Qeveria - garantues i kredive

Qeveria - garantues i kredive




Përmes fondit për bujqësi, Qeveria e Kosovës do t’u garantojë bankave komerciale kthimin e kredive të fermerëve. Ndërsa, sipas versionit të Bankës Qendrore të Kosovës, ky fond do të përdoret vetëm për subvencionimin e kamatave

Nga Zekirja Shabani më 20.04.2009 në ora 8:21

Bankat komerciale në Kosovë do të jenë të sigurta për kthimin e kredive nga fermerët. Qeveria këtë e garanton përmes fondit për bujqësi, të cilin e ka propozuar kryeministri i Kosovës, Hashim Thaçi, javën e kaluar.

Ky është një nga versionet më të mundshme për shfrytëzimin e këtij fondi, edhe pse guvernatori i Bankës Qendrore, Hashim Rexhepi, thotë se ideja është që përmes tij të subvencionohet një pjesë e kamatave.

Megjithatë, themelimi i këtij fondi mbetet ende në nivel të propozimit dhe detajet do të jepen pas tre muajsh nga Ministria e Ekonomisë dhe Financave.
Burime të gazetës brenda kësaj ministrie thonë se problemi kryesor është sigurimi i parave.

“Nuk e dimë nga t’i marrim paret. Ishalla na dalin ato për të mbuluar të gjitha nevojat”, thotë burimi nga MEF-i.
E sigurt është se bankat nuk do ta financojnë këtë fond. Kryetarja e Shoqatës së Bankave të Kosovës, Diturije Hoxha, thekson se ato nuk do të japin pare.

“Ne presim që Qeveria ta garantojë kthimin e kredive’, thekson Hoxha.

Sipas saj, sistemi i kreditimit nuk do të pësojë asnjë ndryshim. Ai do të jetë i njëjtë si për të gjithë klientët, vetëm se fermerët që deri më tash nuk i kanë plotësuar kushtet, tani me garantues të fortë do të kenë qasje më të lehtë.

Detajet për mënyrën se si do të kompensohen bankat nga Qeveria, në rastin e kredive të këqija, ajo thotë se nuk janë bërë të ditura ende.
“Për mënyrën e funksionimit të fondit, ende nuk ka detaje”, thekson Hoxha.

Ndërkaq, kreu i BQK-së, Hashim Rexhepi, thotë se qëllim kryesor është që të krijohen kushte më të volitshme për zhvillimin e bujqësisë. Ai pohon se nuk do të ketë kreditim të drejtpërdrejtë, por Qeveria përmes fondit do të subvencionojë një pjesë të kamatave.

Sa i përket mënyrës së organizimit dhe mbikëqyrjes, Rexhepi thekson se është herët të flitet.
Ngjashëm përgjigjet edhe zëdhënësi i Qeverisë së Kosovës, Memli Krasniqi, sipas të cilit krijimi i fondit për bujqësi është vetëm propozim.
“Është një iniciativë që po diskutohet dhe deri më tani nuk ka asgjë konkrete”, shprehet Krasniqi.

Në Ministrinë e Bujqësisë, Pylltarisë dhe Zhvillimit Rural, ka vite që pret të realizohet projekti për subvencionim të kamatave nga 70 deri në 100 për qind, sipas modeleve të rajonit.
“Ne e kemi pasur një projekt për subvencionim të kamatave për fermerët ndërmarrës, që janë të gatshëm për investime”, tregon këshilltari i ministrit të Bujqësisë, Nijazi Idrizi.
Ky projekt është paraqitur edhe në konferencën e donatorëve, por nuk kishte gjetur përkrahje.

Idrizi nuk e di se si është menduar formimi i fondit për bujqësi, pasi që për këtë nuk është pyetur Ministria e Bujqësisë. Mirëpo, tregon se bujqësia ka nevojë për ndihmë. Ajo tani ka në dispozicion vetëm 0.82 për qind të mjeteve të buxhetit, edhe pse në GDP kontribuon me 25 për qind.

Kohëve të fundit është aktualizuar ideja për formimin e një banke agrare, e cila më vonë nga Partia Socialdemokrate është propozuar të jetë Bankë Zhvillimore.
Kjo bankë, sipas tyre, do të kishte kompetenca për mobilizim dhe menaxhimin e suficitit, apo deficitit të Buxhetit të Kosovës, buxheteve komunale, depozitat në BQK, paratë e pensioneve dhe fondin e privatizimit.

Sipas kësaj partie, Banka Zhvillimore do të menaxhonte nga 1.7 deri në 2 miliardë euro, të cilat tani janë në qarkullim jashtë Kosovës.