Serbia nuk mund të ndërhyjë në punët e brendshme të Kosovës

Serbia nuk mund të ndërhyjë në punët e brendshme të Kosovës

Zgjedhjet e Serbisë në Kosovë cilësohen si ndërhyrje në punë të brendshme.



Mbajtja e zgjedhjeve të Serbisë në territorin e Kosovës janë ndërhyrje në çështje të brendshme të Kosovës, thonë analistë në Prishtinë.

Mbajtja e zgjedhjeve të Serbisë në territorin e Kosovës janë ndërhyrje në çështje të brendshme të Kosovës, thonë analistë në Prishtinë. Serbia ka paralajmëruar se do të zhvillojë procesin zgjedhor këtë të diel në Graçanicë dhe në Gorazhdec të Pejës. Ndërsa përfaqësuesi Civil Ndërkombëtar, Pieter Faith, tashmë ka emëruar 16 anëtarë të Ekipit Përgatitor Komunal për komunën e re të Graçanicës. Analistët vlerësojnë se veprimi i Fajthit është në pajtim me planin e decentralizmit.
Procesi i decentralizimit duhet të vazhdojë pavarësisht nga mangësitë që mund të ketë ky proces vlerësojnë analistë politikë në Kosovë. Sa i përket zgjedhjeve serbe, të paralajmëruara të mbahen këtë fundjavë në dy lokalitete të banuara me serbë në Graçanicë dhe në Gorzhdec të Pejës, analistët e vlerësojnë si një ndërhyrje të hapur në punë të brendshme të Kosovës.
Ilir Deda, drejtor për hulumtime në KIPRED vlerëson se me këto zgjedhje Serbia tenton të përvetësojë serbët kosovarë dhe të shtrijë ndikimin e saj në pjesën qendrore të Kosovës. Ai përmend tre faktorë kryesorë që Serbia ka në fokus të saj me zgjedhjet e paralajmëruar në Graqanicë dhe Gorazhdec.
Analisti Agim Zogaj e quan provokim politik mbajtjen e zgjedhjeve në këto dy të ashtuquajtura komuna. Ai thotë se këto zgjedhje nuk do të kenë efekt në zhvillimet politike në Kosovë.
Përfaqësuesi Civil Ndërkombëtarë, Piter Fajt, tashmë ka emëruar Ekipin Përgatitor Komunal për komunën e re të Graçanicës. Ilir Deda e quan këtë veprim të vonuar, por pozitiv dhe rekomandon që qeveria e Kosovës të vazhdojë me zbatimin e decentralizimit.
Autoritetet në Prishtinë thonë se nuk do të ndërmarrin asgjë për të penguar mbajtjen e zgjedhjeve serbe këtë të diel në Komunën e Prishtinës dhe atë të Pejës. Përfaqësues të institucioneve kosovare, ata të opozitës, por edhe të misioneve ndërkombëtare, vazhdimisht kanë inkurajuar serbët që të marrin pjesë në zgjedhjet lokale të 15 nëntorit në Kosovë.