Kandidatët për Komuna:Ramush Tahiri, kandidat për Ferizaj

Ramush Tahiri, kandidat për Ferizaj



Nga Bardh Frangu

Analisti politik, Ramush Tahiri, mund të jetë kandidat i LDD-së për kryetar të Komunës së Ferizajt dhe të jetë i mbështetur nga AAK-ja, në zgjedhjet që pritet të mbahen sivjet në vjeshtë. Kështu ka bërë të ditur kryetari i Degës së AAK-së në Ferizaj, Kemail Ramadani.

Në një konferencë për gazetarë, të enjten, Ramadani ka pranuar se po flitet që Ramush Tahiri, ish-këshilltar i Nexhat Dacit, të jetë kandidat i LDD-së për kryetar të Komunës së Ferizajt.

“Unë personalisht do ta kisha përkrahur një kandidaturë të tillë. Sepse na duhet një kandidat që do të mund të përballej me kryetarin aktual të komunës, Bajrush Xhemaili. Megjithatë kjo varet nga qendra, jo nga Dega jonë”, ka thënë kryetari i Degës së AAK-së, Kemail Ramadani.

Ramadani nuk e ka përjashtuar mundësinë se si kandidat i mundshëm për kryetar të komunës së Ferizajt nga radhët e AAK-së të jetë edhe Faik Grainca, aktualisht nënkryetar i Degës së LDK-së, në Ferizaj, njëherazi ish kryetar i komunës në mandatin e kaluar. “Unë personalisht nuk kam biseduar me Graincën, por mund të jetë, pse jo. Për këto punë nuk vendosi vetë, por në bashkëpunim me qendrën”, ka thënë kryetari i Degës së AAK-së, Kemail Ramadani.

Ai e ka pranuar faktin se vetë nuk do të jetë kandidat për kryetar komune. “Kam qenë njëherë kandidat. Le ta provojnë të tjerët”, ka thënë Ramadani.

Ai ka mohuar të kenë biseduar me partitë tjera opozitare për një kandidat të mundshëm të përbashkët. “Jo, një gjë e tillë nuk është biseduar”.

Ai ka përsëritur se takimi i paradokohshëm i përfaqësuesve të AAK-së, LDD-së, ORA-s dhe PD-së ka qenë vetëm një “takim për kafe”.