Vullnet Mato:AH, KJO BOTA JONË ZVARRANIKE!...

nga **Agim Gashi** Mon Aug 25, 2014 12:18 pm

Vullnet Mato

AH, KJO BOTA JONË ZVARRANIKE!...

Ah, kjo bota jonë, me ecuri zvarranike,
si nëpër shi dimri dhe me diell në verë!
Ku ndizen e shuhen fishekzjarre politike,
ku e ndjejmë veten pa shpresë e pa vlerë!...

Ku kërkojmë ndryshimin e monotonisë,
se zhurmat e zemërimit s’na lënë të qetë,
ku zhytur në dëshpërimin e papunësisë,
ankimet tona tretën si kripa në det.

Kjo botë i bëri njerëzit braktisës në ikje,
të gjejnë vatra të huaja, për hyzmeqarë,
t’i lënë vatrat e mallit, shumë vite në fikje,
të lindin fëmijë gjuhë-krasitur e vetmitarë.

Ëndërruam të çelnin ngjyrime të reja jete,
horizonte të kthjellëta të kishim në shpirt.
Të na shihnin sytë, tek çdo sy buzëqeshje.
Të lartohej e nderohej kushdo me meritë.

Të kishin vlerë më tepër se një karrige zyrtari,
krijimet e artit me petalet e shpirtit njerëzor,
që shpërfillen si gjethet që shkërmoq janari,
nga mediokrit që kanë vlerësimet në dorë!...

Ç’janë këta“heronj”të mbirë, pa vepra heroike,
si kërpudhat, pas shiut të fjalëve me rrebesh,
kur mbillen premtime dhe korren harrime sklerotike,
kur asgjë s’ndryshon dhe njeriu pret kot e hesht?...

Kur njëri vjen të shembi ato që ka ngritur tjetri
dhe përsëritet përherë e njëjta metodologji,
fillohet nga zeroja, duke mohuar të vjetrit,
për të bërë emër, pa hapur faqe të re në histori.

Ç’dreq bote pa ecuri të reja, qenka kjo e jona,
kur maternitetet mbushen me bebe përjetësie,
dhe varrezat, ngjiten deri lartësive mbi kodra,
kurse jeta mbledh lëmshe të mëdhenj kotësie?!…

Dilema, jeton për të ngrënë, apo ha të jetosh,
anon nga të jetuarit për të ngrënë me dy lugë,
kur atyre që vijnë pas nesh, u lëmë lugët bosh,
duke mbushur me plehra kazanë dhe rrugë?

Nuk jam nihilist, të mohoj ca rrëke zhvillimore,
por sot priten lumenj begatie, të zbutin hallet,
të ketë vërshime energjie, në parcelat njerëzore,
të ngrihen e të zgjaten urat me botën e madhe...

Vullnet Mato:AH, KJO BOTA JONË ZVARRANIKE!... 10625029_1461973740737612_8832872587735521337_n

Vullnet Mato:AH, KJO BOTA JONË ZVARRANIKE!... 10625029_1461973740737612_8832872587735521337_n

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31