LDK: Me këtë qeverisje po largohemi nga Evropa

nga **Agim Gashi** Sun Dec 16, 2012 8:40 pm

LDK: Me këtë qeverisje po largohemi nga Evropa

Papunësia në Kosovë, vazhdon të mbetet alarmante. Ajo arrin rreth 48 për qind dhe se në zyrat e punësimit janë të regjistruar mbi 330 mijë punëkërkues.
Qeverisja Thaçi po diskriminon 42 mijë persona të moshës 15-18 vjeçare dhe se kjo Qeveri nuk e di sa është papunësia, pasi që të dhënat më të fundit zyrtare, janë për vitin 2009, kur papunësia vlerësohej të jetë rreth 45 për qind. Kështu thanë në një konferencë për media ekspertët e LDK-së, të cilët folën për tregun e punës dhe papunësinë në vend , duke bërë po ashtu dhe krahasime me vendet e rajonit.
Avdullah Hoti, ekspert në LDK tha se papunësia e lartë dhe mungesa e zhvillimit ekonomik, i kanë shuar shpresat e të rinjve për të ardhmen dhe se kjo është arsyeja pse tendenca për të emigruar, është tepër e lartë, gjë që ka pasoja në procesin e liberalizimit të vizave me BE-në. Vlerësimi kryesor i këshillit të ekspertëve të LDK-së, sipas tij është se Qeveria Thaçi nuk e di se sa është papunësia dhe se nuk po e bën as më të voglën përpjekje për matjen e shkallës së papunësisë në vend. Megjithatë sipas tij të dhënat e fundit, flasin për një gjendje alarmante, sa i përket papunësisë në Kosovë.
“Të dhënat e fundit tani nga organizatat botërore tregojnë se papunësia në fakt është alarmante. Kjo arrin në 48 për qind të tregut të punës. Ndërkohë që zyrat e punësimit prezantojnë të dhëna përreth 330 mijë persona të papunë. Ja si është bilanci i qeverisë Thaçi, lidhur me punësimin dhe papunësinë në fund të këtij viti. Mesatarisht vetëm dy nga 10 persona të moshës së punës janë të punësuar”, tha ai.
Hoti po ashtu pohoi se me qeverisjen Thaçi, Kosova në çdo aspekt po largohet nga Evropa. Sipas tij papunësia në Kosovë është shumë më e lartë se sa vendet përreth nesh si Mali i Zi, Maqedonia e Bosnja.
“Sa i përket krahasimeve me rajonin dhe Evropën me qeverisjen Thaçi, Kosova në çdo aspekt po largohet nga Evropa. Faji i këtij modeli unik të qeverisjes Thaçi, të zhvatjes dhe korrupsionit, Kosova nuk krahasohet as me vendet e rajonit e lë më Evropën. Të dhënat që ne kemi nxjerrë tregojnë se norma e papunësisë në Kosovë është tri herë më e lartë se sa në Malin e Zi, ose dy herë më e lartë se në Bosnje”, tha ai, raporton Express..
Numrit të madh të papunëve, vazhdojnë t’i prijnë femrat. Sipas analizës së grupit të ekspertëve të LDK-së, diferencat janë tepër të larta në mes të meshkujve dhe femrave. Vetëm 1 në 10 femra është e punësuar, krahasuar me 3 në 10 meshkuj dhe se mbi 90 për qind e të papunëve, janë të papunë për më shumë së një vit.
Hoti po ashtu theksoi se Ligji i ri për të papunët , diskriminon dhe shkel të drejtat njerëzore, pasi që të gjitha politikat e Qeverisë Thaçi, sa i përket uljes së papunësisë përmblidhen në ligjin e ri për regjistrimin e të papunëve. Me këtë ligj diskriminues, sipas tij të papunët obligohen që të regjistrohen në zyrat e punësimit të administruara nga Ministria e Punës dhe Mirëqenies Sociale dhe se ky ligj shkel të drejtat elementare njerëzore dhe i cili përcillet me plot anomali.
Me këtë ligj të ‘jashtëzakonshëm’, duke mos i njohur si të papunë personat nën 18 vjeç, Qeveria Thaçi, sipas Hotit, i hequr nga lista e të papunëve rreth 42 mijë të papunë.
Sipas kësaj analize, bilanci i punës së Qeverisë Thaçi në përmbyllje të këtij viti, është se vetëm 2 në 10 persona të moshës 16-64 janë të punësuar. Papunësia është e lartë sidomos për të rinjtë e moshës 15-24 vjeç. Vetëm 1 në 12 persona të kësaj moshe është i punësuar. Ndërsa të dhënat nga organizata ndërkombëtare, tregojnë se afër 40 për qind e qytetarëve të Kosovës jetojnë në varfëri të thellë me vetëm 1 euro në ditë ose me të ardhurat që marrin nuk arrijnë të sigurojnë konsumin e nevojshëm për zhvillimin afatgjatë.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30