KMDLNj: Nis diferencimi në Bashkësinë Islame të Kosovës!

nga **Agim Gashi** Wed Aug 21, 2013 8:01 pm

Prishtinë, 21 gusht - Më 20 gusht 2013 në një mbledhje të jashtëzakonshme (pasi ka përfunduar mbledhja e rregullt) anëtarët e Kuvendit të BIK-ut me 23 vota për dhe 1 abstenim shkarkuan kryetarin e Kuvendit të BIK-ut, Xhabir Hamiti, pasi ai kundërshtoi futjen në rend të ditës pikën për ndryshimin e Kushtetutës së kësaj bashkësie me të cilën do të mundësohej që kryetari i BIK-ut të zgjedhjet me shumë se dy mandate. Në fakt, me Kushtetutën e BIK-ut i njëjti person nuk ka të drejtë që të zgjidhet në këtë pozitë më shumë se dy mandate. Një mandat është në kohëzgjatje 5 vjeçare.

Kryetari i BIK-ut, myftiu Naim Tërrnava është në përfundim të mandatit të dytë dhe pas dy muajve është paraparë të mbahen zgjedhjet në BIK meqë sipas Kushtetutës z.Tërrnava nuk ka të drejtë të kandidohet edhe për mandat të tretë.

KMDLNj edhe më parë ka reaguar duke kërkuar që zgjedhjet në BIK të jenë transparente, të përgjegjshme, të paanshme dhe pa iu nënshtruar presionit. Aq më parë që në BIK vazhdimisht ka pasur fërkime dhe akuza të ndërsjella për jotransparencë financiare, nepotizëm, formim të klaneve të caktuara që janë nën ndikim dhe shërbim të politikës dhe presion deri në përdorim të forcës ndaj atyre që nuk pajtohen me këto dukuri dhe të cilat kërkojnë respektimin e Kushtetutës së BIK-ut!

Krahu që ka përfaqësuar islamin tradicional me në krye Xhabir Hamitin është cilësuar negativisht nga krahu tjetër dhe janë bërë përpjekje që këta të eliminohen nga skena duke përdorur metodat e kërcënimit, zhvendosjes nga postet deri te dhuna fizike të cilës i janë nënshtruar Xhabir Hamiti dhe Mulla Osmani nga Drenasi. Përjashtimin e Xhabir Hamitit nga posti i kryetarit të Kuvendit të BIK-ut, me një procedurë të përshpejtuar, në një mbledhje të jashtëzakonshme KMDLNj e cilëson veprim arbitrar të kundërligjshëm dhe përpjekje për të ngulfatur lirinë e shprehjes brenda BIK-ut. Këtij vendimi i ka paraprirë deklarimi i z.Hamiti se brenda BIK-ut po bëhet fushatë që në mënyrë të kundërligjshme t’i sigurohet edhe mandati i tretë z. Tërrnava në krye të BIK-ut si dhe paralajmërimin se edhe Xhabir Hamiti do të kandidohet për kryeparin e BIK-ut. Kësaj fushate kohëve të fundit i është bashkangjitur në mënyrë aktive edhe me një agresivitet të pazakonshëm edhe LISBA (parti politike) e cila haptazi është deklaruar se me të gjitha mjetet do të angazhohet që z.Hamiti të mos zgjedhet në krye të BIK-ut dhe për këtë fare nuk ka pasur reagim nga BIK. Përgjegjësit e BIK-ut kanë mbajtur qëndrim oportunist duke heshtur ndaj dukurive të fyerjeve dhe sulmeve ndaj personaliteteve të shquara kombëtare që ka lënë të nënkuptohet se këtë e kanë bërë për të mbajtur dhe rifituar pushtetin.

BIK-u nuk ka reaguar kundër fyerjeve dhe linçimit publik që i është bërë deputetes Alma Lama. As kundër kërcënimeve dhe fyerjeve që i është bërë gazetës “Bota Sot” etj. Me mosveprim, distancim nga kërcënimet dhe ligjëratat e disa imamëve që më së paku kanë të bëjnë me fenë, BIK nuk i ka përmbushur detyrimet si autoritet suprem për çështje të fesë në Kosovë dhe duket se po profilizohet si parti politike që të vetmin qëllim e ka marrjen dhe mbajtjen e pushtetit me çdo kusht dhe në afat sa më të gjatë. Duket se pozita e kryetarit në BIK përveçse sjellë përfitime të mëdha ekonomike. Gjithashtu është i leverdishëm edhe në planin afirmativ. Sidomos tash kur po ndërtohet Xhamia e Madhe dhe po bëhet garë se cili myfti do të bëhet pjesë e historisë duke prerë shiritin e inaugurimit të këtij tempulli fetar e shpirtëror. Në BIK duhet ta kenë të qartë se të drejtat fetare janë të drejta njerëzore dhe se çdo përpjekje për ngulfatej të lirisë së fjalës, dhunë fizike dhe eliminim është shkelje e rëndë e të drejtave të njeriut dhe në kundërshtim të plotë me normat dhe vlerat fetare. Në radhë të parë të tolerancës e cila qartazi mungon në BIK.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30