Kryeministri i jep kredi djalit

Kryeministri i jep kredi djalit






Kryeministri i Republika Srpska (RS), Milorad Dodik, pranoi se kompania që për bashkëpronar ka djalin e tij ka marrë kredi prej 3 milionë markash konvertibile (rreth 1.5 milionë euro) nga Banka Investive-Zhvillimore e RS (IRB), e cila është në pronësi të qindpërqindtë shtetëror.

Nga Express më 23.04.2009 në ora 20:26

Banjalluka, 23 prill – “E vërtetë është që në vitin 2008 i është dhënë një kredi nga IRB. Djali im është bashkëpronar i kompanisë, por unë nuk shoh këtu arsye që kjo gjë të jetë problem. Unë jam krenar në djalin tim, ngase është një çun i mrekullueshëm, nuk është as hajn as narkoman”, deklaroi Dodik gjatë seancës së parlamentit të RS.
Në web-faqen zyrtare të IRB RS është publikuar e dhëna se kompanisë Fruit Eko, bashkëpronar i së cilës është djali i kryeministrit të RS, i është ndarë kredia prej 3 milionë markash.

Dodik ndërkohë deklaroi se në bazë të kamatave të arritura deri tani, kompania e djalit të tij ka paguar 120,000 marka, dhe se nga mjetet e fituara kreditore janë mbjellë 160,000 fidanë molle dhe është ndërtuar ftohësi me kapacitet prej 200 vagonësh.

“Vetëm dëshiroj që ai (djali) të bëhet njeri i mirë dhe që të ketë me çka të merret. Mendoj se kjo duhet lavdëruar, sepse askujt nuk i është bërë dëm, e as nuk është shkelur ndonjë ligji i republikës. Për shkak se është djali im s’do të thotë se duhet eliminuar nga çfarëdo mundësie për të punuar”, tha kryeministri i RS.
Ndryshe, në debatin rreth afarizmit të IRB RS opozita akuzoi bankën në fjalë për nepotizëm dhe proteksionizëm gjatë plasmanit të mjeteve të bankës.

Partitë opozitare theksuan se kredi milionëshe u janë ndarë anëtarëve të familjes së kryeministrit, Milorad Dodlik, kompanive të afërta me strukturën qeveritare, ndërmarrjeve që nuk kanë kryer dertimet tatimore ndaj shtetit por që janë të afërta me qeveritarë, si dhe kompanive pronarë të cilave janë disa nga deputetët e partisë në pushtet, SNSD.

Deputetët e partisë SNSD u përgjigjën se gjatë plasmanit të mjeteve kreditore nuk kishte proteksionizëm, por se të gjitha ishin bërë sipas rregulloreve në fuqi, duke theksuar se rrezikun për mjetet e ndara e bartin bankat komerciale përmes të cilave ndahen mjetet e IRB. (BETA)