Partia e Topit, lindi FRD. Oketa: Përfaqësojmë shtresën e mesme

nga **Agim Gashi** Mon Apr 30, 2012 3:32 pm

Partia e Topit, lindi FRD. Oketa: Përfaqësojmë shtresën e mesme

Lindi sot partia Fryma e Re Demokratie (FRD), partia për të cilën diskutohet gjerësisht se pas korrikut do të drejtohet nga Bamir Topi, sapo ai të largohet nga posti i Kreut të Shtetit.

Sot në selinë e FRD, në një sallë pranë sheshit Xhorxh Bush ku ndodhet godina e kësaj partie, u prezantua vetëm grupi nismëtar i FRD dhe platforma e këtij subjekti. Grupi nismetar i kesaj partie perbehet me kryetar Gazmend Oketa, me anetare Aleksander Biberaj dhe Andi Seferi.

Pasi të pranishmit kanë dëgjuar himnin kombëtar, deputeti aktual (i shkeputur nga PD) ne Kuvend, Gazmend Oketa u prezantua si kryetari i grupit nismetar i FRD. Në deklaratën e parë zyrtare, Oketa theksoi se “Fryma e re Demokratike” do të jetë një parti e qëndrës së djathtë, mishëruese e idealeve liberale.

“Doja t’a përuronim sot në shtëpinë tonë, na falni për sallën e vogël. Jam këtu të bëj deklaratën e parë zyrtare këtu të grupit nismëtar të partisë Fryma e Re Demokratike (FRD). Sic jemi bërë me vetëdije, është ngritur grupi nismëtar, ky grup ka për qëllim të bëjë përgatitjet e nevojshme me zyrtarizimin e partisë fryma e re demokratike”, tha Oketa.

Sipas Oketës, FRD do të zgjedhë strukturat drejtuese në muajin Shtator. "Kongresi i partisë të mblidhet në vjeshtën e këtij viti, ne shtator dhe kreu i kësaj force politike do të zgjidhet sipas parimit një anëtar një votë".

Synimi i FRD, tha Oketa do të jetë funksionimi i demokracisë në vend, prioritet rinia, kurse partia theksoi ai do të përfaqësojë konkretisht shtresën e mesme të shqiptarëve.

“Nga sot do të nisim një fushatë të hapur intensive me mbarë shoqërinë shqiptare me synimin kryesor funksionimin e demokracisë”.

“Prioritet kemi rininë sepse janë pasuria më e madhe demokratike. Do bashkëpunojmë fort me forcën vitale të shoqërisë shqiptare. Do jemi një parti që do të rinisë për të ngjallur shpresën e vrarë duke i hapur asaj rrugën për të ardhmen”.

“Ne do të përfaqësojmë interesat e shtresës së mesme të qytetarëve. Përfaqësojmë ata. Kjo shtresë e ngritur me shumë mund por kjo shtresë nuk është përfaqësuar asnjëherë denjësisht nga asnjë parti. Mentaliteti i kësaj shtrese që nuk ka lidhje me të kaluarën e komuniste nuk përfaqësohet në programet e PD apo PS”, tha ai.

FRD, tha Oketa do të ndihmojë në cështjen e pazgjidhur të pronave dhe në kauzën e ish-të përndjekurve politike.
“Përfshihemi në këto kauza, por jo për qëllime elektorale”.

Kreu i grupit nismëtar, Gazmend Oketa e la të hapur mundësinë që në FRD të ketë edhe figura të tjera nga grupi parlamentar i PD-së, kur tha se, i ka bërë ftesë cdo qytetari shqiptar që do të gjejë veten tek kjo forcë e re.
“Këtu jemi për piketat kryesore, për krijimin e kësaj partie. Unë i bëra thirrje cdo qytetari të bashkohet me ne, nuk ka rëndësi nëse është qytetar i thjeshtë, apo deputet. Nëse gjen veten këtu mund të mbështetet”, theksoi ai.

Oketa shpjegoi për gazetarët se FRD është një parti me frymë pozitiviste, e cila do ketë në vëmendje të saj zhvillimin dhe progresin e vendit.
“Ne kemi vullnet dhe angazhim për të përmirësuar gjendjen ekonomike. Jemi një parti me një frymë pozitiviste, pro zhvillimit dhe progresit, mbështesim iniciativat që i vijnë në ndihmë jetës së qytetarëve”, tha ai.

Sipas Oketës, Kuvendi Zgjedhor i kësaj partie do të mbahet në vjeshtën e këtij viti, ndërsa i pyetur në lidhje me prezencën e Bamir Topit, Oketa nënvizoi se ai është ende president i Shqipërisë deri në muajin korrik. Por kjo nuk e përjashton mundësinë që Topi të vihet në krye të FRD, pasi afatet kohore të zgjedhjes së Kuvendit Zgjedhor përkojnë me kohën e mbarimit të mandatit të Presidentit Topi.
Grupi nismetar vijoi me pas me anetaresimet e reja ne parti.

* * * * * *

Merr jetë partia më e re e qendrës së djathtë, e njohur si partia e Bamir Topit. Ajo do të quhet Fryma e Re Demokratike dhe sipas një njoftimi të grupit nismëtar të kësaj force të re politike, prezantimi i saj do të bëhet ditën sot, në selinë e saj në rrugën “Xhorxh W Bush”. Ndërsa dje ka përfunduar edhe stampimi i logos së partisë më të re, e cila mban ngjyrën blu.

Në një njoftim të shpërndarë sot për mediat, thuhet se “Ditën e hënë më dt 30.4.2012 në orën 12:00 në selinë e FRD, do të organizohet aktiviteti prezantues për shpalljen e kësaj nisme të re politike. Ftohen mediat elektronike e të shkruara për të marrë pjesë në këtë atktivitet”.

Mësohet se, deputeti Gazmend Oketa dhe ish-deputeti Aleksandër Biberaj do të jenë nismëtarët e parë të kësaj partie, ndërkohë që flitet se në përfundim të mandatit të tij presidencial, kryetar i saj do të zgjidhet, Bamir Topi.

Sipas burimeve të “Gazeta Shqiptare”, kjo parti do të drejtohet nga këshilli drejtues, çka lë të kuptohet se zgjedhjet e strukturës së partisë do të bëhen nga shtatori, atëherë kur edhe presidenti i vendit Bamir Topi, të jetë totalisht i lirë për tu përfshirë në politikë. Megjithatë piketat bazë të funksionimit të partisë së re, duket se janë fiksuar.

Kështu në status thuhet se kryetari do të zgjidhet me parimin një anëtar, një votë. Kryetari i Partisë dhe krerët e rretheve nuk do të marrin më shumë se dy mandate, ndërkohë që ministrat nuk do të kenë post politik në parti. Sipas burimeve FRD do të jetë një parti e lirë ku do të lejohen zërat kundër, ndryshe nga Partia Demokratike, pjesë e së cilës kanë qenë edhe drejtuesit e FRD-së.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30