Skënder Hasko:MË VJEN TURP!

nga **Agim Gashi** Fri Jun 12, 2009 3:59 pm

MË VJEN TURP!

Skënder Hasko

Shkrimtar

Shoh që rrjedhin lotë nëpër faqet e njoma të fëmijëve të ngujuar për shkak të mbeturinës primitive-gjakmarrjes, dhe më vjen turp e përlotem edhe unë. Kam takuar e takoj qytetarë të huaj, të cilët më pyesin për fenomenin e gjakmarrjes e të ngujimit dhe unë skuqem e më vjen turp, ngaqë s´di si të justifikohem, se nuk ekziston qoftë edhe një shteg justifikimi. Dëgjoj thirrjen e asaj nëne të re që jeton me ankth për rrezikun që u kanoset tre djemve të saj njomëzakë e që kërkon ndihmë, dhe unë turpërohem si bashkëkombas i saj ngaqë shteti yunë “i plotfuqishëm”, s’paska asnjë grimë plotfuqi e zotësi të bëjë atë që duhet bërë e që i takon të bëjë, por na mban ”fjalime mallëngjyese” e asgjë konkrete. Më vjen turp që sot, në shekullin e XXI-të, kur duartrokasim për hyrje në NATO e përgatitemi për t’u futur në Bashkimin Europian, tek ne ekziston ende ky zakon i egër, primitiv, fisnor e feudal. Më erdhi turp, kur një gazetar zviceran më pyeti: ”Ekzistojnë ende fise të egra në vendin tuaj, që nuk kanë rënë ende në kontakt me qytetërimin?” Ai kishte të drejtë të tallej. Më vjen turp përpara mbesave e nipave të mi të vegjël kur më pyesin: ”Pse i mbajnë mbyllur ata fëmijë që qajnë e nuk shkojnë as në shkollë?! Kush i tremb?” O shtetarët e mi! O politikanët tanë, mos u kacafytni me njeri-tjetrin për karrige e kolltuqe, por kacafytuni me këtë të keqe të madhe që sjell kob e na bën të na vijë turp! Nuk e di juve, por mua dhe shumë të tjerëve si unë, na vjen turp.

Fjala e Lirë

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30