A duhet plan për Mitrovicën?

A duhet plan për Mitrovicën?





Mitrovia, ende mbetet një sfidë për institucionet shtetërore të Republikës së Kosovës.


Problemi i Mitrovicës është vlerësuar si rasti më specifik njëherësh edhe sfidë për institucionet shtetërore të Republikës së Kosovës. Në këtë kontekst deputetë nga radhët e opozitës në Kuvendin e Kosovës kërkojnë që për Mitrovicën të hartohet një plan i veçantë, me të cilin do të kthehej normaliteti në këtë qytet, ata të partive në pushtet thonë të kundërtën. Deputeti nga radhët e Lidhjes Demokratike të Kosovës, Lutfi Haziri, thotë se për Mitrovicën ekziston plani dhe ai është dokumenti i presidentit Ahtisaari, që ka shërbyer edhe si bazë e Kushtetutës dhe ligjeve bazike shtetërore. Andaj, sipas Hazirit, nuk ka nevojë për plane shtesë. “Kthimi i qëndrueshëm në Mitrovicë, matanë lumit Ibër, tek Kroi i Vitakut dhe në lagjet tjera, është simbolikë e mirë e Qeverisë. Duhet të vazhdohet ky përkushtim dhe nuk guxojmë të ndalemi në realizimin e këtij projekti. Një plan i madh për Mitrovicën ekziston”, vlerëso Haziri duke shtuar se vet Pakoja e Ahtisaarit, është konvertuar në obligim kushtetues dhe se plani më i madh që duhet të zbatohet, lidhet me këto të drejta që në Mitrovicë, vonë a herët, do të tregojnë se është plani më i mirë, më i qëndrueshëm dhe më i realizueshëm në Kosovë. Ndërkohë, kryetari i Lidhjes Demokratike të Dardanisë, Nexhat Daci, është mjaft kritik ndaj institucioneve. Rastin e ndërtimit të shtëpive të shqiptarëve që duan të kthehen në lagjen Kroi i Vitakut në Mitrovicë, ai e sheh vetëm si një mbulesë që autoritetet, sipas tij, po u bëjnë problemeve të shumta në këtë pjesë të Kosovës. “Duhet të paraqitet program që e aprovon edhe Qeveria, por edhe opozita. Një program i detajuar në kohë dhe mënyrën e realizimit. Prandaj, unë e them që kjo qeverisje mua ma përkujton të kaluarën dhe komunizmin, shumë reklamë, shumë fotografime, shumë prerje të shiritave dhe aspak veprim atje ku kërkohet. Mendoj që është një propagandë krejtësisht në kohë të keqe e zgjedhur dhe as mënyra e propagimit nuk është e mirë”, thekson Daci. Në anën tjetër, deputeti i Aleancës për Ardhmërinë e Kosovës, Bajram Kosumi, thotë se plani për Mitrovicën duhet të ekzistojë, ngase vetëm ashtu mund të fillojë zgjidhja e problemit.
Deputeti Kosumi thotë se përderisa nuk ka plan për Mitrovicën, duhet kënaqur edhe me veprime të tilla, që të paktën një numër i banorëve të mund të shpresojë se do të rikthehet nëpër shtëpitë e tyre. Kosumi përshëndet vendosmërinë e EULEX-it që të mbrojë të drejtat legjitime të qytetarëve për t’u kthyer dhe jetuar në shtëpitë dhe pronat e tyre.
“EULEX-i sikur dëshiron ta dërgojë një sinjal se do të jetë i vendosur ta kryejë detyrën e vet si duhet. Nuk është fjala këtu vetëm për rindërtimin e disa shtëpive, por për normalizimin e jetës së përditshme të qytetarëve të Mitrovicës, qoftë ajo në veri apo qoftë në jug”, vlerëson Kosumi. Sidoqoftë, autoritetet qeveritare në Prishtinë thonë se janë të vendosura që në bashkëpunim me praninë ndërkombëtare të sigurojnë çdo qytetar se do të kthehet në shtëpinë dhe pronën e tij. //rel//

Tradhtojnë policët serbë, protestuesit ndalohen nga EULEX-i

Hysni Syla, BOTA SOT
Serbët sërish tentuan të pengojnë kthimin e shqiptarëve



Forcat e EULEX-it dhe Policisë së Kosovës, garantojnë vazhdimin e punimeve për shtëpitë e shqiptarëve në veri.

Policia e Kosovës, e përbërë nga serbët ka thyer urdhrat e komandës, duke lejuar ekstremistët serbë, që t’i afrohen pronave të shqiptarëve në lagjen “Kroi i Vitakut”. Por, ishte ndërhyrja energjike e EULEX-it, e cila nuk ka lejuar, që shqiptarët të viktimizohen në pronat e tyre, pasi besohet në vazhdimësi kanë kryer sulme të armatosura.

Të hënën ishin vetëm

Vetëm ekstremistët e njëjtë, rreth 100 sish, tashmë të izoluar edhe nga vetë serbët e lagjes, kanë qenë pjesëmarrës të tubimit protestues të së hënës, në lagjen veriore të Mitrovicës “Kroi i Vitakut”, në shenjë pakënaqësie për shkak të rindërtimit të pesë shtëpive shqiptare. Ata, edhe kësaj radhe kanë bërë përpjekje, nga ora 11.00, për të shkuar në drejtim të lokacionet ku po rindërtohen shtëpitë, me qëllim të ndërprerjes së punimeve, por pa sukses. Ndonëse një kordon i policëve serbë të Kosovës, u pozicionua kinse për t’i ndalur rebeluesit, duke shkuar në drejtim të tyre deri në hyrje të lagjes, por nga ajo që shihej, pa bërë fare përpjekje fizike për të ndërprerë marshimin e tyre drejtë shtëpive shqiptare. Kështu, rebeluesit me “lejen” e policëve serbë “shpërthyen” kordonin dhe u nisën në drejtim të zonës ku po punohej, duke brohoritur si zakonisht “Serbia, Serbia” dhe “Terroristë, terroristë”, por hasën në reagim të ashpër si asnjëherë deri tash të policëve të EULEX-it, të cilët hodhën pa ndërprerë breshëri gazi lotsjellës në drejtim të rebeluesve. E tërë hapësira ndërmjet policëve dhe protestuesve u mbulua nga gazi lotsjellës, kështu që rebeluesit u kthyen brenda në lagje.
Tekstin e plotë mund ta lexoni në numrin e ditës së martë të gazetës sonë