Vullnet Mato:LUMTURI S’KISHTE ASKUND

nga **Agim Gashi** Fri Nov 23, 2012 9:23 pm

Vullnet Mato

LUMTURI S’KISHTE ASKUND

Kisha dëgjuar prej kohësh
të flitej me etje për lumturi,
po nuk pata rast ta ndjej
brenda shpirtit të mundshme.
Kureshtja ime e ndezur
për ta parë një herë me sy,
më shndërroi papritmas
në flluskë të tejdukshme.

Dhe hyra nëpër shpirtra
te disa multimiliarderë.
Pashë se qenë tepër të velur
me qumësht dallëndyshje
dhe deri në fyt me orgjitë
e të gjitha qejfeve pa frerë,
por ishin tejet të babëzitur,
për superfitime shumëfishe.

Hyra në shpirtrat e yjeve
më vezullues të Hollivudit.
Jetonin netë të ethshme,
pa kyçur qepallat në gjumë,
përdornin substanca narkotike
me gjumëndjellës të fundit,
për të kapur një rol të ri,
ku të shkëlqenin më shumë.

Te zonjat e Para të shteteve
hyra në shpirt me vështirësi,
se kishin secila nga një gardh
me shpirtra badigardë përqark.
Fustanet e çdo mode, vathët,
unazat, varëset vetëtinin flori,
por pasiguria e rizgjedhjes,
ua bënte të tëra qymyr e baltë.

Hyra në shpirtra këngëtarësh
me emra tepër të famshëm,
kur fansat jehonin për ta
bubullimat e brohoritjeve.
Por teksa goja u këndonte,
shpirti u lotonte përvajshëm,
se nëpër tregjet muzikore,
vijonte rënia e shitjes së disqeve.

Pasi kërkova përqark botës
dhe askund nuk gjeta njeri,
të qe i lumtur me milionat,
apo me famën si Vip i shquar,
mendova, kot jam lodhur
të kërkoj për vete lumturi,
duhet të jem shumë i lumtur
që nuk jam njeri i mjeruar...

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30