SHBA: Vdes doajeni i lajmeve televizive, Walter Cronkite

SHBA: Vdes doajeni i lajmeve televizive, Walter Cronkite

Cronkite tek amerikanët e moshës së mesme dhe më të shtyrë do të mbahet mend për raportimet dhe njoftimet mbi vrasjen e presidenti John Kennedy, për vrasjen e liderit civil zezak, Martin Luther King, për shkuarjen e parë në hënë, që për koincidencë pasnesër bëhen 40 vjet.



Walter Cronkite

New York - Ka vdekur mbrëmë në New York në moshën 92 vjeçare doajeni dhe legjenda e gazetarisë televizive amerikane Walter Cronkite. Për Z. Cronkite thuhet se ishte pionier i gazetarisë televizive, modeli i parë i udhëheqësit të lajmeve dhe me të drejt do të quhet edhe babai i lajmeve në televizion, të cilin do ta kenë idol shumë breza më mëvonshëm të udhëheqësve të lajmeve të gazetarisë televizive amerikane.
Mbrëmë, kanalet televizive amerikane, me të marrë lajmin mbi vdekjen e tij, ndërprenë programet e rregullta për t’i kushtuar minutat dhe orët në vijim jetës dhe veprës së gazetarit Cronkite, i cili me punën, seriozitetin, saktësinë dhe vërtetësinë e informatës bëri që të quhej “njeriu që më së shumti i besonte Amerika”.
Këtë fakt e njohu mbrëmë në deklaratën e tij edhe presidenti Barack Obama duke thënë se “Walter Cronkite për dekada me radhë ishte zëri më i besuar në Amerikë”.


Cronkite, si udhëheqës i gjysmë-orëshit të lajmeve për 19 vjet, prej vitit 1962 deri më 1981 në kanalin CBS, do ta bënte gjatë gjithë kohës programin më të shkueshëm dhe besueshëm të lajmeve në 50 shtetet amerikane.
Cronkite ishte me aq ndikim tek publiku sa presidenti Lyndon Johnson, gjatë luftës së Vietnamit, pas një editoriali ku Cronkite thoshte se lufta nuk mund të fitohej, do të deklaronte se “nëse e kam humbur Cronkite do ta humbas mbështetjen edhe nga qendra e Amerikës”.
Cronkite tek amerikanët e moshës së mesme dhe më të shtyrë do të mbahet mend për raportimet dhe njoftimet mbi vrasjen e presidenti John Kennedy, për vrasjen e liderit civil zezak, Martin Luther King, për shkuarjen e parë në hënë, që për koincidencë pasnesër bëhen 40 vjet.
Përfundimisht Cronkite ngriti aq lartë nivelin e etikës dhe informimit të drejtë e objektiv në gazetarinë televizive në Amerikë, duke u bërë jo vetëm shembull dhe idol, por duke e ngritur dhe bërë të nderuar, të respektuar dhe me ndikim këtë profesion kudo në botë.