PDK e LDK, fajësojnë njëra-tjetrën për bllokimin e reformës

nga **Agim Gashi** Sun Nov 04, 2012 9:58 pm

PDK e LDK, fajësojnë njëra-tjetrën për bllokimin e reformës

Po bëhen disa muaj që reforma kushtetuese ka ngecur. Subjektet më të mëdha politike, PDK e LDK, e fajësojnë njëra-tjetrën për bllokim të këtij procesi. Ndërkohë, Gjykata Kushtetuese pas vlerësimit që ka dhënë për amandamentet e ndryshuara, ka thënë se më shumë se gjysma e tyre janë antikushtetuese dhe si të tilla nuk mund të miratohen në Kuvend.

Megjithëse nga Gjykata Kushtetuese e Kosovës është thënë se mbi gjysma e amandamenteve të propozuara nga Komisioni për reformën kushtetuese janë antikushtetuese, kryetari i këtij komisioni, Arsim Bajrami insiston që reforma të vazhdojë dhe të implementohet si e tillë. Bajrami thotë se me gjithë gjetjet nga Gjykata Kushtetuese, reforma duhet të vazhdojë.

“Reforma kushtetuese lidhur me presidentin duhet domosdo të implemetohet sepse vendi përseri do të bie në krizë sa herë që të zgjedhet presidenti. Pa marrë parasysh disa gjetje që nuk janë të qëndrueshme, mendoj se duhet tani një koncensus politik sepse mosvotimi i amandamenteve kushtetuese po e bllokon edhe reformën zgjedhore”, tha Bajrami për transmetuesin publik.

Kryetari i Gjykatës Kushtetuese, Enver Hasani në një intervistë televizive ka thënë se 60% e amendamenteve që janë propozuar kanë pasur synim realizimin e marrëveshjes politike. Mirëpo, ai ka theksuar se Gjykata nuk funksionon me sanksione të marrëveshjeve politike që bëhen. Hasani ka paralajmëruar se në asnjë formë, amendamentet të cilat u cilësuan si anti-kushtetuese nuk mund të votohen në Kuvend.

Kryetari i Komisionit për ndryshimet kushtetuese, deputeti i PDK-së Arsim Bajrami nuk deshi t’i komentojë deklaratat e kreut të Gjykatës Kushtetuese, ndërsa anëtari i këtij komisioni nga LDK-ja, Arben Gashi, i quajti të papërgjegjshme.

“Gjykata kushtetuese ka vetëm një vlerësim që jep, se a prekin, a zvogëlojnë apo jo të drejtat e njeriut, asnjë gjë tjetër uk është në kompetencën e gjykatës që të jep vlerësim. Gjykata kushtetuese vetëm e bën një vlerësim se në bazë të gjykimit të saj a preken apo jo të drejtat dhe liritë e njeriut. Pastaj është prapë Kuvendi që vendos, sepse edhe Gjykatën Kushtetuese edhe Kushtetutën vetë i miraton Kuvendi”, tha Gashi.

Gashi i cili akuzon PDK-në se e ka bllokuar këtë proces për shkak të mosrespektimit të marrëveshjes politike, nuk ka përgjigje se kur do të shkojnë në Kuvend ndryshimet kushtetuese.

Sidoqoftë, Komisioni për ndryshimet kushtetuese e ka kryer punën sa i përket amandamenteve kushtetuese që kanë të bëjnë me zgjedhjen e drejtpërdrejt të presidentit dhe u mbetet subjekteve politike që të arrijnë konsensus për miratimin e tyre në Kuvendin e Kosovës.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30