Rama, shantazhe dhe para për t'u rizgjedhur kryetar

Rama, shantazhe dhe para për t'u rizgjedhur kryetar

Anashkalohet Komisioni Zgjedhor i PS në përgatitjen e zgjedhjeve. Si në vitin 2005, kryetari në detyrë i PS-së do zgjidhet me parimin 'Një pallat, një votë'.

Kryetari në detyrë i Partisë Socialiste, Edi Rama, ka intensifikuar përpjekjet për blerjen e mbështetjes brenda strukturave socialiste për të siguruar rizgjedhjen e tij në krye të selisë rozë në Kongresin e Jashtëzakonshëm të 29 gushtit. Ai ka urdhëruar vartësit e tij në Bashkinë e Tiranës, të cilët mbajnë funksione kyçe në Partinë Socialiste, që të nisin një evidentim të të gjithë komisionerëve dhe delegatëve që do të marrin pjesë në Kongresin e Jashtëzakonshëm, në mënyrë që të nisin tratativat për blerjen e votave apo për përjashtimin e atyre që nuk pranojnë një gjë të tillë. Duke shkelur në mënyrë flagrante procedurat që përcakton statuti i Partisë Socialiste, Rama ka vënë në punë mekanizmat korruptive që përdori në vitin 2005 për të uzurpuar postin e kryetarit të Partisë Socialiste. Nëpërmjet kryetarit të Komisionit Zgjedhor në Partinë Socialiste, Genc Gjonçaj, Rama u ka dërguar sekretarëve të PS-së në rrethe kërkesa për listën e anëtarësisë, e cila do të marrë pjesë në zgjedhjen e kryetarit me parimin një anëtar një votë. Burime nga selia rozë bënë të ditur se kampi i rivalëve të Ramës, Malaj dhe Blushi, e kanë konsideruar këtë veprim si një shkelje të rëndë të kushtetutës së PS-së, duke hedhur dyshime të forta për përjashtimin e anëtarëve që janë kundër rikandidimit të Ramës. Shkresa, e cila duhej të nisej në emër të Komisionit Zgjedhor të PS-së, mban vetëm firmën e kryetarit pasi komisioni nuk është mbledhur për të shmangur kundërshtimet që mund të lindnin gjatë diskutimit për këtë çështje. Kodi Zgjedhor i PS-së e përcakton qartë nisjen e shkresave të tilla, vetëm pasi mblidhet ky komision, përndryshe nuk mund të nisë puna për përgatitjen e infrastrukturës zgjedhore. Ky anashkalim i procedurave përbën një dëshmi të qartë të aktivizimit të instrumenteve korruptivë e manipulativë nga ana e Ramës për t`u rizgjedhur me çdo kusht në krye të PS-së në Kongresin e 29 gushtit. Ajo çka e thellon më shumë këtë skandal është fakti që kryetari i Komisionit të Zgjedhjeve për PS, Gjonçaj, i cili është caktuar për administrimin e zgjedhjeve brenda PS-së, ngarkohet me këtë detyrë në konflikt të hapur interesi, pasi Gjonçaj rezulton të jetë njëkohësisht edhe punonjës i Bashkisë së Tiranës. Kjo është një tjetër dëshmi e trafikut të influencave që lëvizin mes Bashkisë së Tiranës dhe Partisë Socialiste, influenca që burojnë nga afera korruptive me leje e sheshe ndërtimi që pritet të përdoren sërish si metodat më efikase për ndryshimin e rezultatit të votimit në Kongres. Është mëse e qartë se Rama po përdor metoda identike me ato të vitit 2005 për të rimarrë kreun e PS-së, të cilin e humbi pas disfatës në zgjedhjet e përgjithshme të qershorit. Në atë kohë ai u denoncua gjerësisht nga eksponentë brenda Partisë Socialiste, por edhe nga aleatët e PS-së për aplikimin e parimit "një pallat një votë", për të ardhur në krye të selisë rozë. Nga ky parim përfituan disa elementë të rëndësishëm në vendimmarrjen e PS-së, një ndër të cilët ishte Gramoz Ruçi, i cili vazhdon ndërtimin e një pallati shumëkatësh në zonën e ndaluar për ndërtime pranë Liqenit Artificial.
Genc Gjonçaj konfirmon keqpërdorimin e vet dhe marrjen e misionit për manipulimin e kongresit
– Genc Gjonçaj, kryetari i Komisionit të Zgjedhjeve të Partisë Socialiste, ka pohuar dje ndërmarrjen e tij për manipulimin e procesit të votimit për kreun e kësaj partie, sipas parimit “një anëtar-një votë”. Këtë veprim të tij, ai nuk ka lënë në harresë ta etiketojë si “një moment procedural në bazë të statutit”. Më tej, Gjonçaj ka vijuar shfajësimin për veprimin e tij individual, si një veprim që “i paraprin çdo date të mundshme që kongresi do të vendosë për mbajtjen e zgjedhjeve në parti”. Pa dhënë asnjë shpjegim se sipas kujt vendimi, udhëzimi, apo urdhri ai po kryen këto veprime në emër të komisionit që drejton dhe pa dijeninë e anëtarëve ët tjerë, Gjonçaj ka shpjeguar se, “komisionerët edhe para edhe pas kongresit zgjidhen po nga strukturat e Partisë Socialiste. Aktualisht po mblidhen emrat dhe konstituimi bëhet pas kongresit”, ka sqaruar Gjonçaj.