Berisha: Kongresi i Lushnjës, kongresi i shpëtimit kombëtar (video)

nga **Agim Gashi** Sat Jan 21, 2012 6:16 pm

Berisha: Kongresi i Lushnjës, kongresi i shpëtimit kombëtar

Kryeministri në ceremoninë për 92 vjetorin e Kongresit të Lushnjës

Qyteti i Lushnjës nisi kremtimet e vitit të 100 vjetorit të Pavarësisë me përkujtimin e Kongresit të Kushnjës, të mbajtur në këtë qytet më 21 janar të 92 viteve më parë. Kryeministri Berisha ishte sot i pranishëm në këtë qytet, ku mori pjesë në ceremonitë festive në nderim të 92 vjetorit të këtij Kongresi, Kongres që vuri themelet e shtetit modern shqiptar.
Ceremonitë festive organizoheshin nga Bashkia Lushnjë dhe Ministria e Kulturës, Rinisë dhe Sporteve, me pjesëmarrjen e trupës së Teatrit të Operës dhe Baletit dhe Ansamblit Popullor. Të pranishëm në këto veprimtari ishin edhe Kryetarja e Kuvendit Jozefina Topalli, ministri i Turizmit, Kulturës, Rinisë dhe Sporteve Aldo Bumci, deputetë të Kuvendit, personalitete të njohura dhe përfaqësues nga familje të shquara që kontribuan në organizimin e Kongresit të Lushnjës, etj.

Fillimisht, Kryeministri Berisha u prit në një takim mirëseardhjeje nga Kryetari i Bashkisë së Lushnjës Fatos Tushaj, ku ishte i pranishem edhe deputeti socialist Bashkim Fino. Kryeministri Berisha shfrytëzoi këtë rast për të uruar gjithë qytetarët e Lushnjës por dhe gjithë shqiptarët gëzuar këtë përkujtimi për Kongresin e Lushnjës .“Ne kremtojmë sot 92 vjetorin e kësaj ngjarjeje, e cila për nga rëndësia jetike për shqiptarët, qëndron krahas Lidhjes së Prizrenit dhe shpalljes së Pavarësisë dhe kjo përbën një nga ngjarjet më themelore në historinë kombëtare të shqiptarëve për të formuar shtetin e tyre”, u shpreh Kryeministri.
Kryeministri nënvizoi se ishte Lushnja ajo që ngriti në këmbë një Shqipëri të shtrirë përdhe, një Shqipëri që ishte parashikuar dhe përcaktuar që të zhdukej nga harta e historisë së Evropës. Në këtë kontekst, theksoi ai, ne e kemi nderuar dhe do ta nderojmë gjithnjë këtë ditë.
Gjithashtu, në kuadër të ceremonive festive për 92 vjetorin e Kongresit të Lushnjës, Kryeministri Berisha bëri një vizitë në Shtëpinë Muze “Kongresi i Lushnjës” aty ku zhvilloi punimet Kongresi Kombëtar. Kryeministri u shpreh se pasuria kombëtare që gjendet në këtë muze na tregon për madhështinë e kësaj dite, e këtij Kongresi, i cili më shumë se çdo gjë tjetër mund dhe meriton të vlerësohet si Kongresi shpëtimtar i Shqipërisë dhe kombit shqiptar.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30