Odhise Grillo:PËRSE MË SOLLE LULE PËR DITËLINDJEN ?

PËRSE MË SOLLE LULE PËR DITËLINDJEN ?

Cikël poetik nga ODHISE GORO



Poeti i mirënjohur himariot Odhise Goro vazhdon të na dhurojë poezinë e tij të kompozuar mbi notat muzikore të dallgëve të detit. Kur u largohet notave të dallgëve të detit,u afrohet notave të dlira të shpirtit dhe vazhdon të kompozojë me të njëjtin ritëm,me të njëjtën ndjeshmëri,me të njëjtën forcë,me të njëjtën hijeshi. Ne dëgjojmë tingujt e butë muzikorë të poezisë së tij dhe dehemi me dallgë deti,me dallgë shpirti. Ai di të ngrejë dallgë të tilla poetike,të cilat na dehin si me magji. Është një dehje që të mrekullon.

ILIAZ BOBAJ





BRIGJET E MI



Me qiellin dhe zogjtë po ju shkruaj,

me diellin,me hënën dritë-ari.



Me iso këngësh

freskoj aromën tuaj

dhe drithërimën e fyejve prej bari...



Shkronjë më shkronjë...

dhe shkronja bëhet fjalë...

Zemrën ju nis me Jonin,valë-valë...



DEHMË,PASTAJ KTHEMË NË SHTËPI



Derdhma hënë

gotën e trishtimit,

mes vetmisë mos më ler të pi...



Mbushmi mike

kupat e gëzimit,

dehmë,pastaj kthemë në shtëpi...



TË HUMBISJA



Më duhej për të rënët të luftoja,

më duhej për të gjallët të lëvizja,

më duhej për të tjerët të fitoja,

më duhej për vetë-veten të humbisja...



PËR DY SY QË DASHUROJA

---------------------------------------------

Dy shigjeta

si më vranë,

pse më vranë kur i doja ?!



Do t'i vete varrit pranë

për dy sy që dashuroja.



DUF DETI

---------------

Mblidhi duart se t'i preva,

mblidhi se ta mora xhanin !...



Kokën prapa sa e ktheva,

si guxon t'i ngresh fustanin ?!



Duf i detit...



VARKA E FATIT

------------------------

Nga bregu

më përcjell një lule...

Në det të hapur më mallkon...



Kuçedra e dallgëve

kur më sulet,

një varkëz fati më dërgon ?!



Po deti i halleve më mbyti...



O varkë e fatit,

erdhe vonë...



O ZOT

----------

Nga qielli i shenjtëruar,

nga froni yt,ar e argjend,

në qoftë se s'më ke harruar,

nëse më ke për birin tënd:



më nis pak fat,kujtomë një herë,

mos më braktis më në vetmi...



Përndryshe,

aty lart më merr,

në daç,qysh sot,mbyll sytë e mi !...



AJO U KTHYE...

--------------------------

Ajo u kthye,

pak pas mesnatës,

që të ma vidhte gjumin

e vjedhur...



Ç'ia ndjeva flokët

mbi mua hapur,

si krahë trëndeline

hedhur...



ELEGJI KURBETI

---------------------------

Nga larg,

si pëllumbeshë pikëllimi,

më ulesh tek supi-degë-lisi...



Rëndon mbi sup,

më rri te supi tjetër ! Ri-zgjon me sqep

gjithë dhimbjet e një fisi...



Kullon,

mbi mua një plagë shumë e vjetër...



Elegji kurbeti !



SI TË MOS QAJË

--------------------------

Errësirën

e solle të pandehur,

gjykata-natë e nxorri të pafaj !



Dita,

me dritën

e pa-qeshur,

për padrejtësinë si të mos qajë ?



PA TY

----------

Nën të kaltrën e një kupe,

me dy dete-lot në sy,

me një mal-lëndim mbi supe,

qiellin shëtis pa ty...



...QË HAPET NGA JASHTË

-----------------------------------------

Të erdha

mbi gishta,

pa hapat e rëndë...



të ndjeva

çdo dridhje

prej flake në kashtë...



S'gjej kyçin

e derës që hapet nga brenda ?



Kam kyçin

e derës që hapet nga jashtë...



KAÇURELI I TIJ RREBEL

-------------------------------------

Petro Markos,

shkrimtarit të shumëdashur



Ndodh,

me lojrat që loz jeta,

ta kalojnë çdo skenar...



Ai,

me dramat e veta,

dëshpërim mbolli në varr...



Dëshpërim

e jetë mbi vdekje,

dielli s'shuhet,prapë del...



Vetëtimë kaçureli,

kaçureli yt rrebel...



ME NJË QESHJE

--------------------------

Mes natës pa-hënë,

buzë më buzë,

nënshkruam një marrëveshje:



Malin me borë,

që rrugën na ka zënë,

ta shkrijmë me një puthje,

me një qeshje...



I PASHKELUR TË MË MBETET BARI

-------------------------------------------------------

Kush të mundë,

të më vijë te varri...



kush nuk mund,

le të mos vijë...

I pashkelur

të më mbetet bari...