Vullnet Mato:VOGËLUSHI I NGUJUAR...

nga **Agim Gashi** Mon Jun 23, 2014 2:40 pm

Vullnet Mato

VOGËLUSHI I NGUJUAR...

Ti s’je thjesht vogëlush nëne,
mbyllur për fajin e ndëshkuar,
por viktimë mortore gjëme,
që pret plumbin e mallkuar...

Je turpi i shtetit që s’ka veshë,
ku u zbraz plumbi, ku u mbush,
që s’i nxihet faqja, se ti vdes,
nga pafajësia jote, o vogëlush...

Brenda mureve të blinduar,
vizaton njëmijë e ca dëshira,
që t’i shuan, ende pa u zgjuar,
hija e plumbit nga shkretëtira...

Ah, ai plumb gjakësor i zi,
që ti s’di kur të ndal frymën,
nuk u derdh në bronz për ty,
o trëndafil çelur në dimër...

O shpirt i vogël, pikuar dritë,
lastar i ri, në degë të lisit,
si mund t’i shlyej gjaku yt
hakmarrjet e vjetra të fisit?...

Ngujimi të burgosi lodrat,
gazin në grykë ta lidhi nyje,
të ndali vrapin nga kodrat
të la pa shokë fëmijërie...

Plumbi pas një reje, fshehur
rrufe tinëzare e fatit tënd,
s’pret veç ty, për t’u shkrehur,
godet zemrën tek çdo nënë.

Përsheshi njomur me lot valë
që ti gëlltit me dridhma frike.
pluhur në gojë ma bën çdo fjalë,
ma shpon zemrën me maja thike.

Kot shkruaj vargje dashurie,
me fantazi metaforash stisur,
kur ti, o zog, mbetur pa qiell,
qan trishtimin me lot të hidhur...

Ç’më duhen puthjet e rimave,
me ca ndjesi të holla vjershe,
kur syri yt, pret vdekjen vrimave,
pa i shijuar asgjë kësaj jete!...

Oh, si quhet normal shkollimi,
me rritje numrash në statistika,
kur ti, vogëlush, të kalb ngujimi,
xhelat mbi krye të rri frika!?...

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30