Syla tërhiqet nga Komisioni i verifikimit të veteranëve të UÇK-së

nga **Agim Gashi** Thu Jul 30, 2015 7:19 pm

Foto: Driton Bublaku

Syla tërhiqet nga Komisioni i verifikimit të veteranëve të UÇK-së

Ish-zëvendëskomandanti i Zonës Operative të Karadakut (ZOK), Shemsi Syla, është tërhequr nga Komisioni Qeveritar për verifikimin e veteranëve të luftës së Ushtrisë Çlirimtare të Kosovës (UÇK).
Ai nëpërmjet një deklarate publike i ka bërë me dije arsyet e tërheqjes nga procesi i verifikimit të veteranëve të UÇK-së.
Deklarata e plotë e Shemsi Sylës:
I pakënaqur me procesin e verifikimit të veteranëve të UÇK-së, neglizhimin, zhagitjen, deformimin e tij, njoftoj se tërhiqem nga procesi i verifikimit, si anëtar i komisionit të ZOK. Arsyeja pse po deklarohem publikisht për këtë vendim është sepse, në dy televizionet tona publike, (“Klan Kosova” dhe “Kohavision”), pas publikimit të listave fillestare kam premtuar se do t’i përmirësojmë të gjitha gabimet dhe se do të bëjmë verifikim të drejtë e nuk do t’i hyhet në hak askujt.
Edhe pse nuk jam pajtuar me daljen e atyre listave, atëherë kam marrë përgjegjësi, jo vetëm si anëtar i komisionit, por mbi të gjitha edhe si organizator dhe drejtues i luftës, në pozitën e ish-zëvendëskomandantit të Zonës Operative të Karadakut. Por, duke e parë të pamundur realizimin e këtij premtimi, detyrohem që tani e tutje të mos jem më pjesë e këtij procesi. Unë përkrah ligjin për vlerat e luftës së UÇK-së,edhe pse dihet se ky ligj ka mangësi, paqartësi e edhe lëshime e gabime,por kemi shpresuar se me angazhim ato do të tejkalohen e korrigjohen me akte nënligjore, gjë që nuk ka ndodhur.
Këtë proces nuk e rrezikon vetëm ligji i paqartë, por edhe qasja joadekuate në mënyrën e verifikimit nga ana e atyre që kanë pasur për obligim ta bëjnë një gjë të tillë. Tani jemi në muajin e pestë pas publikimit të listave dhe ende nuk është bërë verifikimi i plotë i listave dhe, të paktën për Zonën e Karadakut, nuk është shqyrtuar asnjë ankesë, kurse komisioni ka filluar të shpërndajë certifikata që i konsideron të verifikuara.
Kam besuar se epoka e UÇK-së do të vlerësohet, do të çmohet dhe ruhet si vlera më e madhe e historisë sonë më të re, por kjo nuk po ndodh. Ajo po degradohet përfundimisht me këtë proces. Meqë po e konsideroj veten të pafuqishëm që të ndikoj pozitivisht, së paku s’dua t’ia lejoj vetes të jem pjesë e këtij procesi të degradimit që po i bëhet ushtarit të UÇK-së. Në vend të vlerësimit të vlerave të vërteta të UÇK-së ky proces po përdoret për përfitime politike, familjare e klanore, madje edhe për të rehabilituar persona me të kaluar të dyshimtë e të pamerituar duke e shfrytëzuar këtë moment historik për t’i barazuar ata me ushtarët e vërtetë të UÇK-së.
Duke qenë kjo një nga çështjet më të ndjeshme të jetës sime, unë kam vendosur që përderisa të vazhdojë kjo mënyrë e vlerësimit, të mos e konsideroj veten pjesë e asnjë liste të këtij kategorizimi të ushtarëve të UÇK-së.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30