100 vjetori nderon të gjithë territoret shqiptare

nga **Agim Gashi** Mon Oct 29, 2012 8:59 pm

100 vjetori nderon të gjithë territoret shqiptare

Kryeministri Berisha në mbledhjen e Grupit Parlamentar të Partisë Demokratike 29/10/2012
Berisha: Kundër hoxhistëve, busti në Tiranë, lartëson figurën e Ismail Qemalit

Kryeministri Berisha gjatë mbledhjes së sotme të Grupit Parlamentar të Partisë Demokratike e vuri theksin tek festimet për 100-vjetorin e Pavarësisë, ndërsa cilësoi vizitën e Sekretares së shtetit amerikan Hillary Clinton, si ngjarjen më të shënuar.

“Besoj se për çdo shqiptar ngjarja më e shënuar është vizita e sekretares Hillary Clinton këtë javë në Shqipëri, kjo ngjarje e madhe përbën edhe momentin më kulmor të këtyre festimeve. Ajo vjen për të shprehur nderimet e saj për kombin shqiptar në këtë 100- vjetor, vjen si një mike e madhe. Kjo mbetet ngjarja më e rëndësishme në festime dhe i uroj mirëseardhjen më 1 nëntor kryediplomates me sukseset më të shënuara dhe me popullaritetin më të lartë”, tha Berisha.

Duke u ndalur tek deklaratat e fundit të disa përfaqësuesve të PS, se në këto festime po anashkalohet Vlora, si dhe po errësohet figura e Ismail Qemalit, Berisha nënvizoi edhe njëherë se ato nuk janë gjë tjetër veçse deklarata hoxhiste dhe të pavërteta, siç tha ai.

“Në lidhje me festimet ka pasur edhe qëndrime hoxhiste të së shkuarës, të pandershme.
Thuhet se po përjashtohet Vlora nga protokolli shtetëror apo po bëhen përpjekje për të errësuar figurën e Ismail Qemalit. Vlora në veçanti në këtë 100-vjetori nderohet në shkallën më të lartë. Ngjarja festohet në mbarë trojet shqiptare, por në veçanti festime do ketë në Tiranë, është kryeqyteti i Shqipërisë, në të cilin dhe drejt të cilit janë drejtuar mendja dhe zemra e të gjithë shqiptarëve. Do ketë peshën më kryesore dhe vendin më kryesor. Ky është një realitet që s’mund të jetë ndryshe”, tha Berisha, ndërsa përmendi edhe rastet e SHBA apo Italisë që festimet i kanë kryer në kryeqytet, pavarësisht vendit ku u firmos akti i pavarësisë.

Kryeministri theksoi edhe njëherë se, “Vlora është përfshirë në mënyrë thelbësore në protokoll, asnjë lloj varianti nuk ka pasur që të përjashtohet Vlora. Festimet fillojnë në Shkup më datën 25, ishte epiqendra e të gjitha përpjekjeve shqiptare, vazhdojnë në Prishtinë me inaugurimin e autostradës, vazhdojnë në Vlorë, pra bëhet fjalë për një program dinjitoz. Të jemi të vetëdijshëm se pavarësia është kontribut dhe i përpjekjeve të mëdha etë trevave të tjera”, shtoi ai.

Sipas kreut të qeverisë, Ismail Qemali e ka firmosur deklaratën e Pavarësisë në Durrës, e më pas ka shkuar në Vlorë për të ngritur flamurin. Ai shtoi më tej se të gjitha deklaratat e bëra nuk janë gjë tjetër vecse qëndrime hoxhiste, prej të cilave Shqipërisë është ndarë, sic tha Berisha.

“Sot një historian më sjell deklaratën e Pavarësisë të firmosur në Durrës, ai e la këtë dokument aty që me qëllim që po ti bënin prita, dokumenti të ruhej. Ai ishte maratonomaku i pavarësisë, themeluesi. Ka deklarata të turpshme primitive, s’kanë asnjë lloj sensi. Për herë të parë pas 100-vitesh përmendorja e tij po vendoset në Tiranë, gjë që duhet të ishte bërë që kur Tirana u shpall kryeqytet. Këto janë qëndrime hoxhiste, nga të cilat jemi ndarë. Asgjë nuk mund të zvogëlojnë veprën e ndritur të tij, në 100 vite nuk iu vendos përmendorja në Tiranë, ai ishte lider, themelues i pavarësisë”, tha kryeministri.

Kreu i qeverisë shtoi edhe njëherë se festime për 100-vjetorin do ketë në të gjitha trojet shqiptare, ndërsa shtoi se “Vlora ka pjesën e luanit, kryeqendër mbetet Tirana”.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30