Nishani, mos dëgjoni propagandën serbe, njiheni shtetin e Kosovës

nga **Agim Gashi** Fri Sep 28, 2012 11:41 am

Nishani, mos dëgjoni propagandën serbe, njiheni shtetin e Kosovës

Presidenti i Shqipërisë iu drejtua sot pjesëmarrësve të Asamblesë së Përgjithshme të Kombeve të Bashkuara në New York, duke thënë se këtë vit Shqipëria kremton Njëqindvjetorin e Pavarësisë. “Teksa shënojmë këtë datë të rëndësishme dhe i hedhim një sy historisë sonë gjatë këtyre dhjetë dekadave, vërejmë me kënaqësi se më tepër se gjysma e kësaj periudhe është karakterizuar nga një bashkëpunim i suksesshëm dhe pjesëmarrje aktive nga ana e shtetit shqiptar në jetën e Kombeve të Bashkuara”, tha pos tjerash Nishani.“Shumë vetë e kanë përshkruar popullin shqiptar si mbijetues ndaj ngjarjeve të vështira të historisë. Nuk e kanë gabim: shqiptarët kanë vuajtur nga luftëra të padëshiruara, nga shpërngulje me dhunë prej trojeve të veta, nga sulme dhe përpjekje për t’i zhdukur nga faqja e dheut, nga copëtime të padrejta territoresh dhe përgjatë gjysmës së dytë të shekullit XX ata u rezistuan trimërisht edhe pesë dekadave komunizëm. Sot ne i kemi hedhur sytë drejt së ardhmes plot shpresë, besimplotë dhe të përgatitur që gjatë shekullit në vazhdim do të përjetojmë paqe, përparim ekonomik dhe rimëkëmbje kulturore e intelektuale të vazhdueshme”, tha kreu i shtetit shqiptar, duke vazhduar më pas edhe me fjalën për Kosovën dhe pavarësinë e saj.

“Më lejoni që të vë në dukje se krijimi i shtetit të pavarur të Kosovës pesë vite më parë, e ka kthyer atë në një faktor të rëndësishëm të paqes dhe qëndrueshmërisë në rajonin e Evropës Juglindore. Ai është ndërtuar dhe fuqizuar përkundrejt të gjitha vështirësive që ka hasur, të krijuara nga ata të cilët ende nuk mund ta pranojnë realitetin dhe ta shikojnë të vërtetën drejt e në sy. Me kalimin e kohës, Kosova e pavarur është njohur dhe pranuar nga një numër gjithnjë e në rritje shtetesh, ku përfshihen gati gjysma e anëtarëve të OKB-së.

Mendimi Këshillues i Gjykatës Ndërkombëtare të Drejtësisë, në vitin 2010, në përgjigje të një kërkese të veçantë të Serbisë, qartësisht përcaktoi se shpallja e pavarësisë së Kosovës ishte bërë në përputhje me ligjin ndërkombëtar. Vetëm disa ditë më parë, Kosova arriti një tjetër nivel të konsolidimit të shtetit me dhënien fund nga ana e bashkësisë ndërkombëtare të Fazës Mbikëqyrëse të Pavarësisë.

Përfitoj nga ky rast për të uruar autoritetet e Kosovës mbi përparimin e vazhdueshëm që kanë shënuar për sa i përket ndërtimit dhe fuqizimit të një shteti demokratik dhe një shoqërie shumetnike dhe u bëj thirrje të gjitha atyre vendeve, që ende nuk e kanë njohur Kosovën, të marrin parasysh rishikimin dhe vlerësimin e këtij realiteti të pakthyeshëm në rajonin e Evropës Juglindore. Njohja e Kosovës është një akt drejtësie për ata njerëz, të cilët kanë vuajtur aq gjatë, dhe një kontribut tërësor për paqen dhe qëndrueshmërinë në Ballkan.

