Prend BUZHALA:TË NJERIUT JANË

nga **Agim Gashi** Wed Sep 19, 2012 1:27 am

Tashmë njerëzit nuk frikësohen nga asgjë,
Thonë: çdo gjë njerëzore është për ne,
bie fjala: të gjitha luftërat, betejat, përleshjet
për njerëz janë.
E mandej njerëzit nga ato e thurin historinë e tyre,
i hartojnë dokumentet, dëshmitë e rrëfimet,
i krijojnë heronjtë legjendarë e këngët për ta -
Ja ky është Libri i Daljes e i rrugëdaljes nga Historia.
E Historia, si një gazetë e vjetër, e zhubrosur,
e dëgjojmë ç'na thotë, ç'na porosit
E si ta përsërisim pambarimisht atë,
Si të mos ndahemi nga Ajo,
Si ta mbajmë në xhep,
Si fletë e pavlerë gazete për tualet.
Si një zë i largët, ende i dëgjohet jehona,
gërvima, gërvishtjet e saj me kthetra.
Një tjetër fletë e bart era rrugëve
me fotografi të vjetra me portrete të moçme
njerëzish të vdekur, me kohë të vdekura, të pakthim,
aty ku përfundon në pyllin e errët
vetë Fleta e Historisë. Kështu ka qenë.
Kështu na ishte ajo Kohë e Vdekur
Që merr në thua shtigjeve të fatit nëpër pyjet e errëta.

Njerëzore janë të gjitha vrasjet, masakrat, gjakderdhjet,
varrezat masive, djegiet e kufomave dhe zhdukjet e eshtrave.
Njerëzore na është edhe Apokalipsa e Të Sotmes
që ia kalon Apokalipsës së Shën Gjonit.
Thika e ngulur në trupin njerëzor,
Gota e helmit, laku në fyt
A plumbi mbas shpine –
Të gjitha të njeriut na qenkan.
E çka nuk na u bë njerëzore:
krimet, e hapura e të fshehura, intrigat,
komplotet kundër lirisë së popujve,
tribunalet për ta vënë në kryq Fjalën e Lirë
a Dëshminë për Historinë.
Të njeriut janë e për njerëzit janë
Konferencat e gjakut për plaçkën e ndarë,
të mbrojtur me ligje, rezoluta e tryeza dialogësh.

Ndërsa Qielli mbetet i njëjtë
me fashin e tij të kaltër rreth planetës,
me Syrin Hyjnor drejt nesh.

(poezi, 2004)

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30