Mbreti Leka I: Kosova dhe Shqipëria janë një

Mbreti Leka I: Kosova dhe Shqipëria janë një

Albulena Neziri, Bota Sot
Integrimi në BE do të bashkojë përfundimisht Kosovën dhe Shqipërinë pavarësisht, se disa shteteve kjo nuk do t’i pëlqejë, deklaroi Mbreti shqiptar Leka I.



“Unë besoj se do të ketë një rezistencë nga shtet e BE-së që të ndryshojnë kufijtë, por një vizë në një hartë nuk është një ndryshim i madh. A hynë Kosova dhe Shqipëria në BE si dy shtete, a si një, nuk është ndonjë ndryshim i madh. Unë besojë se është e bashkuar, automatikisht është e bashkuara, është si dy gishta në një dorë”, tha Mbreti.


Kosova dhe Shqipëria janë bashkuar, dhe ato tashmë janë të ndara vetëm nga vizat në harta, ndërsa me hyrjen në NATO, zgjerimi ka ndodhur, vlerësoi të dielën në Prishtinë, mbreti shqiptar Leka I.
“Anëtarësimin e Shqipërisë në NATO-së dhe pavarësinë e Kosovës e quaj një vepër shumë të madhe, hyrjen tonë në NATO. Arsyeja është e thjeshtë, ky është një zgjerim i kufijve edhe do të jap zhvillim patjetër brenda Shqipërisë, sepse NATO nuk është vetëm një organizatë ushtarake, po është edhe një organizatë politike, që do të ketë zhvillime nga kjo”, tha Mbreti Leka I. Duke folur në vizitën e tij të parë pas Pavarësinë së Kosovës, Mbreti Leka I, tha se ky akt për të ishte një gëzim i madh. “Për sa i takon pavarësisë së Kosovës është gëzimi më i madh që mund ta ketë njeriu, kur erdh ajo ditë”, tha Mbreti Leka I. Ai tha se bashkimi do të bëhet fillimisht me anë të interesit të tregtisë, si dhe në mes të lidhjeve shoqërore e vëllazërore që kanë dyja vendet. Ai tha se beson se edhe Kosova do të hyjë në NATO dhe në Bashkimin Evropian. I pyetur se si e sheh Kosovën dhe Shqipërinë, të bashkuara apo si dy shtet të ndara, Mbreti Leka I tha se këto dy vende janë të ndara vetëm në hartë. “Unë besoj se do të ketë një rezistencë nga shtet e BE-së që të ndryshojnë kufijtë, por një vizë në një hartë nuk është një ndryshim i madh. A hynë Kosova dhe Shqipëria në BE si dy shtete, a si një, nuk është ndonjë ndryshim i madh. Unë besojë se është e bashkuar, automatikisht është e bashkuara, është si dy gishta në një dorë”, tha Mbreti. Duke folur për zhvillimet pas pavarësisë së Kosovës, Mbreti Leka I tha se në përgjithësi ka lëvizje pozitive. Ndërsa, Princi Leka, djali i Mbretit, duke folur rreth njohjeve të shtetit të Kosovës, tha se shumë shpejtë Kosovën do ta njohin edhe shtet tjera, duke premtuar se do të lobojë deri në Afrikën e Jugut që ky vend ta njoh pavarësinë e Kosovës.
Në këtë shtet për disa vjet ka jetuar familje mbretërore, para se të vendoste të kthehej në Shqipëri, kur iu mundësua kthimi. “Ne kemi qenë të detyruar të largohemi nga Afrika e Jugut, e cila ka qenë kundër pavarësisë së Kosovës, kjo fatkeqësisht ka krijuar mjaftë pengesë, por jam i bindur se me komunikimin e vazhdueshëm jemi në proces të ngritjes së një lobimi shqiptarë edhe pse për momentin nuk është aq i fuqishëm siç e kemi ne”, tha Princi Leka. Ai tha se për pavarësinë e Kosovës ka lobuar edhe gjatë Konferencës Islamike. “Ne kemi marrë përgjigje pozitive nga shumica e shteteve që janë, sidomos në Konferencën Islamike. Ne vazhdojmë lobimin tonë për pavarësinë e Kosovës, por është një proces që nënkupton se do të ketë mjaftë influenca. Por, unë e them se njohja e pavarësisë së Kosovës është duke ecur përpara dhe besoj se së shpejti do të shikojmë që edhe më shumë shtete do ta njohin Kosovën me të gjithë të drejtën e vet, legjitimitetin e saj në të gjitha aspektet ligjore botërore”, tha Princi Leka.
Në ditën e parë të vizitës tri ditëshe në Kosovë Mbreti Leka I do të vizitojë familjen Rugova, familjen Jasharaj në Prekaz dhe familjen e Haradinajt në Gllogjan. Gjatë ditës së dytë, Mbreti Leka I do të takojë krerët me të lartë të shtetit, presidentin Fatmir Sejdiu, kryeministrin Hashim Thaçin, kryekuvendarin Jakup Krasniqin si dhe përfaqësuesit e partive politike.