Pajaziti: Policia në veri respekton zinxhirin komandues

Pajaziti: Policia në veri respekton zinxhirin komandues

Arsim Rashiti, Bota Sot
Nuk dihet asgjë për vjedhjen në polici




Pavarësisht që policia në veri të Mitrovicës, e dominuar totalisht nga serbët ka dëshmuar disa herë se nuk i bindet zinxhirit komandues, eprorëve të saj në Prishtinë, ministri i Punëve të Brendshme Zenun Pajaziti kënaqet me faktin se kjo polici, vazhdojka të raportojë për Prishtinën.
Policia e Kosovës në veri, disa herë gjatë protestave të serbëve atje kundër kthimit të shqiptarëve në pronat e tyre, i ka lejuar ata që të shpërthenin kordonin policor. Po ashtu kjo polici besohet se raporton që më parë në Beograd se sa në Prishtinë.
“Të gjithë policët në Kosovë janë pjesëtarë të Policisë së Kosovës, ku të gjithë e respektojnë Ligjin për policinë. Sipas tij kanë pasur vështirësi me abstenimin e disa pjesëtarëve, por ata të cilat janë kthyer i raportojnë eprorëve të tyre”, tha Pajaziti.
“Kemi pasur vështirësi më shumë se një vit me disa pjesëtarë që kanë abstenuar, fatmirësisht pjesa kryesore e tyre janë kthyer në vendet e veta të punës dhe ata i raportojnë eprorëve të tyre sipas zinxhirit komandues. Policia e EULEX-it po na ndihmon shumë në këtë proces, ata janë mbështetës në respektimin e zinxhirit komandues”, tha ai. Pajaziti më tej tha se kanë takime të rregullta të menaxhmentit të policisë me të gjitha regjionet dhe stacionet e policisë, duke përfshirë edhe ato në veri të vendit. “Javën që shkoi ka pasur vizita të drejtorit të policisë edhe në stacionet tjera ku ka pjesëtar nga komuniteti serb dhe ky proces tani është pozitiv”, tha ai duke shtuar se nuk kanë asnjë vështirësi në funksionimin e policisë me zinxhirin komandues ashtu siç e kërkon ligji.
Ndërsa, ende nuk ka asgjë për vjedhjen në polici, para më shumë se tre muajve kur qenë vjedhur nga dhoma e dëshmive 50 kilogramë drogë dhe një sasi e konsiderueshme parash. Ministri i Punëve të Brendshme, Zenun Pajaziti, të dielën, gjatë interpretimit të auditimit, u tha gazetarëve se për këtë çështje mund të kërkojnë përgjigje në polici. “Mund të bëni pyetje në organet e policisë se deri ku ka mbërri rasti. Unë e di që është një proces shumë i rëndë, hetuesit më të mirë janë duke punuar, kjo është çështje e drejtësisë dhe fjalën e vet mund ta jap drejtësia për këtë rast.”, tha Pajaziti duke shtuar se është një fazë e hetimeve të thella dhe policia e vlerëson kur do të jap këto të dhëna.
Ndërkohë ministri Pajaziti e vlerësoi pozitivisht raportin paraprak të Zyrës së Auditorit Gjeneral (ZAGJ), duke thënë se në këtë raport nuk bëhet fjalë për ndonjë shkelje të rëndë, apo ndonjë keqpërdorim të buxhetit, përveç disa mangësive të vogla të cilat në vitet e ardhshme nuk do të përsëriten. Ministri, Pajaziti, duke folur për raportin e auditorit gjeneral, tha se MPB-ja këtë raport e konsideron real dhe pozitiv.