Kemi dëgjuar edhe më parë dhe presim të dëgjojmë sërish argumentet e tepërta të Serbisë në lidhje me Kosovën. Ajo që dështoi të arrihej me luftë, nuk mund të arrihet dot me propagandë. Ndërsa udhëheqësit e Serbisë flasin për copëtim dhe rihartim kufijsh, teksa ata lëshojnë deklarata shqetësuese duke mohuar gjenocidin e Srebrenicës, gjithsecili ka të drejtë të ngrejë pyetjen nëse e shkuara vazhdon akoma të endet mbi të tashmen, duke mjegulluar realitetin e duke i ngatërruar vizionin për të ardhmen”, tha pos tjerash Nishani në fjalën e tij të gjatë para shefave të shteteve dhe qeverive të tubuar këto ditë në Asamblenë e Përgjithshme vjetore të KB-ve.

Fjala e Presidentit Nishani në Debatin e Përgjithshëm të Sesionit të 67-të të Asamblesë së Përgjithshme të Kombeve të Bashkuara

Zoti President,
Shkëlqesi,
Zonja dhe Zotërinj!

Çdo vit mblidhemi këtu për të ndarë analizat, pikëpamjet dhe komentet tona mbi ngjarjet botërore. Përfitojmë nga ky rast për të ndarë edhe shqetësimet tona, për t’u takuar, bashkëvepruar dhe për t’u përpjekur që të ofrojmë përkushtimin tonë më të madh në gjetjen e zgjidhjeve të duhura për sfidat e së tashmes dhe së ardhmes.

Ka kaluar një vit që nga sesioni i fundit dhe bota ka ndryshuar edhe më shumë. Zhvillimi dhe rritja ekonomike në shumë vende kanë nxjerrë nga niveli i varfërisë miliona njerëz. Anembanë botës shoqëritë kërkojnë më shumë të drejta dhe një pjesëmarrje politike më të efektshme. Demokracia, të drejtat e njeriut dhe pjesëmarrja më e madhe e grave në jetën publike dhe shoqërore janë përmirësuar globalisht.

Megjithatë, pavarësisht përpjekjeve, arritjeve dhe përparimit të shënuar, shumë çështje mbeten ende burime shqetësimi. Megjithë ndërgjegjësimin e paparë global, ndryshimi i klimës vazhdon të mbetet një burim i thellë shqetësimi. Klima e përkeqësuar ekonomike globale gjithnjë e shumë vazhdon të shkaktojë gjithandej një ankth shqetësues. Kërcënimet ndaj paqes dhe sigurisë në pjesë të ndryshme të botës tregojnë se jemi ende larg nga arritja e sigurisë së dëshiruar globale. Prandaj, me plot të drejtë, ne presim që Kombet e Bashkuara, organizata të cilën e kemi vendosur në qendër të arkitekturës ndërkombëtare, të jetë më efiçente, më e efektshme, më transparente dhe të përgjigjet më shumë.

Zoti President,

Këtë vit Shqipëria kremton Njëqindvjetorin e Pavarësisë. Teksa shënojmë këtë datë të rëndësishme dhe i hedhim një sy historisë sonë gjatë këtyre dhjetë dekadave, vërejmë me kënaqësi se më tepër se gjysma e kësaj periudhe është karakterizuar nga një bashkëpunim i suksesshëm dhe pjesëmarrje aktive nga ana e shtetit shqiptar në jetën e Kombeve të Bashkuara.

Përkushtimi ynë ka ardhur duke u rritur përgjatë viteve dhe ka përqafuar pothuajse çdo aspekt të veprimtarisë së Kombeve të Bashkuara, përfshirë edhe operacionet paqeruajtëse.

Gjatë viteve të fundit, ne kemi qenë të përkushtuar në mënyrë të veçantë ndaj përpjekjeve të vazhdueshme për të reformuar sistemin. Ndërsa sistemi i Kombeve të Bashkuara është zhvilluar edhe më tej dhe veprimet e tij janë bërë edhe më të ndërlikuara, nevoja për koherencë dhe efiçencë e të gjithë sistemit është shndërruar në një domosdoshmëri. Kjo duket qartë në mënyrë te veçantë për asistencën e zhvillimit të Kombeve të Bashkuara.

Duke qenë një nga vendet pilote të qasjes “Delivering as One”, vjet në qershor Shqipëria organizoi Konferencën e 5-të të Nivelit të Lartë. Konferenca e Tiranës aprovoi një dokument përfundimtar me rekomandime konkrete dhe të vlefshme, duke pasur parasysh edhe mbajtjen së shpejti të vlerësimit të politikës së përgjithshme tremujore të veprimtarisë operacionale për zhvillim të Kombeve të Bashkuara.

