RDK e quan marrëveshjen goditje për Kosovën

nga **Agim Gashi** Sat Feb 25, 2012 8:56 pm

RDK e quan marrëveshjen goditje për Kosovën

Në Maqedoni, partia shqiptare në opozitë, Rilindja Demokratike Kombëtare (RDK), ka reaguar kundër marrëveshjes së fundit të arritur midis Prishtinës dhe Beogradit.

"Negociatat në mes të Prishtinës dhe Beogradit të udhëhequra nga Brukseli zyrtar, edhe pse formalisht të cilësuara si negociata teknike, në esencë ishin dhe prodhuan një rezultat tërësisht politik që u promovua si marrëveshje historike në mes të Beogradit dhe të Prishtinës. Fakti që qeveria e Kosovës pranoi të heq dorë nga atributi Republikë dhe të shënojë rezolutën 1244 në fusnotë të emrit të Kosovës, argumenton bindshëm se nga kjo marrëveshje, fituese e vetme është Serbia. Me këtë marrëveshje degradohet përmbajtësisht pavarësia e Kosovës e shpallur më 17 shkurt të vitit 2008 dhe destimulohen njohjet e reja të shtetit të Kosovës dhe inkuadrimi i Kosovës si shtet i pavarur në Kombet e Bashkuara dhe në institucionet tjera të rëndësishme ndërkombëtare. Ajo që është shumë e rëndësishme për tu konstatuar në këtë rast, është ndërrimi thelbësor i qëndrimit të faktorit relevant ndërkombëtar në raport me shtetin e ri të Kosovës dhe favorizimin e argumenteve të shtetit serb", thekson në reagimin e saj Rilindja Demokratike Kombëtare (RDK).

Sipas kësaj partie, "duke goditur rëndë shtetësinë e re të Kosovës dhe duke favorizuar Serbinë nëpërmjet ofrimit të statusit të vendit kandidat për në BE, faktori ndërkombëtar goditi rëndë politikat qeveritare të Prishtinës që identifikohen me korrupsion dhe krim të organizuar, por njëkohësisht pa të drejtë ndëshkoi rëndë qytetarët e Kosovës , sepse përveç përfaqësimit rajonal nuk u ofroi asnjë të drejtë në kuptim të liberalizimit të vizave dhe avancimit të procesit të integrimit të Kosovës".

"Se kjo marrëveshje do të ketë reperkusione afatgjate negative në sovranitetin e Republikës së Kosovës dhe integrimin e sajë si shtet i pavarur në strukturat euroatlantike, institucionet e Kosovës, partitë politike dhe qytetarët e Kosovës duhet të marrin si shembull marrëveshjen e arritur të Shkupit me Athinën për emrin e Maqedonisë (IJRM), marrëveshje kjo që tashmë është bërë pengesë kryesore për integrimin e Maqedonisë në NATO dhe në BE", thekson kjo parti.

Rilindja Demokratike Kombëtare është e bindur se Parlamenti i Kosovës dhe i gjithë spektri politik dhe civil i Kosovës do të jenë unik në shfuqizimin e këtij pakti në Parlamentin e Kosovës, sepse kjo marrëveshje degradon përmbajtësisht pavarësinë e Republikës së Kosovës.

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31