Bajrush Morina:SHIK-istat i hapin dosjet e veta të krimeve në Kosovë

nga **Agim Gashi** Fri Feb 03, 2012 10:54 pm

SHIK-istat i hapin dosjet e veta të krimeve në Kosovë

Bajrush Morina:SHIK-istat i hapin dosjet e veta të krimeve në Kosovë Bajrush-morina

Shkruan Bajrush Morina

Këtu e dhjetë vjet më parë ka qenë gazeta kombëtare “Bota sot” dhe gazetarët e saj që kanë shkruar dhe kanë ofruar dëshmi për veprimtarinë e SHIK-ut? Për disa vjet rresht kemi pyetur publikisht, kush janë krerët e SHIK-ut në Kosovë, cila është veprimtaria kriminale e SHIK-ut në Kosovë, a ka gisht SHIK-u në vrasjet politike ndaj veprimtarëve shqiptarë pas luftës në Kosovë, pse nuk po zbulohen veprimtarinë kriminale të SHIK-ut në kohën e pasluftës etj etj.

Pra janë me dhjetëra e mbase qindra shkrime që janë shkruar e botuar në gazetën “Bota sot” në ndërkohë që elementë të burokracisë së UNMIK-ut të atëhershëm të lidhura me struktura nëntokësore vendore (pse jo edhe me elementë të SHIK-ut) pos që e dënonin me dënime drakonike gazetën “Bota sot” ndërmerrnin edhe shantazhe të ndryshme kundër stafit ë redaksisë duke i kërcënuar e madje edhe duke i vrarë.

Në gazetarinë e përgjakur të pasluftës janë vetëm dy gazetarë të gazetës kombëtare “Bota sot” Bekim Kastrati dhe Bardhyl Ajeti të cilët janë vrarë dhe vrasësit e këtyre dy kolegëve tanë edhe sot e kësaj dite janë në liri. Ne i gëzohemi faktit se në Kosovën e pasluftës nuk u vranë edhe gazetarë të tjerë të mediumeve të tjera, por ka pasur edhe kolegë të disa mediumeve në Kosovë që “bëheshin bashkë’ me UNMIK-un dhe nëntokën e Kosovës dhe sulmonin gazetën “Bota sot” sepse kjo gazetë kërkonte me ngulm që të zbulohen të gjitha vrasjet e pasluftës në Kosovë, që të arrestohen e të gjykohen kriminelët dhe që të zbulohet aktiviteti i dyshimtë i Shërbimit Informativ të Kosovës në vitet e pasluftës?
Por të gjitha këto pyetje tona kanë mbetur pa përgjigje. Ata që e dinin përgjigjen ose atëbotë nuk guxonin ta thonin të vërtetën, ose ishin pjesë e këtyre veprimeve kriminale.
Trembëdhjetë pas përfundimit të luftës në Kosovë, zyrtarë të lartë të SHIK-ut kanë nisur t’i hapin dosjet e tyre me vullnet e me dëshirë.
I pari që pati guximin të pranojë publikisht për pjesëmarrjen e tij në më shumë se 17 raste të kërcënimeve, shantazheve dhe vrasjeve me urdhër të krerëve të SHIK-ut ishte Nazim Bllaca. Duke “e legjitimuar” veten me letërnjoftim, Nazim Bllaca doli para kamerave dhe tha se ka qenë pjesëtarë i SHIK-ut, se kam marrë urdhra nga shefat e mëdhenj të SHIK-ut për të kryer aktivitete kriminale dhe se vet ka qenë një prej atyre që edhe ka vrarë njerëz pas lufte.
Paraprakisht ishin deputetët Adem Salihaj e Gani Geci që e “dekonspiruan” këtë pjesëtarë të SHIK-ut duke u ofruar deputetëve edhe incizimet “live” të dëshmisë së Nazim Bllacsës për aktivitetin kriminale të tij e të SHIK-ut në Kosovë.

Në ndërkohë kohëve të fundit ka shpërthyer një konflikt në mes të vetë ish-zyrtarë të lartë të SHIK-ut apo ish- bashkëluftëtarë e bashkëzyrtarë të shërbimeve të fshehta të kohës së luftës e pas saj, të cilët pos që janë bërë “pikë e pesë” nëpër parti politike, janë duke u bërë “copë-copë” në mes vete se kush di më shumë për veprimtarinë kriminale të SHIK-ut apo kush ka më shumë dosje për aktivitetet e pasluftës së SHIK-ut. Këta “komandantë” të deridjeshëm të UÇK-së e ish-zyrtarë të SHIK-ut që sot janë në poste deputetësh, po e shfrytëzojnë foltoren e Kuvendit për t’i shitur njëri-tjetrit trimëri e për t’u krenuar me veprimtarinë e tyre “shkiste” në stilin se “unë di gjithçka për ty” apo se “ti nuk di asgjë për mua!”.

Pra kjo kategori e SHIK-istave në Kuvend janë duke u shtyrë si “buajt në zgjedhë” se cili është “më i forti” se cili “është më i dijshmi”. Në këtë “dialog parlamentar” të tyre, ata, me ose pa qëllim po i hapin ‘dosjet” e tyre dhe të shërbimit të tyre që quhet SHIK e që zyrtarisht përfundoi veprimtarinë më 15 qershor por që praktikisht po del se ende është “i gjallë”.
Një fjalë e urtë popullore thotë” Mos i pyet se të kallëzojnë vetë!”
Zyrtarët e lartë të SHIK-ut duket se me një vonesë gati dhjetëvjeçare kanë filluar t’u përgjigjen pyetjeve tona për veprimtarinë kriminale të SHIK-ut të pasluftës.
Ata po flasin vetë!
Ata po i hapin dosje te tyre vetë!
Po i presim me padurim përgjigjet e politikave të sotëm për veprimtarinë e tyre të djeshme në “uniformë” të SHIK-ut.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30