PDK lëshon sallën, s’ka vendim për privatizimin

nga **Agim Gashi** Thu Oct 04, 2012 4:45 pm

PDK lëshon sallën, s’ka vendim për privatizimin

Në mungesë kuorumi, Kuvendi i Kosovës ka ndërprerë punimet pas largimit nga salla të shumicës së deputetëve të Partisë Demokratike të Kosovës. Largimi i deputetëve të partisë më të madhe në kuvend dhe qeveri ishte një formë taktike e veprimit për të pamundësuar votimin e një mocioni të opozitës për pezullimin e procesit të privatizimit.

Fillimisht, PDK përmes shefit të Grupit Parlamentar, Adem Grabovci kërkoi që Kuvendi të vendoste në rend dite një rezolutë me të cilën kërkohej vazhdimi i procesit të privatizimit.

Por, ishte kryetari i Kuvendit, Jakup Krasniqi ai i cili rikujtoi Grabovcin se futja e rezolutave në rend të ditës nuk mund të bëhej pa shmangie nga rregullorja e punës që kërkonte mbështetjen e dy të tretave të deputetëve të pranishëm në sallë. Mbështetje këtë që PDK nuk e kishte.

Ndryshe, PDK do të duhej të priste edhe tetë ditë afat për futjen e kësaj rezolute në rend të ditës. Ky interpretim solli deri te përplasjet verbale ndërmjet Krasniqit e Grabovcit, të dy nga Partia Demokratike e Kosovës.

Më pas, Kuvendi shkoi në një pauzë, por e cila nuk i zgjidhi problemet. Me këtë rast, PDK pamundësoi vazhdimin e seancës duke u larguar nga salla. Në mungesë kuorumi, Kuvendi nuk mund të votonte as në lidhje me mocionin e opozitës për pezullimin e privatizimit të ndërmarrjeve publike përderisa të plotësohen disa kushte.

Largimin e partisë më të madhe në pushtet, një pjesë e opozitës e ka interpretuar si reflektim të raporteve që aktualisht ekzistojnë përbrenda PDK-së.

Burim Ramadani, deputet i Aleancës për Ardhmërinë e Kosovës tha se deputetët e PDK-së po e shfrytëzojnë Kuvendin për t’i zgjedhur problemet e tyre personale.

Ndaj konstatimeve të Ramadanit ka reaguar kryeparlamentari Jakup Krasniqi duke thënë se ai po zbaton rregulloren e punës dhe nuk po sillet në asnjë rast si deputet i vetëm një partie politike.

Kjo është hera e dytë që PDK, pavarësisht se paraqet numerikisht shumicën lëshon sallën dhe punimet e Kuvendit. Një sjellje e tillë e PDK-së, nga deputeti i LDK-së, Sabri Hamiti është cilësuar si rrënim i demokracisë parlamentare.

Debati për procesin e privatizimit ishte iniciuar nga deputeti i Vetëvendosjes, Visar Ymeri. Pas një dite debatesh e polemikash të zhvilluara në seancën e të mërkurës, në fund ishte vendosur që të enjten të votohej për mocionin e Vetëvendosjes dhe pjesës tjetër opozitare për pezullimin e privatizimit.

Krahas opozitës, edhe kryeparlamentari Krasniqi kërkoi ndihmën nga Shtetet e Bashkuara dhe Bashkimi Evropian për ta ndërprerë privatizimin, përderisa nuk forcohet sundimi i ligjit në vend. Duke konsideruar se shumë nga deputetët aktual kanë mandate të vjedhura, Krasniqi kishte thënë po ashtu se kjo legjislaturë nuk ka mandat për të privatizuar pasurinë e qytetarëve të Kosovës. Konstatimet e tilla e kanë futur Krasniqin në debate e polemika edhe me deputetët e partisë së tij.

Sidoqoftë, veprimi i PDK-së për të reaguar me një kundër-rezolutë dhe më pas për t’u larguar nga salla, detyroi Kuvendin që për vendime tjera të vendoset të hënën nga Kryesia, e cila me gjasë do ta caktojë edhe datën e thirrjes së seancës së radhës.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30