Vullnet Mato SHKOLLA LETRARE E FACEBOOKUT

nga **Agim Gashi** Thu Jun 16, 2016 6:02 pm

Vullnet Mato

SHKOLLA LETRARE E FACEBOOKUT
Vullnet Mato SHKOLLA LETRARE E FACEBOOKUT 13417531_1718311911770459_5858661732696361560_n

Në këtë shkollë me dyer pasuordi,
hyn kushdo nga dritaret ajrore.
Moshën s’e kërkon askush, nga bordi,
S’duhet orar, as bie zilja mësimore.

Nëpër klasat e përziera të letërsisë,
talentin provojnë së bashku të tërë.
Disa vrasin mizat e orëve të mërzisë,
të tjerë shijojnë plazh pa det e pa rërë.

Këtu ka një holl, ku pihet kafe ekspres,
neskafe e çastit dhe shqeto turke.
Disa hyjnë për paçe e pilaf në mëngjes,
dikush bën xhiron e tretjes, pas buke.

Ndonjë analfabet derdh rrokje gjysmake,
dikush gdhend në gur shkronjat e zemrës.
Ka qejfli të heshtur, ardhur pas darke,
për eros virtual, nga kofshët e femrës.

Këtu ka një bibliotekë me mijëra rafte,
ku fletët vertikale, hap libri vetiu.
Ka vëllime që rrufiten në pak çaste,
por dhe broshura të shqyera nga miu.

Në këtë shkollë ka një sallë ekspozite,
ku pasionantët afishojnë selfie kolore,
të gjuajnë sy beqarësh mbetur ndër vite,
dhe pleq e plaka të ngjitin pamjet rinore.

Këtu vijnë poetë, po më tepër poetucë,
si dhe nga ata që çajnë detin me këmbë.
Vijnë zbatharakë pa veshur kurrë këpucë,
zonja e zonjusha me takat një pëllëmbë.

Vijnë nxënës, që shpejt bëhen profesorë,
peshkatarë me grepa të peshkut e ngjalës.
Vijnë kërkues të arit, turistë, eksploratorë,
dhe mëkatarët hajdutë, të qingjave të fjalës.

Pas likeve e lavdeve, sikur je kozmonaut,
nga qielli i madhështisë, rrëzohesh papritur.
Thua hëngre grushtin, që të hodhi nokaut,
në çastin kur të dukej vetja yll i ndritur;

Ndodh hakersat, thyejnë dyert arbitrarisht,
bllokojë klasat, me çelësa kopil virusesh
dhe mbetesh përjashta me gojë në gisht,
ku të tallin djajtë me maska vajzash e nusesh.

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31