler, do të vendos rendin e ri në botë! ...
Ndërkohë tytat e automatikëve u drejtuan pranë kokave së fëmijëve. E ëma, nënë Zilja, motra e patriotit Sulejman Karkini nga Kosova, u doli përpara vocarakëve të saj, duke iu afruar pranë burrit të saj Et-hemit.
Një Shote Galicë nga Kosova dhe një tribun liberator nga Shqipëria, sfiduan vdekjen. Et-hemi, duke përjetuar çaste egërsie satanike, e shikon si zhgabojë arbri gjeneralin dhe përgjigjet:
“Kultura gjermane na ka edukuar që të mbrojmë të vërtetën të mos gënjejmë dhe të mos e tradhëtojmë Atdheun! ...”
Et-hemi, si mbaroi studimet e para në vendlindje në Kavajë, me pasion për dijen, i nxitur nga prindërit dhe fisi i tij patriotik, vazhdon studimet e larta në Austri. Në Universitetin e Vjenës, mbaron shkëlqyeshëm për financë. Me studimet dhe hulumtimet e tij në fushën e ekonomisë, fiton titullin e lartë “Doktor i Shkencave Ekonomike”.
Ndërsa autoritetet e larta arsimore në Austri, i kërkuan që të shërbente në vendin e tyre, me bindje prej patrioti, me 1928 parapëlqeu të kthehej në Shqipëri, duke kultivuar në Atdhe, shkëlqimin evropian të kulturës Austriake. Punon me vetmohim për disa vite në Ministrinë e Arsimit dhe në kohën e luftës qe në krye të Dikasterit të Financës.
Në kohën e ish Mbretit Zog I dhe më vonë, ndihmon për fuqizimin dhe modernizimin e arsimit shqip për forcimin e ekonomisë, duke vendosur rregulla efikase ndaj shkeljeve abuzive.
Në mesin e tetorit 1943 forcat gjermane, me elementë spiun, grumbulluan tek gazermat e Kavajës afro 2000 vetë, për t’i nisur drejt burgut të Tiranës. Duke bashkërenduar veprimet me shokun e tij të ngushtë, profesor Ibrahim Babamusta, dhe me ndërmjetës, nacionalistin Nazim bej Alltuni, në burgun e Tiranës dërgohen vetëm 200 vetë. Së bashku me elementë patriot-demokratë të Tiranës, që të dy, Et-hemi dhe Ibrahimi, bëjnë të mundur arratisjen e shumicës. Në kampin famëkeq të Mat – Hauzenit, nisen vetëm 20 vetë, ku mbeten martirë nëpër furrat e vdekjes.
Ndriçimi i Perëndimit ishte perde verbuese për Komunizmin. Et-hemi arrestohet nga Sigurimi i Shtetit nga fundi i vitit 1944 me akuzën: “element i rrezikshëm për diktaturën e proletariatit, me ide perëndimore antikomuniste...” duke e dënuar me 101 vjet burgim.
Varfëria dhe stërmundimet ishin të tej skajshme për familjen e këtij persekutuari. Para këtyre vuajtjeve, heroina nënë Zilja, qëndronte në këmbë. Edukoi dhe rriti katër fëmijët me një mijë e një mundime. Me lot në zemër ajo përballoi edhe arrestimin e nipit të saj, intelektualit antikomunist, Sami Karkini.
Familja dhe fisi i Sulejman Karkinit kishin ardhur nga Kosova pas viteve 1920 në Shqipëri, si rezultat i përndjekjeve të pushtuesve serb. Sulejmani dhe të gjithë të afërmit e tij, luftuan kundër serbëve, duke qenë përkrah çetës së luftëtarit hero Azem Galica. Në Kavajë fisi Karkini ka dhënë një ndihmesë shumë të çmuar për çështjen e arsimit tonë kombëtar.
Nga fundi i vitit 1954, ish Kryeministri i Shqipërisë komuniste, Mehmet Shehu, shkon për vizitë në burgun famëkeq të Burrelit. Me sy tigri rastësisht shikon Et-hemin në korridorin e burgut me një libër në dorë. E ndal dhe i thotë: “Po ti, këtu!” – duke bërë me ironi rolin e të paditurit.
“Eh, po, këtu më keni prurë Ju!... – i përgjigjet Et-hemi.”
Skenë e çuditshme: Dy botë, dy ide, diametralisht të kundërta – një lider vrasës komunist, që për ide boshe çmendurie, për pushtet kish degdisur në burg një tjetër shqipe arbri, që i kish bërë shërbime tepër të çmuara kombit të vet, duke shpëtuar edhe dhjetëra jetë njerëzish. Nuk mund të ndërtosh lumturinë tënde duke u shkaktuar fatkeqësi tragjike të tjerëve.
Dhe teksa dëgjon rrëfimin e ish nacionalistit z. Halit Dervishi (i shpallur Armik i Popullit nga Diktatura) se në Çermë të Lushnjes, në tetor 1944, me brigadën e tij të parë, egzekuton mbi 70 nacionalistë të pafajshëm, që iu dorëzuan komandës së kësaj brigade. Ata pushkatohen të gjithë në vend. Kavajën, Mehmet Shehu e kishte epiketuar qendër reaksioni, duke shtrembëruar realitetin historik se peshën më të madhe të luftës në Pezë, me veshje, ushqime dhe para e mbajti populli i Kavajës me gjithe fshatërat e tij.
Persekutimi komunist ja shkurtoi jetën këtij shkenctari, duke u ndarë nga jeta para kohe. Demokracinë Perëndimore, për Shqipëri të lirë, dhe demokratike, Dr. Et-hem Cara nuk arriti ta shijonte.
Disa herë kam patur fatin të bisedoja me Dr. Et-hemin, njeriun patriot dhe shkencëtarin e madh me ndjenjën dhe shpirtin e një humanisti, i cili gjithmonë më këshillonte si djalin e tij. Pasi doli nga një burgim i gjatë, pata rastin ta takoj sërish në vitin 1970 dhe më këshilloi: “Askush s’e ka të garantuar lumturinë!... Por të punosh për Kombin tënd, për jetët njerëzore, ja vlen edhe të sakrifikohesh! Ke kujdes nga Sigurimi famëkeq i shtetit!”

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30