AAK: Mos vendosja e kamerave vendim politik i diktuar nga qeveria

AAK: Mos vendosja e kamerave vendim politik i diktuar nga qeveria

Albulena Neziri
AAK-ja e cilëson vendim politik moslejimin e vendosjes së kamerave në vendvotime.




Ramadani: Aleanca për Ardhmërinë e Kosovës konstaton se arsyetimet për mungesë të kohës, përgatitje teknike apo për shkelje të privatësisë së qytetarëve nuk qëndrojnë dhe nuk kanë bazë në asnjë aspekt


PRISHTINË- Aleanca për Ardhmërinë e Kosovës ka reaguar sot kundër vendimit të KQZ-ës për mos vendosjen e kamerave, duke e quajtur atë vendim politik të ndikuar nga ana e Partisë Demokratike të Kosovës. Këto komente i bëri Burim Ramadani, sekretari i përgjithshëm i AAK-ës në një konferencë për media. Vendimi destruktiv i Komisionit Qendror të Zgjedhjeve, sa i përket mos vendosjes së kamerave në qendrat e vendvotimeve është i papranueshëm për AAK-ën, sepse me këtë bihet në kundërshtime me parimet e transparencës gjatë procesit zgjedhor, u shpreh Burim Ramadani. Ai tha se vendimi i fundit i KQZ-ës është vendim i drejtpërdrejt i Partisë Demokratike të Kosovës.
Sipas Ramadanit kryetarja e KQZ-ës, Nusrete Lushta, sa i përket çështjes së kamerave, ka mbajtur anën e PDK-ës dhe me këtë ka humbur rolin e saj si institucion i pavarur.
Sipas Ramadanit, Aleanca për Ardhmërinë e Kosovës konstaton se arsyetimet për mungesë të kohës, përgatitje teknike apo për shkelje të privatësisë së qytetarëve nuk qëndrojnë dhe nuk kanë bazë në asnjë aspekt.
Sekretari i përgjithshëm i AAK përmendi pesë kërkesat e kësaj partie drejtuar KQZ-ës dhe Institucioneve tjera të Kosovës.
Komisioni Qendror Zgjedhor në mbledhjen e tij të fundit, gjatë rishqyrtimit të vendimit për vendosjen e kamerave nëpër vendvotime, përsëri ka vendosë kundër. Pro vendosjes ishin LDK, AKR, AAK edhe LDD përderisa kundër ishin PDK, partitë minoritare, si dhe kryetarja e KQZ-së. Ky vendim i KQZ-së është përfundimtarë, ndërsa mbetët të diskutohet edhe njëherë vetëm vendosja e kamerave në Qendrën e numërimit të votave.