Washington Times: Klinton nuk takon Jeremiqin-shkak Kosova

Washington Times: Klinton nuk takon Jeremiqin-shkak Kosova






Sekretarja e shtetit, Hilari Klinton, hedh poshtë kërkesën e Jeremiqit për takim, për shkak të qëndrimit jo të drejtë të Serbisë ndaj Kosovës.

Uashington-Në një prononcim për “Washington Times”, një zyrtar amerikan vlerëson se Jeremiqit nuk i është mundësuar takimi me Sekretaren amerikane, Hilari Klinton, sepse, siç ka thënë ai, ajo është e zënë, dhe në vend të saj do të takohet me zëvendësin James Steinberg.
Po i njëjti zyrtar i lartë amerikan i ka thënë gazetës se arsyeja është bashkëpunimi i pamjaftueshëm i Serbisë për ndërtimin e kapaciteteve të drejtësisë, policisë dhe doganave në Kosovë.
Këto përpjekje udhëhiqen nga misioni i Bashkimit Evropian për sundimin e ligjit. Zyrtari amerikan ka thënë se në pjesën e përzier jugore ka përfaqësues të serbëve në Policinë e Kosovës, por jo edhe në pjesën veriore, të banuar kryesisht me serbë.
"Trendi po shkon në kahe të drejtë, por ka edhe shumë rrugë për të bërë në kuptimin qenësor", i ka thënë gazetës zyrtari amerikan.
Edhe vet Jeremiqi ka pranuar se çështja e Kosovës mbetet problem në marrëdhëniet me Uashingtonin.