Tashmë e dimë se ajo që nisi si një ide eksperimentale, është zhvilluar dhe ka përshkuar goxha rrugë brenda një kohe të shkurtër. Një numër gjithnjë e në rritje vendesh po shikojnë më qartësisht dhe më nga afër të mirat e të provuarit të punës dhe zbatimit të programeve asistuese të Kombeve të Bashkuara me më shumë koherencë dhe afektshmëri. “Delivering as One” ka vërtetuar bindshëm në praktikë se veprimtaritë operacionale të Kombeve të Bashkuara duhet të kryhen me një efiçencë më të lartë dhe se sistemi i Kombeve të Bashkuara mund të japë më tepër dhe mund të bëjë më shumë duke përmbushur objektivat kombëtare dhe ndërkombëtare, për të cilat është rënë dakord.

Zoti President,

Ndihem krenar që përfaqësoj një vend dhe një shoqëri, që njihen gjerësisht për mendjen e hapur, tolerancën dhe pranimin e “tjetrit”. Shqiptarët ndoshta përfaqëojnë shembullin e vetëm në rajonin tonë, të cilët edhe pse kanë kaluar përmes shumë vështirësive historike përgjatë shekujve, gjithmonë kanë ditur të ruajnë dhe të mbrojnë vlerat e lirisë dhe respektit për të tjerët, që kanë qenë të ndryshëm – vlera këto që gjenden në themelin e konceptit bashkëkohor të të drejtave të njeriut.

Respekti që kanë dhe tregojnë shqiptarët ndaj individualitetit dhe të drejtave të të tjerëve shprehet mbi të gjitha me anë të harmonisë shembullore fetare.

Kjo sjellje është shtrirë në pranimin dhe respektin për kulturat, etnitë dhe civilizimet e tjera, duke përfshirë këtu edhe përkujdesjen e vëmendjen e veçantë ndaj atyre që u strehuan dhe u shpëtuan nga tmerret e luftës. Shqiptarët rrezikuan jetën e tyre apo bënë sakrifica të mëdha ekonomike që tejkalonin mundësitë e tyre për të shpëtuar dhe strehuar këdo që u trokiti në derë.

Me këtë sfond, Shqipëria mbetet një vend që beson fort në dialogun mes civilizimeve dhe nuk do të pushojë kurrë së angazhuari në mënyrë aktive për rrafshimin e dallimeve mes anëtarësisë së gjerë të Kombeve të Bashkuara për çështje që kanë të bëjnë me agjendën e të drejtave të njeriut. Pikërisht për këtë arsye, Presidenca e radhës shqiptare e Këshillit të Evropës ka zgjedhur si moton e saj: “Të bashkuar në shumëllojshmëri”.

Dialogu mes kulturave dhe civilizimeve të ndryshme duhet parë si një proces i vazhdueshmë që kërkon përkushtim, vullnet të mirë dhe kujdes. Nuk mund të lejojmë që veprime sporadike e të papërgjegjshme të grupeve shkatërruese të na pengojnë në përpjekjen tonë të qashtër për të arritur një mirëkuptim më të madh mes njëri-tjetrit në një botë, e cila sa vjen dhe globalizohet gjithnjë e më tepër. Megjithëse ndihemi keq e të hidhëruar nga një video pa vlerë, që shënjestron qëllimshëm atë të cilën myslimanët anembanë e konsiderojnë si të shenjtë, shoqëria shqiptare me myslimanë e të krishterë, shpreh indinjatën e saj duke e injoruar gjithë këtë gjë pa kuptim. Na vjen keq që në disa pjesë të botës, kjo ngjarje nuk u përcoll me një reagim të njëjtë. Përkundrazi, u përdor për të ushqyer dhunën e verbër të turmave të zemëruara e pashpresë – gjë që solli pasoja fatale. Duhet ta bëjmë të qartë: format e terrorizmit, veprimet ekstremiste të grupeve të izoluara dhe me qëllime të këqia kurrë nuk duhen ngatërruar me pozicionin ose të identifikohen me sjelljen e shoqërive dhe qeverive të tëra. Prapë se prapë, asnjë lloj zemërimi i përligjur nuk mund të justifikohet me veprime të paligjshme dhune, të cilave qeveritë, shoqëritë, udhëheqësit politikë dhe fetarë duhet t’u kundërvihen me forcë.

