Teki Dervishi:Vendi pa parlament nuk quhet shtet

Vendi pa parlament nuk quhet shtet




Teki Dervishi


Fakti se “misionarët” evropianë nuk i përgjigjen ligjeve të Kosovës dëshmon se ata janë mbi ligjin që e “mbikëqyrin”. Kur nuk u përgjigjesh ligjeve të një vendi ku vepron politikisht dhe ushtarakisht, ti je mbi ligjin e atij vendi, i ke duart e lira të veprosh ndaj vendorëve pa u frikuar se do të kesh ndonjë përgjegjësi juridike. Ku është shkaku i kësaj anomalia politike? Shkaku del nga fakti se “misionarët” nuk e pranojnë legjitimitetin dhe sovranitetin e këtij vendi, që do të thotë as Parlamentin e Kosovës.
Që është kështu dihet, por nuk dihet pse Parlamenti i Kosovës, nuk po e debaton deligjitimitetin e “mbikëqyrësit” të huaj të shtetit? Mungon transparenca e qëndrimit të Parlamentit ndaj shkeljes së Kushtetutës? Mund të ekzistojë ndonjë “arsye politike”, diçka që s’dihet, po kjo quhet strategji. Parlamenti nuk bën strategji, po e mbron ligjin, Kushtetutën. Parlamenti aprovon ose refuzon “strategjitë” politike, “marrëveshjet” e ndryshme të pushtetit me të huajt.
Pushteti e as opozita nuk mund të vendosin kritere bashkëpunimi me misione të huaja, pa aprovimin e Parlamentit, pa mbështetje kushtetuese. Misionet që bashkëpunojnë me institucionet pushtetore të Kosovës, por jo edhe me Parlamentin, në këtë mënyrë pushtetin e shndërrojnë në “shoqëri civile” e cila nuk ka obligime parlamentare ndaj shtetit dhe Kushtetutës. Në këtë mënyrë shkelet verdikti, vendosja ligjore i nënshtrohet vendosjes politike, kështu parlamenti e përjashton parlamentin. “Misioni” evropian mund të “menaxhojë” politikë në bashkëpunim me pushtetin, por parlamenti është ajo instancë që e verifikon legjitimitetin kushtetues të “menaxhimit politik” duke i refuzuar ose pranuar marrëveshjet e pushtetit me “misionet” e huaja.
Kur cenohet dhe shkelet interesi i shtetit, Parlamenti është ai që e mbron verdiktin dhe Kushtetutën, të cilën e ka aprovuar më parë. Qeveria vepron sipas Kushtetutës, po kështu edhe organizatat e tjera politike zyrtare ose thjesht qytetare, civile, por kushtetutshmërinë e veprimeve të tyre e mbron ekskluzivisht parlamenti. Për çështje shtetërore nuk ka të drejtë të marrë vendime askush tjetër pos Parlamentit, kjo dihet, sepse kështu është gjithkund në botën e civilizuar dhe demokratike.
Çka po ndodh që 20 muaj me sovranitetin e shtetit të Kosovës? Këtyre ditëve Eulex-i publikisht deklaron se do të bisedojë me pushtetin me dyer të mbyllura, larg syve të opinionit, qytetarëve të Kosovës, mediave? Pse Parlamenti që 20 muaj nuk del me një qëndrim zyrtar: a është shkelur a jo kushtetutshmëria e shtetit të Kosovës, a është a jo sovrane Kosova? Nëse është - le ta thonë! Parlamenti është përfaqësia e qytetarëve, e popullit, e verdiktit, është mbrojtësi i Kushtetutës, patronazhi i saj legjitim. Kushdo, me këdo që bën “pazar” mbi shtetin prapa syve të popullit, atëherë fajtor është parlamenti, ai që e përfaqëson popullin, dhe ai që mbi shtetin lejon të vendosë pushteti ose “mbikëqyrësi” jolegjitim.
Derisa partitë politike kritikojnë ose e heshtin copëtimin e Kosovës në kufij të brendshëm administrativë, në kufij që i konstituon misioni i huaj duke shkelur tërësinë territoriale kushtetuese të Kosovës, dhe këtë e bën në marrëveshje me një shtet të huaj, ky problem krucial nuk debatohet asnjëherë në Parlamentin e Kosovës. Pse? Shtrohet pyetja që imponohet nga situata dhe rrethana e krijuar politike në Kosovë pas aprovimit të Kushtetutës dhe nënshkrimit të Deklaratës së Pavarësisë: atëherë si është e mundur që në mënyrën më moniste parlamenti në heshtje “të marrëveshur” të vendosë - që të mos debatojë mbi cenimin dhe shkeljen e Kushtetutës? Partitë opozitare të përfaqësuara në Parlament, në konferenca shtypi (e jo në Parlament) konstatojnë se Kosova është e ndarë, se Qeveria ka faj për këtë, dhe se ata do ta bashkojnë Kosovën kur të vinë në pushtet!
Të shesësh dardha politike kinse pushteti konstituon shtetin, e jo si është ligjore gjithkund në civilizim - shteti pushtetin? Kush ka faj që shkelet Kushtetuta, pushteti apo Parlamenti? Opozita e sotme ia shkarkon fajin pushtetit, mbase pse opozita është në Parlament dhe kështu fajin e heq prej Parlamentit, prej vetvetes, dhe ia shkarkon Qeverisë. Shtrohet pyetja: pse Parlamenti në parlament nuk hap debat zyrtar mbi shkeljen e sovranitetit të Kosovës? Sepse kështu parlamenti vetamnistohet nga fajësia duke provuar ta bindë opinionin se pushteti qëndron mbi Parlamentin, e jo anasjelltas, siç është e vërteta. Pushteti i përgjigjet Parlamentit, e jo Parlamenti pushtetit. Ndaj Parlamenti është përgjegjës i sovranitetit, e jo Qeveria ose opozita.
Opozita parlamentare do të duhej të kërkonte që Parlamenti të hapte debat zyrtar mbi riokupimin e Kosovës. Nëse pozita parlamentare, me shumicë votash që ka, do ta ndalonte debatin, atëherë do të dihej se Kosova nuk ka parlament, por vetëm pushtet. Vendi pa parlament, nuk quhet shtet!