Ministria e Kulturës: Dorëheqja e Arjan Krasniqit e nxituar

Ministria e Kulturës: Dorëheqja e Arjan Krasniqit e nxituar

Bruna Merko
Drejtori i Teatrit Kombëtar, Arjan Krasniqi dha dorëheqjen për “ndërhyrje dhe presion nga ana e zyrtarëve të Ministrisë së Kulturës”, kjo e fundit hedh poshtë arsyet e Krasniqit.



Arian Krasniqi

Jep dorëheqjen drejtori i Teatrit Kombëtar të Kosovës, Arjan Krasniqi në mënyrë të parevokueshme nga detyra e Drejtorit të Përgjithshëm të TKK-së. Ndërsa arsyet e largimit nga ky post, të cilin nuk ka bërë asnjë përvjetor, ia mvesh ndërhyrjes së politikës në “punët” e kulturës. “Për shkak të ngushtimit të hapësirës për veprim të mëtutjeshëm konform kompetencave që jep Ligji për Teatër, për shkak të fillimit të ndërhyrjeve politike në punët e menaxhmentit të TKK-së. Si dhe për shkak të shtimit të presionit burokratik të zyrtarëve të MKRS-së, jap dorëheqje të parevokueshme nga detyra e Drejtorit të Përgjithshëm të TKK-së’ ka njoftuar z. Krasniqi. Ndërsa në një prononcim për “Botën sot” Arjan Krasniqi ka pohuar se që në momentin e parë që mori këtë post ka bërë me dije se do të punonte deri sa “t’i kishte të lira duart për të bërë më të mirën për teatrin, dhe në kohën që do të ndodhte e kundërta do të largohej menjëherë nga ky post”.
Nga ana tjetër ka reaguar Ministria e Kulturës, e cila nëpërmjet këshilltares, Arbërore Riza, shprehu keqardhjen për këtë veprim. “Ministria e Kulturës e konsideron aktin e dorëheqjes së Arian Krasniqit nga ky post si një veprim të nxituar dhe në shpërputhje me veprimet dhe përpjekjet e përbashkëta të ministrisë dhe të menxhmentit të teatrit për të krijuar rend profesional në teatër”, u shpreh znj. Riza. Ndërkaq u deklarua publikisht se ministria me asnjë veprim nuk ka ndërhyrë politikisht në politikat repertoreske apo menaxhuese të teatrit. Ndërsa këshilltari Bekim Lumi u shpreh se akt nga ana e Arjan Krasniqit ka qenë i papritur në një kohë që bashkëpunimi ka qenë shumë i mirë. “Dorëheqja e drejtorit Krasniqi është e papranueshme, e papritur”, tha z.Lumi duke shtuar se Ministria e Kulturës në një afat kohor të përshpejtuar do të ndërmarr veprimet e nevojshme për të mos lejuar vakum institucional në teatër.