Topi nderon veprën e udhëheqësit historik të Kosovës, Ibrahim Rugova

nga **Agim Gashi** Sat Jun 30, 2012 4:45 pm

Topi nderon veprën e udhëheqësit historik të Kosovës, Ibrahim Rugova

Presidenti i Republikës, Prof. Dr. Bamir Topi, i shoqëruar nga Zonja e Parë, Teuta Topi, përkujtoi dhe nderoi sot veprën dhe rolin e jashtëzakonshëm të udhëheqësit historik dhe arkitektit të Pavarësisë të Kosovës, ish-Presidentit Ibrahim Rugova, duke u përulur me respekt të thellë dhe duke vendosur një kurorë me lule pranë varrit të tij, në lagjen ‘Velania’ në Prishtinë.

Në këtë ceremoni përkujtimore, Presidenti Topi shoqërohej nga Presidentja e Republikës së Kosovës, Atifete Jahjaga, drejtues të lartë të institucioneve të Kosovës, familjarë të Presidentit Rugova, drejtues të partive politike, si dhe nga delegacionet zyrtare përkatëse të dy drejtuesve të lartë shtetërorë.

Në vijim të agjendës zyrtare, Kreu i Shtetit, zhvilloi një vizitë në shtëpinë e ish-Presidentit të Kosovës, Ibrahim Rugova, ku u prit nga bashkëshortja, fëmijët dhe familjarët e tij. Gjatë bashkëbisedimit me ta, Kreu i shtetit shqiptar foli për kontributin e madh që lideri historik i Kosovës, dr. Ibrahim Rugova dha për popullin dhe shtetin e tij, duke nënvizuar se “megjithëse janë mbushur gjashtë vjet nga humbja e madhe e jetës së vizionarit që rrezatoi vetëm mençuri, mirësi dhe optimizëm, që udhëhoqi lëvizjen e fuqishme gjithëpopullore demokratike për lirinë dhe pavarësinë e Kosovës, vlerat e papërsëritshme të ish-Presidentit Rugova, njeriut që bëri epokë, kanë qenë dhe do të jenë një udhërrëfyes i shkëlqyer për të gjithë brezat e ardhshëm”, duke shtuar gjithashtu se “me durimin dhe me përkushtimin e tij të jashtëzakonshëm, lideri historik i Kosovës, dr. Rugova i hapi rrugën proceseve demokratike në Kosovë, pavarësisë së saj, që sot janë realitet i qartë i përpjekjeve të mëtejshme të forcimit të shtetit të ri dhe realizimit të synimeve të përbashkëta euroatlantike”.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30