Protestuesit kërkojnë lirimin e Limajt – bllokojnë përurimin e autostradës

nga **Agim Gashi** Tue Nov 27, 2012 12:55 pm

Protestuesit kërkojnë lirimin e Limajt – bllokojnë përurimin e autostradës

(I plotësuar) - Një grup protestuesish janë mbledhur në fshatin Gjurgjicë, ku ishte planifikuar përurimi i segmentit të 5-të të autostradës “ Rruga e Kombit – Ibrahim Rugova”, duke penguar këtë ceremoni dhe duke brohoritur – "Liri për Fatmir Limajn”.

Protesta ishte paralajmëruar se do të organizohet nga ish pjesëtarët e Ushtrisë Çlirimtare të Kosovës të Brigadës 122 “Kumanova”.

Protestuesit kanë hipur edhe në binën ku ishte planifikuar që të fliste edhe kryeministri Hashim Thaçi për të pamundësuar mbajtjen e ceremonisë.

Zëdhënësi i Policisë së Kosovës, Baki Kelani tha se informacionet që posedon policia flasin që “ky grup protestuesish është mbledhur në fshatin Gjurgjicë dhe ka brohoritur”, duke kërkuar liri për Fatmir Limajn.

“Policia është në vendin e ngjarjes, por këto janë informacionet që aktualisht posedojmë”, ka thënë Kelani.

Protestuesit po qëndrojnë akoma duke kërkuar lirimin e njërit prej ish-komandantëve të UÇK-së, Fatmir Limaj i akuzuar nga EULEX-I për krime lufte dhe I cili nën këtë akuzë po mbahet në paraburgim prej 30 ditëve.

“Nëse doni të festoni, Fatmir Limajn duhet ta sillni” – dëgjoheshin brohoritjet e protestuesve.

Përurimi i autostradës “Ibrahim Rugova” ishte planifikuar nga Qeveria e Kosovës si një prej shënimeve kulmore në kuadër të kremtave për 100 vjetorin e pavarësisë së Shqipërisë dhe ditës së flamurit shqiptar.

Në vendin e ngjarjes kanë mbërritur edhe forcat policore, mirëpo zëdhënësit e Policisë së Kosovës aktualisht nuk janë prononcuar për këto zhvillime.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30