Asnjë universitet privat, vetëm kolegje

Asnjë universitet privat, vetëm kolegje







Nga Express

Asnjë nga Bartësit e Institucioneve Private të Arsimit të Lartë(BPrAL) nuk do të bartin emrin Universitet.

Ato institucione private të cilat i kanë plotësuar në nivel të kënaqshëm kriteret e parapara do të emërtohen “kolegje”.

Ky është rekomandimi që ka bërë Agjencia e Akreditimit e Kosovës, qeverisë respektivisht ministrisë së Arsimit pas procesit të akreditimit të bartësve Privat të Arsimit të Lartë..

Procesi akredimit ka filluar më 1 tetor 2008 dhe ka përfunduar më 6 korrik kur Këshilli Kombëtar i Cilësisë i ka ofruar rekomandimet Qeverisë për cilat institucione mund të akreditohen ose licencohen.

“Në përputhje me raportet për secilin institucion dhe rekomandimet e këshillit kombëtar të cilësisë, ne si MASHT do të jemi në gjende ti japim licenca çdo institucioni për drejtime të caktuara. Ky vendim u mundëson të rinjve që diplomat e tyre të pranohen brenda dhe jashtë republikës së Kosovës”, ka thënë ministri i Arsimit, Enver Hoxhaj.

“Çdo BPrAL në Republikën e Kosovës që në përputhje me rekomandimet e Këshillit Kombëtar të Cilësisë (KKC) të Agjencionit Kosovar për Akreditim (AKA), i ka plotësuar standardet dhe kriteret e parapara me Ligjin mbi Arsimin e Lartë dhe Udhëzimet përkatëse administrative, merr emrin ‘Kolegj’ “, thuhet në njoftimin e Qeverisë së Kosovës.

Në përputhje me rekomandimet e KKC të AKA, emrin “Kolegj” e bartin këta BPrAL: “AAB-Riinvest”, “Fama”, “UBT”, “ISMI”, “Victory” dhe “Iliria”.

BPrAL që marrin emrin “Kolegj” do të mund të pranojnë studentë edhe në programet master.

Çdo BPrAL i cili sipas rekomandimeve të KKC të AKA që i ka përmbushur pjesërisht kriteret dhe standardet për akreditim dhe si i tillë akreditohet me kusht, mund t’a bartë emrin “Institut”.

Në përputhje me rekomandimet e KKC të AKA, emrin “Institut” e bartin këta BPrAL: “Universum”, “Pjetër Budi” dhe “Biznesi”.

Në përputhje me rekomandimet e KKC të AKA dhe Udhëzimin përkatës administrativ, emrin “Shkolla e Lartë Profesionale” e marrin këta BPrAL: “Tempulli”, “Evolucion” dhe “Design Factory”.

Akreditimi dhe licenca kanë fuqi ligjore vetëm për vitin akademik 2009/2010.

Kolegjet dhe institutet do të pranojnë studentë që kanë dhënë testin e maturës. Ndërsa shkollat profesionale mund të pranojnë studentë nga ata që nuk kanë kaluar testin e maturës.