100 vjet shtet Shqipëria, qeveria: Ditë feste në Kosovë

nga **Agim Gashi** Thu Nov 22, 2012 12:26 pm

100 vjet shtet Shqipëria, qeveria: Ditë feste në Kosovë

Mbledhja e 103-të e Qeverisë së Republikës së Kosovës
Qeveria e Kosovës në mbledhjen e mbajtur sot pasdite, drejtuar nga kryeministri Hashim Thaçi, miratoi vendimin që 28 Nëntori, dita e mërkurë, të jetë Ditë Feste në Republikën e Kosovës, për nderë të Ditës së Flamurit dhe jubileut të 100 vjetorit të shpalljes së pavarësisë së shtetit shqiptar.

Edhe derisa mbante mbledhje Qeveria, kryeqyteti i Kosovës, Prishtina, vazhdonte me ngritjen e mijëra flamujve kombëtarë kuqezi në sheshe, rrugë e ndërtesa, me “mbulimin” me drita, me shumë urime dhe shqiponja dykrenare edhe në pano të mëdha-bilborda…Në një atmosferë shumë të gëzuar, shesheve e rrugëve plot njerëz, vazhdonin përgatitjet finale të pragfestës së 28 Nëntorit, të cilat janë vazhdimësi e festimeve të vitit jubilar të 100 vjetorit të Pavarësisë së Shqipërisë.

Edhe në Ambasadën e Republikës së Shqipërisë në Republikën e Kosovës bëheshin përgatitjet finale për pritjen festive me rastin e 100 Vjetorit të Pavarësisë së Shqipërisë, që do organizohet në mbrëmjen e 26 Nëntorit.

Dita e 28 Nëntorit në 100 Vjetorin e Pavarësisë së Shqipërisë do jetë ditë feste në Republikën e Kosovës, ndërkohë që Ligji ndër festat shtetërore përcakton ndër këto festa Ditën e Pavarësisë së Republikës së Kosovës, 17 Shkurtin.

Sipas Ligjit për festat zyrtare të Republikës së Kosovës, 28 Nëntori nuk radhitet në këto festa, por në “ditët memoriale” si “dita e shqiptarëve”. Megjithatë, kudo shqiptarët në Kosovë e festojnë këtë ditë si tradicionalisht, si Ditë të Flamurit Shqiptar dhe të Pavarësisë së Shqipërisë.

Edhe kur ishte i ndaluar, Flamuri Kombëtar Shqiptar është shpalosur dhe ka valuar në këtë ditë në shtëpitë shqiptare të Kosovës dhe në institucionet e tyre, edhe në kushte okupimi, gjithnjë në ecje të vendosur e plot sakrifica drejt lirisë, pavarësisë e demokracisë.
Ndër veprimtaritë e shumta festive në Kosovë, nesër në Universitetin e Prishtinës “Hasan Prishtina” mbahet Tryeza shkencore kushtuar 100 Vjetorit të Pavarësisë së Shqipërisë.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30