PREND BUZHALA:Mësimi i miqësisë

nga **Agim Gashi** Thu Jul 05, 2012 12:48 am

Mësimi i miqësisë

(Ose mbi miqësinë mes shqiptarëve dhe amerikanëve)

Shkruan:PREND BUZHALA

“Zoti i krijon miqtë. Zoti e sjell mikun te miku”, thoshte Platoni i moçëm. Së këndejmi, Epoka Moderne shpalosi një miqësi që ka zënë të bëhet proverbiale, Kult dhe Mit modern: shqiptarët dhe amerikanët janë miq; shqiptarët janë populli më proamerikan në botë. E pra, shqiptarët dinë ta çmojnë ndihmën e solidaritetin e tjetrit; dinë të jenë falënderues, vlera, këto, që ngrihen në thesare popujsh, sikundër është miqësia. Te e fundit, të mos harrohet: në Epokën Moderne, sidomos gjatë shekullit XX, nuk ka ngjarje a kthesa ndryshimesh historike, në përmasa planetare, të cilave të mos u ketë dhënë vulë SHBA-ja. Pse të mos e themi: SHBA-ja janë amë e mami e historisë më të re, tek iu ka dhënë pamje kaheve historike, rrjedhave shoqërore, avancimit të lirisë së popujve, rendit demokratik, revolucionit modern të lirive dhe të drejtave njerëzore e kapitujve të tjerë të civilizimit bashkëkohor. I ka dhënë pamjen e refleksit të ndryshimeve Politikës, Ekonomisë, Progresit, Dijes, Shtetit, Aleancave, Tregut, Zhvillimit etj etj. Nëse është thënë që moti se miqësia është nënë e të gjitha virtyteve, atëherë nuk është e rastit pse te ky virtyt edhe shqiptarët e Kosovës duan të sintetizojnë gjithçka që është e mirë. E pra, SHBA-të ndërhynë gjatë luftës, duke e tërhequr më vete Qerren Njerëzore të Lirisë e Demokracisë: e dëbuan Serbinë nga Kosova, kurse tani, pas tërbimit antishqiptar rus, edhe njëherë na gjenden pranë për të na dhënë shpresë se ata, miqtë tanë, janë këtu.

"Miku i mirë njihet në kohë të vështirë", thoshte populli ynë. Mësimi i madh historik i kësaj miqësie është sprovë e madhe historike, e mësuar nga vuajtjet dhe kapërcimi i tyre; kemi mësuar se, vërtet, për ta zgjidhur problemin nacional-historik të Kosovës, duhen miqtë. Porse miqtë fitohen, kur vetë je i përgatitur për t'i fituar ata, për të bërë vetë atë që duhet, për t’iu përballuar sfidave të kërkesave të mëdha që shtrojnë koha dhe historia, për të ditur t’i avancosh vlerat moderne të civilizimit, të Njohjes së Tjetrit... Kosova iu ka dhënë mësim të madh të gjitha perandorive që erdhën këndej me dhunë: te Kosova a Iliriku i moçëm perandoritë romake, bizantine, turke, sllave... e gjetën varrin e tyre. Nuk e paskemi ditur se Rusia, perandori me emrin Federatë Ruse, te Kosova (edhe me një mision historik!), po e shikuaka varrin e vet të nesërm!!! Porse ndryshe qëndron puna me SHBA-të e BE-në, ku hyrja e kyçja e popujve dhe vendeve në të, është krejt vullnetare, me standarde vlerash... E jo e dhunshme. Është kyçje në vetë vlerat e lirisë e të zhvillimit.

Ciceroni: „E shlyen diellin në qiell kush e shlyen miqësinë nga jeta e vet“. Po e parafrazojmë Ciceronin: Kush e shlyen miqësinë e bërë në mes shqiptarëve e amerikanëve, e shlyen diellin në qiellin e lirisë e të demokracisë dhe e dëbon atë nga historia, nga jeta shoqërore e nga vizioni nacional i popullit tonë.

“Miku është terapeuti më i mirë kur ne e ndiejmë veten të vetmuar dhe të lënduar. Miku i vërtetë i ndihmon atij që vuan", thotë A. Gryn.

SHBA-të, nëpërmes zërit të saj njerëzor, vijnë e na dëgjojnë atë që ndiejmë e atë që mendojmë, atë që na torturon kolektivisht si popull, na e shqiptojnë zërin e arsyes e të miqësisë, zërin e sigurisë. E ndiejmë veten më të lirshëm, më të lehtësuar, më të çliruar nga situatat që na mbajnë pezull. E pse jo, kemi ku t'i shfaqim brengat tona kolektive, problemet, frustrimet tona, telashet e llogaritë e papastruara historike, për ta gjetur shtegun në kapërcimin e konflikteve të çfarëdo lloji qoftë. Te e fundit, krijuesit e farkëtuesit shqiptaro-amerikanë e krijuan një traditë të mirë që nga “Vatra” legjendare, që nga presidentët amerikanë që i qëndruan afër këtij populli në ditët më të vështira gjatë historisë. Mos harro, thotë historia. Dhe Mësimi i Madh i Miqësisë.

Ese nga libri “Res Publica e shkrimtarit” (2008)

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30