Nga Presidenca:Sejdiu dekreton ambasadorin e parë të Republikës së Kosovës

Sejdiu dekreton ambasadorin e parë të Republikës së Kosovës

Presidenti Fatmir Sejdiu ka dekretuar sot ambasadorin e parë të Republikës së Kosovës. Ai është Vilson Mirdita, i cili do të marrë postin e ambasadorit të Kosovës në Gjermani. Për afro një vit, Mirdita ka qenë i ngarkuari me punë në Berlin.

Presidenti Sejdiu dekretoi ambasadorin e parë të Republikës së Kosovës në Gjermani, Vilson Mirdita. Me këtë rast fillon edhe konfirmimi i zyrtarizimit të ambasadorëve të shtetit të Kosovës në vendet e ndryshme në të cilat përfaqësohet shteti ynë. “Kemi marrë edhe konfirmime tjera nga shtetet ku kemi dërguar përfaqësuesit tanë, mirëpo shumë shpejt do të bëhen publikë edh emrat tjerë që do të akreditohen zyrtarisht si ambasadorë të vendit tonë”, theksoi për “Bota sot”, presidenti i Republikës së Kosovës, Fatmir Sejdiu. Ditëve në vijim Sejdiu pritet të akreditojë edhe ambasadorët në 17 ambasadat e tjera të Kosovës që pritet të jenë funksionale gjatë këtij viti. Ndërkaq Ministria e Jashtme është në procedim të përzgjedhjes finale të sherbimit civil dhe diplomatik.

Presidenti Sejdiu vizitoi familjaret e të pagjeturve

Bota sot




Presidenti Sejdiu gjatë një takimi të gjatë me nënat greviste, në tendën ku ato janë duke qëndruar që nga fillimi i grevës, ka dëgjuar kërkesat e tyre dhe u ka premtuar se institucionet e vendit do të bëjnë gjithë çfarë është në duart e tyre për ndriçimin sa më parë të fatit të të gjithë të pagjeturve

Presidenti i Republikës së Kosovës, dr.Fatmir Sejdiu, i shoqëruar nga zëvendëskryeministri Ramë Manaj ka vizituar familjaret e të pagjeturve, të cilat tash disa ditë janë në grevë, me kërkesë për identifikimin më të shpejtë të mbetjeve mortore të të pagjeturve nga lufta e fundit. “Unë nga ana ime do të përpiqem, bashkë me institucionet e tjera, të bëjmë punën më të madhe të mundshme, secili sipas kompetencës së vet dhe të bëhet një trysni e vazhdueshme në mekanizma të profesionalizuar që mund të japin më tepër nga pjesa e kontributit të tyre profesional për ndriçimin e fatit të rreth 1900 vetave që Kosovës i mungojnë. E ndajmë dhembjen me këta njerëz”, ka theksuar Presidenti Sejdiu.
Presidenti Sejdiu gjatë një takimi të gjatë me nënat greviste, në tendën ku ato janë duke qëndruar që nga fillimi i grevës, ka dëgjuar kërkesat e tyre dhe u ka premtuar se institucionet e vendit do të bëjnë gjithë çfarë është në duart e tyre për ndriçimin sa më parë të fatit të të gjithë të pagjeturve, një punë që po bëhet sipas metodave më bashkëkohore dhe që kërkon kohë deri në arritjen e një rezultati të saktë të identifikimit.
Për më shumë, lidhur me këtë çështje ka folur zëvendëskryeministri Ramë Manaj, i cili ka dhënë detaje për të gjitha përpjekjet e bëra deri tash në procesin e kërkimit dhe identifikimit të të pagjeturve. Grevistet janë vizituar edhe nga kreu i AKR-së Behxhet Pacolli.