Ne i dënojmë me indinjatë veprimet terroriste kundër Ambasadës amerikane në Libi dhe kërkojmë ndëshkimin e autorëve. Dënojmë gjithashtu çdo lloj veprimi të shprehur nëpërmjet protestash të dhunshme kundër ambasadave perëndimore, misioni i të cilave është promovimi i mirëkuptimit dhe bashkëpunimit mes vendeve dhe kombeve.

Zoti President,

Shqipëria, me politikën e saj të jashtme për paqe dhe marrëdhënie të mira me vendet e tjera; me kontributin e saj modest, por të rëndësishëm në misionet ndërkombëtare në mbrojtje të paqes dhe të drejtave të njeriut nëpërmjet politikës së fqinjësisë së mirë si dhe nëpërmjet rolit të moderuar dhe konstruktiv në rajon – është kthyer në një prodhuese dhe kontribuese e drejtpërdrejtë e qëndrueshmërisë dhe sigurisë rajonale e globale. Ne jemi të vendosur t’i ruajmë këto arritje dhe të vazhdojmë në këtë rrugë.

Në ditët e sotme, Shqipëria merr pjesë në misionet paqeruajtëse në kuadër të operacioneve të ndryshme ndërkombëtare të Kombeve të Bashkuara dhe të organizatave të tjera rajonale të sigurisë si në Afganistan, Bosnje, Irak dhe në vende të tjera. Vendi im pranon dhe mbështet çdo lloj përpjekje për paqen dhe sigurinë globale dhe do të vazhdojë të mbështesë të gjitha përpjekjet e Kombeve të Bashkuara, NATO-s dhe aktorëve të tjerë që promovojnë paqe, qëndrueshmëri dhe siguri në botë.

Zoti President,

Paqja dhe siguria në botë vazhdojnë të sfidohen nga tirania dhe shtypja në pjesë të ndryshme të saj. Ne theksojmë sërish dënimin tonë të fuqishëm të shtypjes së ashpër kundër popullit liridashës të Sirisë, që po vuan si pasojë e një gjakderdhjeje primitive nga një regjim, i cili ka humbur në mëyrë të pakthyeshme legjitimitetin për të udhëhequr dhe përfaqësuar popullin sirian. Më lejoni t’u bashkohem atyre që i bëjnë thirrje Këshillit të Sigurisë së Kombeve të Bashkuara për të vepruar, dhe në përputhje me Deklaratën e Kombeve të Bashkuara, të përmbushë mandatin e tij për sa i përket ruajtjes së paqes dhe sigurisë! Është vështirë për t’u besuar se dikush mund të qëndrojë mospërfillës ndaj ngjarjeve të tmerrshme që po ndodhin çdo ditë në Siri që prej një viti e gjysmë, ku kanë humbur jetën dhjetëra mijëra njerëz, me shkatërrim të qëllimshëm e të përhapur dhe vuajtje, të cilat e kanë kthyer atë vend dekada pas. A nuk i kemi përvetësuar ende vallë mësimet e forta të nxjerra prej gabimeve të tilla të ngjashme nga tragjeditë e dikurshme në Ruanda dhe në Bosnje?

Shqipëria mbështet plotësisht procesin e paqes mes Palestinës dhe Izraelit. Shqipëria rithekson pozicionin e saj në mbështetje të zgjidhjes me dy shtete: Shtetit të sigurtë të Izraelit dhe një Shteti të porsalindur të Palestinës, që do të ekzistojnë krah për krah me njëri-tjetrin në përputhje me rezolutat dhe Kombeve të Bashkuara dhe Planit të Veprimit. Të dy popujt: e Palestinës dhe Izraelit janë të lodhur e të dërrmuar nga ky konflikt pa mbarim dhe udhëheqësit e tyre duhet të mbajnë mbi supe barrën dhe të mbështesin kërkesën legjitime për liri dhe paqe të shoqëruar me vizion dhe vullnet të mirë afatgjatë përballë ekstremistëve. Bota dëshiron ta shikojë procesin e paqes në Lindjen e Mesme të dalë nga vazhda e mbetur në vend duke u kthyer në një model frymëzimi për arritjen e kompromiseve të vështira, por aq të domosdoshme njëkohësisht.

