Prishet “ferma”, 250 qen në Selitë terrorizojnë banorët

nga **Agim Gashi** Thu Jul 12, 2012 9:45 am

Prishet “ferma”, 250 qen në Selitë terrorizojnë banorët

Lehja e një prej qenve të ngelur në kolibet e boshatisura të çonte në gjurmët e shtëpisë që ka mbajtur rreth 250 qen në Selitë, të cilën banorët e lagjes nuk ta tregonin lehtas. Madje, të gjithë ata që pyetëm thjesht tregonin me dorë që gjendet diku lart, duke parë për nga kodrat e Selitës, ndërsa na këshillonin të ktheheshim pas, pasi në atë shtëpi kishte ende policë dhe për ta kjo gjë ishte e rrezikshme. “Ku do shkoni, s’e dimë, ja atje lart është, po për çfarë e doni, mos shkoni se ka policë atje, kanë qen edhe paradite, ose e merrni në telefonin Lencin para se të shkoni”. Kjo ishte minibiseda e parë me disa prej banorëve, në një nga lagjet fundore të Selitës, gjithsesi, pavarësisht stepjes së tyre për të folur, lajmi kishte marrë dhenë.

Historia

Një lukuni qensh të racave të ndryshme, duke filluar që nga më të urtit e deri tek ata që nëse lëshohen të bëjnë copë e çikë, që mbaheshin në oborrin e një shtëpie private, ka terrorizuar prej kohësh banorët e një lagjeje në Selitë, të cilët dje kanë mundur t’i japin fund makthit të tyre të përditshëm. Bëhet fjalë për një histori që ka nisur vite më parë, por që kohët e fundit kishte arritur kulmin, pasi në oborrin e shtëpisë së familjes Meta qentë nuk numëroheshin dot më me gishtat e dorës, e as me sy të lirë. Plot 250 kafshë shtëpiake, kryesisht qen të racave të ndryshme, janë bërë burim infeksioni në njërën prej lagjeve të Selitës në kryeqytet. Ata mbaheshin në njërën prej shtëpive të zonës, ndërsa situata, e cila vazhdonte prej kohësh, ka detyruar banorët të bëjnë kallëzim pranë Policisë Bashkiake për heqjen e tyre. Sipas qytetarëve, pronari i shtëpisë, Lorenc Meta, prej kohësh mbante kafshët në shtëpinë e tij, ndërsa i strehonte ato ku të mundej. Por kohët e fundit shtimi kishte arritur kulmin, ku pas kthimit të garazhit të shtëpisë në një kolibe për qentë, çdo cep i truallit përreth banesës ishte përshtatur për jetesën e kafshëve. “Kemi qenë mjaft të shqetësuar, një kope qensh të rrezikshëm, të pavaksinuar, të pa kontrolluar, pa licenca, absolutisht pa asnjë lloj rregulli. Ne dyshonim për 50-60, por gjendja mesa kemi parë ka qenë mbi 150 qen, po e përsëris të pavaksinuar pa asnjë lloj licence”, – pohon një prej fqinjëve. Ndërsa një tjetër shton se “Ne kemi bërë denoncimin dhe do ta tërheqim në qoftë se ai do të jetë plotësisht dakord me këtë që themi ne”. Pas gati tri ditësh aksion të Policisë Bashkiake është bërë i mundur largimi i qenve nga shtëpia, ndërsa pritet dhe dezinfektimi i tërë banesës. Sipas Policisë Bashkiake, heqja e qenve ka qenë mjaft e vështirë, pasi bëhej fjalë për raca të rrezikshme, ndërsa brenda shtëpisë së Metës është transportuar me vinç së bashku me kafazin e tij dhe një qen i racës kaukaziane, gjatësia e të cilit kalon dhe atë të një njeriu.

Në shtëpi

Pasditen e djeshme në shtëpinë e familjes Meta që gjendej në majë të Selitës ndodhej vetëm i ati i Lorencit, një burrë i moshuar me fizik të dobët, që korrte bar me drapër për shpendët shtëpiake. Na fton të futemi brenda, duke na pritur me mirësjellje. Fillimisht e pyesim për të “zotin” e qenve, djalin e tij, por i moshuari na thotë se nuk gjendet në shtëpi dhe se nuk ka shumë informacion për çfarë ka ndodhur, pasi çdo gjë e di Lenci. Kur e pyesim për qentë, diç preket, pse nuk i ka më në oborrin e shndërruar në një stan me disa kolibe të vjetra, njëra prej të cilave që në hyrje të portës, e që tashmë ishte bosh. Disa të tjera afër kodrës së mbuluar nga gjelbërimi, e më e madhja ngjitur me shtëpinë, e mbuluar me një perde të rëndë. “I hoqëm sot se u ankuan banorët, i kemi çuar në Pezë, Lenci nuk është në shtëpi, ai i di këto punë, unë nuk di gjë. I mbanim ca për t’i shitur, se i kërkonin shumë njerëzit. Ata të hanë të shqyejnë, ta lëshoj unë qenin, të këput këmbën. Ç’t’ju them unë, kur të vijë Lenci flisni me atë”, – pohon i moshuari, ndërsa largohet për t’i hedhur ushqim pulave që e ndjekin nga pas. Në atë oborr të zinte syri një kone të vogël bardhoshe në një kolibe me tela, dhe dy të tjerë të mëdhenj, të ngjashëm me qentë e kufirit lehnin pa pushim dhe tërhiqnin me sa të mundin zinxhirin. Duke u kthyer për nga shtëpia, një djalë 20-vjeçar, që e njihte personalisht Lencin, na tregon se qentë janë mbajtur për tregti. I riu na thotë se pak kohë më parë Lenci, që e njihte pothuajse tërë Tirana, i kishte kërkuar atij që t’i blinte një qen, sepse i duhej femra nga ajo racë dhe ai kishte vetëm mashkullin. Djaloshi pohon se vetë Lenci i ka treguar që ka investuar shumë në këtë drejtim, rreth 15 mijë euro dhe se ai furnizonte pothuajse të gjitha dyqanet në kryeqytet që merren me shitjen e kafshëve shtëpiake.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30