Konkurs kulture

Konkurs për projektet kulturore artistike të vitit 2009


Prishtinë, 15 dhjetor
 
 Ministria e Kulturës, Rinisë dhe Sportit, përkatësisht Divizioni i Promovimit në Departamentin e Kulturës ka shpallur një konkurs për projektet kulturore artistike të vitit 2009. Përmes këtij konkursi, Ministria e Kulturës synon të mbështesë projektet me karakter - profesional, të cilat me kualitetin e tyre formal dhe përmbajtësor, i respektojnë standardet krijuese evropiane e botërore - promovues, të cilat kanë për qëllim paraqitjen dhe integrimin e artistëve vendor në skenën artistike ndërkombëtare - stimulues, të cilat kanë për qëllim evidentimin e talenteve të reja me ide të veçanta kreative - tradicional, përmes të cilave do të promovoheshin vlerat e trashëgimisë sonë kulturore - inovativ, të cilat, me formën, përmbajtjen, frymën dhe mënyrën e realizimit të tyre, paraqesin risi për ambientin tonë krijues; kritik, të cilat me formën dhe përmbajtjen e tyre nxisin debat dhe diversitet artistik - praktik, përmes të cilave do të evidentoheshin dhe formësoheshin kapacitetet krijuese profesionale. Sipas një komiunikate, pjesë e këtij konkursi mund të jenë projektet kulturore artistike individuale dhe projektet kulturore artistike grupore (festivalet, bienalet, panairet, ekspozitat dhe manifestimet tjera) me karakter kombëtar dhe ndërkombëtar nga të gjitha fushat e artit. Në kuadër të këtij konkursi, me projekt idetë e tyre kreative, mund të konkurrojnë institucionet kulturore publike, institucionet kulturore private, OJQ të me karakter kulturor, individët dhe grupet e ndryshme të artistëve. Ministria e Kulturës, Rinisë dhe Sportit , para së gjithash, do të mbështesë projektet kulturore artistike me karakter profesional, të cilat janë në përputhje me politikat e saj kulturore. Projektet konkurruese duhet të shoqërohen nga të dhëna konkrete, të tilla si: emri i projektit, bartësi i projektit, partnerët e projektit, karakteri i projektit, përshkrimi i hollësishëm i projektit, qëllimet e projektit, vendi dhe koha e realizimit të projektit, si dhe plani i detajizuar financiar. Projektet konkurruese duhet të realizohen brenda vitit 2009. Projektet duhet të dorëzohen në 3 (tri) kopje në Ministrinë e Kulturës, Rinisë dhe Sportit/Departamenti i Kulturës në zyrën Nr. 14. Afati i dorëzimit të projekteve zgjat 30 (tridhjetë) ditë nga dita e shpalljes publike të këtij konkursi. Ky konkurs është bërë publik gjatë ditës së sotme.