Vullnet Mato:MBETUR NGA MUGËTIRA PRIMITIVE

nga **Agim Gashi** Tue Jul 23, 2013 9:11 pm

Vullnet Mato

MBETUR NGA MUGËTIRA PRIMITIVE

Në mugëtirën e hershme të lashtësisë,
njerëzit nuk zinin pusira,
për të vrarë njëri-tjetrin,
ende pa lindur mosmarrëveshjet.
Ata sajonin armë primitive,
të vrisnin vetëm egërsira,
t’u hanin mishin, t’u rripnin
lëkurat e ngrohta të veshjes.

Punën e ndyrë të vrasjes së njeriut
të egrit e mësuan pa shkaqe armiqësie,
thjesht se u kishte lindur lakmia,
për rezerva ushqimi dhe lëkura.
Atëherë përsosja e armëve
nevojitej për dy lloj gjuetie,
për vrasje kafshësh,
dhe për shfarosje burrash.

Përderisa njeriu e shihte veten
paralel me rangje kafshërie,
vrasja u bë puna parë
në tërë veprimtaritë gjakësore.
Gratë nuk i vrisnin, se u duheshin,
veç lindjes së fëmijëve,
për të pjekur shpellave mishin
dhe rrënjët barishtore.

Kur mbuluan shenjat e trupit
me lëkura sorkadhesh,
gratë u bënë më të bukura
dhe hyri krimbi i xhelozisë në burra.
Kureshtja si mund t’i kishte
femra e tjetrit nishanet,
bëri që meshkujt të vërsuleshin
për të rrëmbyer gra të huaja.

Vrasja e grave filloi të dukej
në fiset e komunitetit primitiv,
kur ato u bënë pronë vetjake,
për burrat me fuqi muskulore,
që ndonëse me punë të barabartë,
në aktivitetin produktiv,
zunë të ushtrojnë forcën fizike,
kundër dobësisë femërore.

Egërsia vrastare e grave,
në kohën e sotme të modernizuar,
mbeti trashëgim nga mugëtira primitive,
që shfaqet ende te disa burra,
si atavizëm i turpshëm, tejet i shëmtuar...

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30