Vullnet Mato:TROKU I LAVDISHËM

nga **Agim Gashi** Mon Sep 24, 2012 7:23 pm

Vullnet Mato

TROKU I LAVDISHËM

Thuhet shpesh në biseda:
“Punon si kali ai njeri!”
pasi kjo krijesë e fuqishme,
me shtatin gëzof prej drite,
shquar gjatë gjithë shekujve
për bindje dhe urtësi,
mbeti punëtori i madh
për gjithë punët praktike.

Njëthundraku i mrekullueshëm
që u shfaq në këtë botë,
qysh në mugëtirat e para
të njerëzimit të egër,
shërbeu për çdo njeri,
me përkushtim të pashoq,
dhe nuk meriton të quhet
“kafshë” si gjithë të tjerët.

Shoqërimi me kalin lehtësoi
barrën e madhe mijëvjeçare,
kur njeriu s’mund të çante
rrugën e gjatë të historisë,
me këmbët e tij të ngathëta
dhe me shpinën hamalle,
pa pasur gjigantin trokaik,
si pjesë kryesore të zotësisë.

Kali çoi Gjergj Elez Alinë
te mejdani i bajlozit të zi,
kali afroi malet dhe fushat
nga horizontet pambarim,
kali bëri dasmat dhe solli
Doruntinën në shtëpi,
kali bëri disa luftëra
nga lindja në Perëndim.

Pa kalin a do kish korrur
beteja shpata e Skënderbeut,
kur mbi kalin legjendar
ndante më dysh malin?...
Pa kalërimin a do u mbetej,
gur kështjellave të atdheut
që të gdhendej në bronz
Skënderbeu dhe Kali ?!...

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30