Redin Hafizi:Edi Rama- ky karagjoz i quditshëm

Edi Rama- ky karagjoz i quditshëm

Redin HAFIZI


Në shumë raste kryeministri Berisha e ftoi Edi Ramën që të merrte pjesë në konkurrim, por Edvini refuzoi me pretekse nga më absurdet. Kreu i PD-së vedosi të kandidojw në krye të listës në Qarkun e Tiranës, ku Bashkia kryesore kryesohet prej kreut të PS-së. Rezultatet nxorrën koalicionin e PD si fitues në Qarkun e Tiranës. Njëkohësisht, votuesit shqiptarë e panë Edi Ramën si një klloun që kërkon të rrijë pas kuintave, pasi ka frikë nga e vërteta që shqiptarët dinë për të.
Askush nuk i vuri kusht Edi Ramës që të kandidonte në krye të listës së Tiranës, edhe pse i takonte të kandidonte në atë qark, por ai ishte i lirë të kandidonte madje në krye të çdo qarku dhe Edi Rama nuk e bëri, pasi e dinte se populli nuk e donte. Nëse Edi Rama do të paraqitej në krye të listës së një qarku, votuesit e majtë do t'i shpërndanin votat patjetër mes partive të koalicionit të majtë dhe nuk do të votonin PS, thjesht për urrejtjen ndaj Edi Ramës. Lista që Edi Rama do të kryesonte do të ishte 100% e humbur dhe këtë ai e kishte të qartë që para zgjedhjeve. Votuesit ishin të vendosur përpara 28 qershorit. Vota për dorëheqjen e Edi Ramës u konsiderua si vota për integrimin, vota për bashkëpunimin dhe vota për një Shqipëri të re që po ndryshon.
A. Imeraj, një ndër figurat e shumta mediatike të PS aktualisht, në datën 11.07.2009, ka lexuar deklaratën e Edvin Ramës dhe ka deklaruar se koha është e maskarenjve, por Shqipëria është e shqiptarëve, por maskarenjtë nuk mund t'u mohojnë shqiptarëve lirinë për të vendosur me votë fatin e tyre. Imeraj kur lexon deklaratat që kryetari i saj krijon në momente aluçinante, nuk arrin të shohë gabimin, por thjesht si një robot lexon...
Koha po punon për Shqipërinë dhe shqiptarët dhe njëkohësisht vetë Shqipëria dhe shqiptarët po jetojnë në kohë. Nuk ka se si koha, pra aktualiteti të përjashtojë Shqipërinë dhe shqiptarët. Megjithatë, të gjithë e dinë se Edi Ramës tashmë i kanë mbetur thjesht deklaratat e tij absurde të mbushura me shprehje bombastike dhe mjaft të pakuptueshme për elektoratin. Ai madje pa frikë ka nisur që të shprehë edhe ofendimet dhe deri kërcënimet ndaj votuesve shqiptarë, duke i konsideruar ata maskarenj vetëm sepse shqiptarët votuan në shumicë dorëheqjen e Edi Ramës. Në 28 qershor votuesit shqiptarë treguan se vërtetë koha e maskarenjve ka mbaruar dhe më në fund sërish iu tha një "JO" e madhe mafies në pushtet. Klani Rama-Ruçi si investitorët më të mëdhënj të shumës 190 milion euro në fushatën e PS-së, kërkuan që ta intimidonin votuesin shqiptar përmes parasë, por shqiptarët kanë një karakteristikë të veçantë, sa më shumë të kërkosh t'i intimidosh aq më kundër të bëhen.
Kulaçi dhe kërbaçi
Në fillim të fushatës Edvin Rama dhe Gramoz Ruçi shpallën Partinë e re Socialiste, e cila fuqimisht mbështetej nga G99, që më shumë kishte marrë pozicionin e FRESH-it në fillim. Me mbështetjen e Ruçit, njeriut që transmetoi urdhërin për ekzekutimin e Arben Brocit dhe tre qytetarëve të tjerë të Shkodrës në 2 prill 1991, kreu i G99 nisi fushatën e një ripërsëritjeje të një Lëvizjeje Rinore në mbështetje të idesë së Ramës për të ashtuquajturin ndryshim. U duk që kjo ishte thjesht një kopje e fushatës zgjedhore amerikane e për të ëmbëlsuar popullin e jo një premtim i drejtë dhe i detajuar. Megjithatë, socialistët e çiftit Rama-Ruçi po u ofronin shqiptarëve kulaçin në këmbim të votës, për të vetmen arsye se një humbje e zgjedhjeve do të thotë humbje e interesave të biznesit të këtij çifti.
Nga ana e PD-së, në fakt një teori e tillë u duk e konsumuar, pasi Shqipëria kishte nisur që në vitin 2005 rrugën e ndryshimit, ndaj në 28 qershor 2009, PD deklaroi thjesht vazhdimin e ndryshimit të nisur. Nuk ishte një ndryshim në fjalë, por një ndryshim krejtësisht i prekshëm. Kjo ndodhte për të parën herë në Shqipëri tani kur më në fund kemi autostradën Durrës-Kukës, që lidh gjithë shqiptarët e ndoshta më vonë e pse jo le të lidhë gjithë Ballkanin. Gjithashtu, një sërë projektesh madhore në Durrës, Lezhë, Vlorë Sarandë e Shëngjin e bëjnë ndryshimin më të prekshëm. Pra, PD nuk kishte nevojë të mbështeste fushatën përmes deklaratave propagandistike apo të kopjonte ndonjë model fushate.
Pas rezultatit të zgjedhjeve, ku shqiptarët i dhanë edhe një mandat tjetër kryeministrit Berisha të vazhdojë ndryshimet, Rama dhe Ruçi të nxirë në surrat nisën të përdorin kërbaçin ndaj zgjedhësve. Ata jo vetëm që i kanë deklaruar shqiptarët maskarenj, por kërcënojnë çdo ditë me destabilizim të situatës së brendshme, në një kohë që BE po diskutonte planin e heqjes së vizave me vendet e Ballkanit. Kërcënimet arrijnë deri aty sa çifti Rama-Ruçi kanë nisur të përmendin 1997 dhe me një deklaratë të tillë ata kërcënojnë edhe zyrtarët e BE-së, të cilët nuk do të dëshironin në gjirin e vet një tjetër sulm të mafies së kuqe shqiptare.