Bashkimi që solli qeverinë e mbarë

Bashkimi që solli qeverinë e mbarë

Shaban Peraj
Interesi i atdheut kërkon të shmanget kriza

Tani pas zgjedhjeve të 28 qershorit duket se me të drejtë çdo gjë në skenën politike shqiptare po merr drejtimin që i duhet mbarë Shqipërisë e shqiptarëve. Kjo e drejtë lindi si diçka që i duhet këtij vendi për të arritur qëllimin më madhorë që ka Shqipëria në këto momente, atë të integrimit në strukturat evropiane. Kjo është rruga e vetme e shqiptarëve, rruga e duartrokitjes si çdo lloj iniciative dhe pune të dobishme në të mirë të atdheut dhe popullit si dhe mbështetjes së ushtrisë së të lumturve që u shërbejnë atyre. Nuk kemi për t’iu përgjigjur akuzave që na bëjnë për mohim dhe devijim ata që me çdo kusht kërkuan të marrin pushtetin, po pse jo edhe me kërcënime e shantazhe nga më të ndryshmet, këtë për të justifikuar vetën për politikën dështake që udhëhiqen. Sovrani e tha fjalën e vet, ajo që tashmë është në tavolinë lypset të ndiqet nga koka të kthjellëta, për fat ata i ka Shqipëria e shqiptarët dhe populli duhet atyre t’u besojnë me konceptin e ri të qeverisë së re. Një qasje tjetër kanë ata që humbën dhe kjo i arsyeton sepse nuk ndodhi ajo që pritej prej tyre, nuk u arritë shkatërrimi i bashkëpunimit majtas e djathtas të cilën ide e hodhi Edi Rama edhe para fushatës elektorale, jo për t’i bashkuar dy krahët, por për të shkatërruar konkurrentët brenda së majtës. Pavarësisht reagimeve të tij, po edhe të apartiçkëve opozitarë si Gjinushi, Millo apo ndonjë tjetër si këta, tani nuk ia vlen që Shqipëria e shqiptarët të mbahen peng i interesave personale të tyre, për këtë nuk kemi për t’i thënë mallkimit “amin, ashtu qoftë”. Ata kanë aq bagazhë politik sa të kuptojnë të vërtetën e realitetin e krijuar në hartën politike të Shqipërisë, atyre u takon më shumë të merren me vetën se sa me kundërshtarët politik pasi që nuk deshën për hir të karrierës politike të hynë bashkërisht në paqe, atëherë të mos bien në kontradikta, ose çështjet dhe dallimet të mos i zmadhojnë. Kjo nuk i shërben askujt në këto rrethana të krijuara, ndaj ata mund të sjellin në kokat e tyre çfarëdo koncepti për të arsyetuar veprimet e tyre e për të sulmuar kundërshtarin tjetër të cilin dorën në zemër deshën ta shkatërrojnë edhe para fushatës elektorale.
Pozicionet dihen dhe kjo tashmë u bë publike, interesi i atdheut kërkon që të shmanget kriza dhe pengimi i reformave të nisura katër vjet më parë, për çka interesat e vendit janë më madhore se ata të atyre që kanë mbetur të vetmuar pavarësisht trumbetimit që bëjnë për të hedhur lot krokodili. Tani këta të vetmuar e të kombinuar nga politika e vjetër duhet ta kenë të qartë se nuk kanë mbetur larg atdheut e familjes, që i ka bërë të jenë të ndarë prej miqve e shokëve. Këtë e bënë ata vetë duke dashur kështu të jenë mbretër në politikën shqiptare. Ata duhet ta kuptojnë se me idealet e larta, me mendime për botën përtej, flijimin e kënaqësive personale për hir të të tjerëve dhe me këmbënguljen dhe vendosmërinë e jashtëzakonshme bien shpesh në kundërshtim me grupet që ndjekin interesa të ngushta dhe përplasen me to, ai që mjedisi e gjykoi për të keq, me të gjitha qëndrimet mbetet i huaj! Sistemet e ngritura mbi gënjeshtër dhe stërmadhim, siç vepruan këta të vetmuar, është dashur ta dinë se herët a vonë shemben mbi kokë të themeluesve të vet duke mbetur një ëndërr e hidhur dhe një iluzion i përmalluar.
Tani nuk ka pse të habisë askënd formula e re e qeverisjes që u duhet shqiptarëve, ky është realiteti dhe këtë duhet përshëndetur. Gabojnë shumë ata që thonë se nuk duhet bashku e majta me të djathtën, kjo është politikë dhe atë duhet përshëndetur me vet faktin se të gjithë jemi shqiptarë. Ata që punojnë në rrugën për të ndriçuar njerëzit, ata që përpiqen vazhdimisht për lumturinë e tyre, ata që u zgjasin dorën njerëzve të rënë në greminat e ndryshme të jetës, janë shpirtra të lartë që kanë njohur vetën si mbrojtës të shoqërisë shqiptare mes së cilës jetojnë, ata janë koshientë për detyrat që kanë marrë në rrugën e palëkundur për integrimin e Shqipërisë në strukturat evropiane. Ata kanë marrë për detyrë e obligim që shqiptarëve t’u sigurojnë drejtësinë, garancën, të ardhmen të lidhur me të sotmen, pavarësisht nga çdo gjë. Këtë u kanë premtuar shqiptarëve dhe ata duhet t’u besojnë atyre ani pse vinë nga ky apo ai krah politik, ndërsa ata që janë nisur për udhë me shkaqe të paprovuara do t’i lënë të zhgënjyer ata që janë lidhur pas tyre, por edhe vetës do t’i bëjnë dëm.