Shqipëria mbetet thellësisht e shqetësuar nga programi bërthamor i Iranit, i cili vazhdon të ngrejë pikëpyetje mbi natyrën e tij në vend që të japë përgjigjet dhe garancitë që kërkohen prej kaq e kaq vitesh. Ne duhet ta parandalojmë shndërrimin e Iranit në një kërcënim bërthamor.

Zoti President,

Në nëntor të këtij viti, vendi im do të kremtojë Njëqindvjetorin e Pavarësisë. Ne do të përkujtojmë një shekull të mbushur plot e përplot me ngjarje të ndryshme, disa prej të cilave nuk kanë qenë edhe aq të këndshme.

Shumë vetë e kanë përshkruar popullin shqiptar si mbijetues ndaj ngjarjeve të vështira të historisë. Nuk e kanë gabim: shqiptarët kanë vuajtur nga luftëra të padëshiruara, nga shpërngulje me dhunë prej trojeve të veta, nga sulme dhe përpjekje për t’i zhdukur nga faqja e dheut, nga copëtime të padrejta territoresh dhe përgjatë gjysmës së dytë të shekullit XX ata u rezistuan trimërisht edhe pesë dekadave komunizëm. Sot ne i kemi hedhur sytë drejt së ardhmes plot shpresë, besimplotë dhe të përgatitur që gjatë shekullit në vazhdim do të përpjetojmë paqe, përparim ekonomik dhe rimëkëmbje kulturore e intelektuale të vazhdueshme.

Rajoni ynë, që dikur ka qenë një vatër e nxehtë turbullirash dhe zonë e sëmurë e Evropës, tashmë është shndërruar thellësisht dhe pozitivisht. Gjashtë shtete të reja kanë lindur nga ish-Jugosllavia përgjatë rrjedhës së dy dekadave të fundit.

Të gjithë e kemi të qartë që kjo nuk ka qenë aspak e lehtë dhe e dimë fort mirë edhe arsyen pse, por ajo që ka rëndësi është se gjithandej në rajon shoqëritë janë zhvilluar, fantazmat e së shkuarës ua kanë lënë vendin realiteteve dhe njerëzve të rinj, sidomos brezit të ri, të kthyer më shumë se kurrë duke i hedhur sytë drejt së ardhmes.

Më lejoni që të vë në dukje se krijimi i shtetit të pavarur të Kosovës pesë vite më parë, e ka kthyer atë në një faktor të rëndësishëm të paqes dhe qëndrueshmërisë në rajonin e Evropës Juglindore. Ai është ndërtuar dhe fuqizuar përkundrejt të gjitha vështirësive që ka hasur, të krijuara nga ata të cilët ende nuk mund ta pranojnë realitetin dhe ta shikojnë të vërtetën drejt e në sy. Me kalimin e kohës, Kosova e pavarur është njohur dhe pranuar nga një numër gjithnjë e në rritje shtetesh, ku përfshihen gati gjysma e anëtarëve të Organizatës së Kombeve të Bashkuara.

Mendimi Këshillues i Gjykatës Ndërkombëtare të Drejtësisë i dhënë në vitin 2010 në përgjigje të një kërkese të veçantë të Serbisë, qartësisht përcaktoi se shpallja e pavarësisë së Kosovës ishte bërë në përputhje me Ligjin Ndërkombëtar. Vetëm disa ditë më parë, Kosova arriti një tjetër nivel të konsolidimit të shtetit me dhënien fund nga ana e bashkësisë ndërkombëtare të Fazës Mbikëqyrëse të Pavarësisë.

Përfitoj nga ky rast për të uruar autoritetet e Kosovës mbi përparimin e vazhdueshëm që kanë shënuar përsa i përket ndërtimit dhe fuqizimit të një shteti demokratik dhe një shoqërie shumëetnike dhe u bëj thirrje të gjitha atyre vendeve, që ende nuk e kanë njohur Kosovën, të marrin parasysh rishikimin dhe vlerësimin e këtij realiteti të pakthyeshëm në rajonin e Evropës Juglindore. Njohja e Kosovës është një akt drejtësie për ata njerëz, të cilët kanë vuajtur aq gjatë dhe një kontribut tërësor për paqen dhe qëndrueshmërinë në Ballkan.

