Suspendohen tre zyrtarë policorë

Suspendohen tre zyrtarë policorë





Në bazë të hetimeve të para preliminare në lidhje me thyerjen e dhomës së provave të Policisë së Kosovës dhe me vendimin e drejtorit të Përgjithshëm të Policisë Sheremet Ahmeti, janë suspenduar tre zyrtarë policorë, një major dhe dy oficerë policie.
Suspendimi i sotëm ka të bëjë me përgjegjësinë menaxheriale dhe për shkelje disiplinore administrative.
Majori i suspenduar është zyrtar përgjegjës për sektorin mbështetës për sistemin vëzhgues të kamerave për sigurinë e objektit ish Qendra për Trajnime Policore.
Dy zyrtarët policor kanë qenë në detyrë për sigurimin e objektit datën që ka ndodhur vjedhja e rëndë më 25 prill 2009, në ish-Qendrën për Trajnime Policore në Prishtinë.
Këto veprime janë veprimet fillestare të këtij procesi hetimor, i cili do të vazhdojë në kontinuitet dhe duke u bazuar në rezultatet e hetimeve të brendshme do të ndërmerren edhe masa të tjera varësisht nga të gjeturat e këtyre hetimeve.
Në anën tjetër Task Forca e krijuar është duke vazhduar hetimet me intensitet të shtuar që personat e dyshuar për vjedhjen e rëndë sa më parë të vihen para organeve të drejtësisë, thuhet në një komunikatë të Policisë së Kosovës
Ndryshe, 47 kg e 627 gramë substancë narkotike të llojit heroinë, 7 bimë kanabis, 3828.5 euro para të gatshme, 520 rupi indian, 6.5 milionë lira të Turqisë 5.000 lej të Rumanisë, 950 lekë të Shqipërisë dhe 1 çantë e zezë sportive, e zbrazët, janë gjërat të cilat janë vjedhur nga dhoma e provave të Policisë së Kosovës të shtunën e kaluar.
Hetuesit policor dyshojnë që personat e dyshuar mund të kenë depërtuar brenda në këtë objekt përmes shkallëve emergjente prapa kësaj ndërtese.