Alma Lama i përgjigjet Haki Rugovës: Mos u brengos për të ardhmen tonë, por për të partisë

nga **Agim Gashi** Fri Dec 12, 2014 3:55 pm

Alma Lama i përgjigjet Haki Rugovës: Mos u brengos për të ardhmen tonë, por për të partisë

Deputetja e Lidhjes Demokratike të Kosovës, Alma Lama ka reaguar ndaj deklaratave të nënkryetarit të partisë, Haki Rugova, i cili ndër të tjera tha se deputetët që nuk e votuan Isa Mustafën janë shembull i keq. Madje, Rugova tha se këta deputetë të rinj, ndonëse patën perspektivë në LDK, sipas tij, ata “falimentuan”.
Mirëpo, Alma Lama në një bisedë për Gazetën Blic thotë se ky sulm i Haki Rugovës vjen si përgjigje për ta shfajësuar veten dhe të tjerët ndaj elektoratit, siç shprehet ajo të indinjuar të LDK-së.
“Është për të ardhur keq që zotëria i nderuar po mundohet të shpallë fajtorë kujdestarë deputetët parimorë që votuan kundër PDK-së, për të shfajësuar veten dhe të tjerët ndaj elektoratit të indinjuar të LDK-së për koalicionin”, ka thënë Lama.
Deputetja e LDK-së, ka thënë se Haki Rugova mund të ketë eksperiencë të gjatë në LDK dhe e di se si kanë votuar deputetët në të kaluarën, por e ka këshilluar Rugovën që të mos merret me krahasime me vendet evropiane, pasi sipas saj ai nuk ka njohuri se si funksionojnë partitë në ato vende dhe se si votojnë deputetët.
“Veç për dijeninë e tij, në vendet evropiane, partitë, respektojnë barazinë gjinore 50 me 50, e nuk janë odë burrash si këtu”, ka thënë Lama në këtë bisedë.
Lama ka thënë se akuzat e Rugovës kinse rebelimet kanë ardhur për shkak të posteve nuk qëndrojnë. Sipas saj, postet i caktuan klanet brenda LDK-së, pa kurrfarë kriteri.
“Nuk mund ti shitet askujt akuza se ishin të pakënaqur për poste, kur dihet se deputetja më e votuar në Kosovë refuzoi postet. Por meqë i përmend postet e ministrave, ato u caktuan nga klanet brenda LDK-së pa asnjë lloj kriteri, as të votës e as të aftësive, njëjtë siç qe bërë edhe lista e kandidatëve për deputetë”, ka thënë Alma Lama.
Sipas saj, këto klane po e pengojnë edhe demokracinë brenda LDK-së dhe po të “njëjtat që e hodhën në përqafim të PDK-së, e po kështu kanë rrezikuar të ardhmen e partisë”.
Madje, Lama në këtë bisedë për Gazetën Blic i ka rekomanduar Haki Rugovës që të merret me punët e Komunës së Istogut, ngase sipas saj, deputetët janë përfaqësues të popullit e nuk kanë nevojë për leksione të askujt se si të votojnë.
“Po kështu z. Rugova mos të brengoset për të ardhmen tonë, se ajo nuk varet nga partia, por le të brengoset për të ardhmen e partisë pasi ajo varet pikërisht nga njerëzit e rinj”, ka thënë Lama.
Deputetja e LDK-së, krejt në fund të bisedës ka thënë se i vjen keq, që z. Rugova do të hidhërohet shumë shpesh gjatë këtij mandati, për shkak të votës së deputetëve. / Gazeta Blic

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30