Kemi dëgjuar edhe më parë dhe presim të dëgjojmë sërish argumentet e tepërta të Serbisë në lidhje me Kosovën. Ajo që dështoi të arrihej me luftë, nuk mund të arrihet dot me propagandë. Ndërsa udhëheqësit e Serbisë flasin për copëtim dhe rihartim kufijsh, teksa ata lëshojnë deklarata shqetësuese duke mohuar gjenocidin e Srebrenicës, gjithsecili ka të drejtë të ngrejë pyetjen nëse e shkuara vazhdon akoma të endet mbi të tashmen duke mjegulluar realitetin e duke i ngatërruar vizionin për të ardhmen.

Zoti President,

Shqipëria ka pasur një rritje të fuqishme e pozitive ekonomike, pavarësisht ndikimit të krizës globale ekonomike dhe financiare. Ndjekja dhe zbatimi i politikave të matura makro-ekonomike dhe reformat e mirëstrukturuara, përqendrimi tek privatizimet, drejtësia fiskale, liberalizimi i tregtisë, klima e sipërmarrjes, sektorët e energjisë dhe financiarë – të gjitha këto kanë bërë të mundur që ekonomia e Shqipërisë të jetë më elastikja ndër ekonomitë e Evropës Juglindore. Gjatë viteve 2007-2012, rritja mesatare ekonomike e Prodhimit të Brendshëm Bruto ka qenë 5%, duke kulmuar në vitin 2008 në 8%. Që nga viti 2008 Shqipëria ka pasur taksën e sheshtë prej 10%; taksa ndaj koorporatave është ulur nga 25% në 10%; taksa e të ardhurave vetjake është ulur nga 23% në 10% dhe dhjetëra tarifa janë hequr fare. Raporti i Konkurrencës Globale 2011-2012 i Forumit Ekonomik Botëror e rendit Shqipërinë në vendin e 78 mes 142 vendesh dhe ekonomish. Po ashtu, Raporti “Të bërit biznes, 2012” i Bankës Botërore mbi “Lehtësinë e të bërit biznes” e rendit Shqipërinë në vendin e 82 në mes të 183 ekonomive. “Për marrjen e kredisë” dhe “Mbrojtjen e konsumatorëve” Shqipëria renditet respektivisht në vendin e 24 dhe në atë të 16, renditje që e vendos Shqipërinë në mes të vendeve me rezultatet më të larta.

Në rrugën tonë drejt zhvillimit, përparimit dhe begatisë së qëndrueshme, ne mbetemi tërësisht të angazhuar e të përkushtuar për kryerjen e të gjitha reformave dhe marrjen e të gjitha masave të nevojshme për vazhdimin e suksesshëm në udhën e integrimit drejt Bashkimit Evropian. Kjo nuk është alternativë, por një zgjedhje e kujdesshme afatgjatë, e cila është duke u ndjekur prej vitesh dhe në jemi të vendosur për ta bërë të mundur e për ta kthyer në realitet.

Në javët e ardhshme, ne presim dhënien e një vendimi të favorshëm nga Këshilli i Ministrave i Bashkimit Evropian ndaj kërkesës sonë për të marrë statusin e vendit kandidat për në Bashkimin Evropian. Një vendim i bazuar në meritat tona, do të shënonte një tjetër gur kilometrik në rrugëtimin integrues evropian të Shqipërisë, duke i vendosur angazhimet dhe përgjegjësitë tona në një fazë më të lartë të procesit.

Zoti President,

Në përfundim, më lejoni t’ju siguroj se Shqipëria vazhdon të mbetet e përkushtuar ndaj bashkëpunimit ndërkombëtar dhe është e vendosur për të ofruar kontributin e saj në përparimin e paqes, lirisë dhe sigurisë, në respektin e të drejtave të njeriut, në luftën kundër varfërisë, në promovimin e zhvillimit të qëndrueshëm dhe begatisë dhe në fund, por jo më pak e rëndësishmja, në mbrojtjen e mjedisit.

Ju falemnderit për vëmendjen!

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30