Sejdiu: Ahmet Krasniqi me bekimin e Presidentit Rugova u bë Ministër i Mbrojtjes

nga **Agim Gashi** Wed Nov 20, 2013 2:58 pm

Telegram i ish presidentit Fatmir Sejdiu për akademinë kushtuar ministrit të Mbrojtjes Ahmet Krasniqit

Ish presidenti i vendit, prof.dr.Fatmir Sejdiu i ka dërguar një telegram përshëndetës degës së LDK-së me rastin e mbajtjes së Akademisë kushtuar jetës së Ministrit të Mbrojtjes Ahmet Krasniqit, në 15 vjetorin e vrasjes. Në telegram thuhet: “Në pamundësi objektive që të marr pjesë në tubimin që Lidhja Demokratike e Kosovës në Gjermani organizon me rastin e 15 vjetorit të vrasjes të Kolonel Ahmet Krasniqit, Hero i Kosovës, dëshiroj të vlerësoj lartë angazhimin tuaj dhe të nëndegës Nordrhein-Westfalen për të përkujtuar figurën e veçantë të njeriut që dha kontribut të jashtëzakonshëm në luftën për lirinë dhe pavarësinë e Kosovës.
I dalë nga një familje me tradita atdhetare të sprovuara në dekada në luftën kundër zaptuesve të Kosovës, Ahmet Krasniqi me gjithë qenien e tij i mbeti besnik këtyre idealeve duke u rreshtuar me përgjegjësi të mëdha në anën e gjithë njerëzve të lirisë së vendit tonë të dashur.
Si oficer karriere, kolonel Ahmet Krasniqi, gjithë dijen e tij prej vizionari dhe strategu në artet e luftës së armatosur dhe gjithë personin e tij fizik deri në ditën e vrasjes mizore e vuri në shërbim për organizimin e rezistencës dhe luftës së armatosur kundër okupuesve të Kosovës. Si Ministër i Mbrojtjes i Republikës së Kosovës, ai mori besimin dhe bekimin e Presidentit Historik të Kosovës Dr.Ibrahim Rugova që të vihet në ballë të organizimit të operacioneve luftarake në ato vite të vështira që e kërcënonin zhbërjen e Kosovës. Gjithë njerëzit e tij, atdhetarët e përkushtuar, si kuadri i oficereve ashtu dhe ushtaret e Ushtrisë Çlirimtare të Kosovës, të dëshmuar në operacionet e deriatëhershme, nuk kishin qellim tjetër pos çlirimin sa më të shpejtë të vendit dhe ndërtimin e Kosovës së re si shtet demokratik dhe sovran.
Në vlugun e këtyre organizimeve të fuqishme, në ditën e kobshme para 15 vitesh, duar tinëzare e shuan jetën e tij prijësi të veçuar, për të bërë kështu një dëm të pariparueshëm luftës çlirimtare.
Është fat i keq që as sot pas 15 vitesh nuk është ndriçuar vrasja e tij mizore sikur edhe vrasjet e shumë atdhetarëve të tjerë paslufte në Kosovë.
Duam të shpresojmë se si në Shqipëri e po ashtu edhe në Kosovë do të bëhet punë më e madhe për ndriçimin e këtyre orëve të zeza e vrastare që morën jetët e njerëzve të mëdhenj të Kosovës.
Si President i vendit, duke u mbështetur në Kushtetutën e Republikës së Kosovës, në 10 vjetorin e vrasjes, për meritat dhe guximin e jashtëzakonshëm të tij, kolonel, Ahmet Krasniqin Ministër i Mbrojtjes i Republikës së Kosovës, e kam dekoruar me urdhrin më të lartë Hero i Kosovës. I përkulemi thellë përkushtimit të tij jetësor”, ka shkruar prof.Dr.Fatmir Sejdiu, President i Republikës së Kosovës 2006-2010. BS

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30